درر العراق

ღ عِشق ღ · 4/October/2018

يادافن ادموع بعيون النهر
يميتم الليل يا آخر گمر

يا عم الايتام يادين الصبر
سجادك اليوم وحده ينتظر
محتاجك اهـواي بس لا تعتذر
مارايد الماي رادك بالگبر

قل مات عباس آيات السهر

يميتم الليل يا آخر گمر
_____________________

مو سنة وسنيتي اعوام المضت
لويرضه ينساك عينه مارضت
كل مرض ويطيب كل شدة انگضت
بس مرض فرگاك روحي اتمرضت

بحساب العيون باجـي إشكم بحر

يميتم الليل يا آخر گمر
_____________________

يشتم حزن عاش مايشتهم هوه
يتمرجل الليل عالفاگد ضوه
مايشرب الماي بدموعه ارتوه
واسبعطش موت مات ابنينوه

وبحضن التراب دافن له درر

يميتم الليل يا آخر گمر
_____________________

يامهم عباس بس عندك أهم
وبـساط سلمان إجعل هـالعلم
اطوي السمه وروح ليمنعك ألم
چفن علي وياك بقماش الخيم

ياشهر عاشور وابنفس الشهر

يميتم الليل يا آخر گمر
_____________________

هذا إبن الحسين يعني إبن النبي
يحچيلك اتشوف عن ضيم السبي
يبـديها وياك تل الزينبي
يختمها بالشام بمصاب العبي

من بعد الفراگ يجمعكم قدر

يميتم الليل يا آخر گمر
_____________________

بعيونه شتشوف تلگه مگبره
مو بس الأجساد چم طفله ومره
شافك عالرماح وي زينب تره
صحت ويـالسياط أرجوا المعذره

مقبولة الأعذار حقه من أعتذر

يميتم الليل يا آخر گمر
______________________

أمنيته عباس من توصل إله
بيدك تره ايصير دفنه ابكربله
تجتمع بالخير كل هالعايله
وزينب تجي ردود ويه القافله

ويعود الحسين راسه اعله النهر

يميتم الليل يا آخر كمر
_____________________

كلمات الشاعر حمزة السماوي