گالولي شابگته ويحاچيهه
دگوا بابنه وجابولي طاريهه
طحت والگاع تدفعني وارد ليهه
گالو عقدت وطخ بالسما الچكليت
ذيچ الخلصت عمرك تتانيهة
قبلت بابن عمهه ومشت للصالون
عالحاضر اخذهه وما تعب بيهه
گلتلهم بچت؟؟ دنگوا گالو : لا
نفس كحلتهه ما خربت معانيهه
گلتلهم ضحك گالولي ما شفناه
وهي من الضحك ما طبگت أرحيهه
وعلي حسبالنه مرجوحه موش انسان
تشمر روحهه بحضنه ويدنيهه
اول مره اضوگن چيله المغدور
من گالولي شابگته ويحاچيهه
واول مره احس يتشابهن بالموت
حبل المشنقه وحجول رجليهه
حايط بيتهم سويته دف للراس
حتى اتگلي سولف گصتك شبيهه
اخذهه الما سهر بالركن تالي الليل
اخذهه الما گشط خده بتراچيهه
اخذهه الما مكشف صدره لاهل البيت
اخذهه الما نزع ثوبه لبواچيهه
اخذهه الچان يحلم ينعزم خطار
من باب ابن عمهه يطب يهنيهه
ما خلت رجفتي بخور بالحيطان
من يوم التقت ايده بسواجيهه
هي التجربه التبدي بأحبك موت
لازم تنتهي بالموت تاليهه
عندج صورتي احتفظيلي بيهه هواي
وبأقرب حطب تنور ضميهه
رفعت الصافي.
رد مع اقتباس
اوووف. 
