هنا

[فاينمن]

للاسف صديقي هناك مصاديق تدحض هذه الرحمة وهي تكوينية بحتة اي بعيدة كل البعد عن الصنعة الانسانية.

هو احنه هذا الشیء اللی یؤذینا ..لأنو جای نشوف الاحداث اللی تصیر بالعالم تختلف اهوای عن الامور اللی خبرونه بیهن عن الله .. التعالیم الدینیة عن رحمة الله تختلف عن اللی نشوفه اهوای ...

فالجفاف والقحط الذي اصاب بعض المناطق وانحسار ابسط المتطلبات وهو الماء وموت الالاف الناس بسبب الجوع والجفاف يثبت عكس ذلك .

هالشی وهای الاحداث ممکن تکون سیاسیة ...یعنی سیاسات بعض الدول سبب انو هیچ یصیر ..لأنو الماء بالعالم ما ینقص وحسب تکنولوجیة المتطورة بالعالم حتی ماء البحر هم یگدرون یستخدمونه بعدین منو شاف اخذو ماء من الارض و وزعوا خارج الارض (غیر لاستخدام رواد الفضاء اللی عددهم کلش قلیل ) الماء کیف ما یکون و این ما یکون بالاخیر یرجع للأرض بس السیاسات هی السبب ...لکن احنه نسأل کل های الاحداث و تسلط المتجبرین علی الضعفاء و عدم الرأفة بین الناس الله یشوفها لو لا ؟ اذا یشوفها لعد وین رحمته حتی یتدخل ویعدل الدنیا

وكذا ولادة الطفل المعاق وما يخلقه من رواسب نفسية تجعل منه انسان يشعر بالنقص والمعاناة الى ان يتوافاه الاجل .اكتفي بهذين المثالين لان القائمة ستطول

ای صح ... های من النقاط المهمة اللی تخلینا نفکر برحمة الله ... لیش یولد طفل معاق ؟ وین رحمة الله و هو ارحم الراحمین ؟ یعنی هذا اللی ارحم الراحمین یسمح للقوانین الطبیعیة تؤثر علی بشر اللی شرفه اعلی من الکعبة لیش الله یقبل أنو یولد طفل معاق وهای الحالة تؤثر علی کل حیاته ..لعد شلون یگول ارحم الراحمین ؟ انا و أنت و کلنا اللی حاضرین هنا تنکسر قلوبنا علی الاطفال اللی من دون ذنب ولدو معاقیین لعد هو لیش ما ینکسر قبله

شکرا استاذنا حازم الغالی

[فاينمن]

مرحباً، شلون أعتقد الله رحمن ورحيم؟ أكثر من موقف صار لي ونجوت بتصرف قوة خفية شيء جاء خالف كل المعطيات التي كانت ستودي بي الى الهاوية،

اهلین عزیزی حسن ... هو اساسا لیش یخلیک بهیچ مواقف حتی بعدین یحتاج ینجیک منها ؟ هو مو ارحم الراحمین ؟

اذاً لا بد من أن هناك قوي قادر أنقذني وساعدني هو الله،

أحنه نؤمن بوجود قدرة عظیمة تحکم الکون ..هو الله بس سؤالنا عن صفة الرحمة

ليش رحيم؟ لأن من صفات الانسان العادي المعتدل يكون مرة رؤوف ومرة شديد وهذا يسمى توازن الشخصية فكيف بإله خالق الانسان والكون لا بد بل ومن المسلمات أن يتصف بالتوازن وإلا لكان خلقه فوضوياً وتصرفه طائش وحاشى لله من ذلك

أنت ذکرت صفات الانسان العادی المعتدل ..لکن هناک ناس ممیزین جداااا ...وانت ما ذکرت صفات الانسان الممیز ... الانسان محتاج للتوازن لأن اذا مایکون متوازن راح یوصله ضرر لأنو ما عنده سلطه علی العالم و تدبیثر العالم مو بیده ..لکن الله بما أنه حکیم و قادر جدا وعنده قوة بلانهایة المفروض ما یتمشکل اذا یکون رؤوف بالعالم ...بعدین منو یگول الرأفة والرحمة تسبب ضرر بالعالم ..تصور کل الناس واحد عنده رأفة ولطف تجاه الآخر وکل الحیوانات وکل الکائنات منو یگول بهیچ حالة اکو ضرر ؟ بعدین بالجنة مو الجمیع متنعمین برحمة الله لیش هناک ما نسولف عن التوازن وانو لازم یکون الله مرة شدید و مرة عنده رأفة ؟؟ سالفة التوازن مانگدر نحدد بیها الله لأنو تنفی صفات القدرة و الحکمة عند الله ..لأنو الحکیم القادر لازم یگدر من اصعب امور یحصل له طریق و یبدع له فکرة

، معلومات أكثر للأسف ما أكدر أوضح لك لأن ينراد فيلسوف أو شخص متمكن يوضح لأن أسلوبي جاف

لا بالعکس حضورک کان مفید ..لا تحرمنا من معلوماتک ... هسه من وین نجیب الفیلسوف

حسن الغالی

[فاينمن]

الفيزياء تفسر ظاهرة كونية لكن اذا تريد اثبات الرحمة يلزمك الرجوع لقواعد الفلسفة والمنطق وقراءة الأحداث والترجيح بينها،

ومنو گال انا ما احب وما اقبل الفلسفة والمنطق بالعکس اذا الفلسفة والمنطق یگدرن یجاوبن علی سؤالی اقبل الجواب و اعتمد علیه

مع ذلك أنا مثلك مرات أتعمد البحث بطريقة مادية عن أمور عقائدية حتى أعرف شلون أجاوب الملاحدة وأتباع الأديان غير السماوية اذا سألوني

أنو تعرف جواب اسئلتک من کل الطرق شیء حلو عزیزی

اشکرک عزیزی حسن الورد

[فاينمن]

اوكي سام ..
سؤالك الاول انه رب العالمين ليش اصلا يخلينا بمواقف صعبة و بعدين ينطينا الرحمة الاكسترا مو ؟
شوف اني ما رح اسولفلك بالقران و الدين و هالاشياء ..رح اسولفلك من باب فهمي للأمور ..

شیء حلو ... دکتورة ای طریقة تشوفینها مقنعة لا تحرمینی منها

كل انسان من يكون ماخذ موقع قيادي في اي مجال ..يسوي سيستم ..قوانين ..انظمة ..و يعلن عنها ..و لازم موظفيه او جماهيره تتبع هالقوانين ،اما حتى تحصل اللي هو وعدهم بيه ..او حتى السيستم يمشي صح و الكل يستفيد من الغاية اللي تخلى الها هذا السيستم .

أنا متفق بهذا الشیء ..بس وضع القوانین مو بالضرورة یدل ع الرحمة ...

مثلا ...المدرسة كمثال ..الغاية منها شنو ؟ ان الانسان يتعلم ..
بيها سيستم ؟ اي بيها .
المدرسة ونسة و كيف و تحشيش ؟
الجواب لا ..
المدرسة دروس و امتحانات و ناس تطلع اوائل و ناس ترسب و ناس نص ونص ..
ناس تتعاقب و ناس تتكرم ..
هذا سيستم بشري ..اكو احد يگدر يگول انه سيستم ظالم ؟

و الله ليش اكو طالب يرسب ..لو ليش خطية الطلاب يمتحنون و يعيشون الضغط النفسي بالامتحانات و يسهرون الليالي و يبچون و و و ..اشكال قهر بيها المدارس ...احد يقبل يگول ع المدرسة ظلم ..لو من تشتكي منها يگولولك هاي كلها لمصلحتك ..تتعلم و تنمو شخصيتك و تقوى و بالنهاية تحصل الجائزة اللي هي النجاح ..و احتمال التفوق ..و هالجائزة توصلك لمراحل اعلى ..تعيين و فلوس و احتمال بعثة دراسية ..الخ الخ ..
مو كلها هاي الاشياء احنا قارين بيها و متقبليها و محترميها بخيرها و شرها ..بصعوبتها و ضيمها ..؟!
نفس الشي الحياة ..اتخيلها مدرسة چبيرة ...بيها امتحانات و ضيم و قهر و شلعان گلب و تفوق و رسوب و جوائز بالنهاية ..


مثال المدرسة خوش مثال ... خل نبین احتیاجاتنا للرحمة بهذا المثال ... اذا المدیر اللی هو یعرف کل شخصیات الطلاب و ظروفهم و مواهبهم یجی مثلا یخلی طالب ضعیف وماعندی قدرة بـ صف کل لو اغلب اغلب طلابه اقویاء ویدورون شر شنو نگول علی المدیر ؟ اذا یجی المدیر یعطی بعض الطلاب امکانیات بصفهم اکثر من امکانیات باقی الطلاب شنو نگول علی المدیر ؟؟ اذا المدیر یشوف طالب گاعد یتعب بسبب وجوده بـ صف ما وما یغیر مکانه لو ما یساعده حتی ینجح شنو نگول علی المدیر ؟ اذا بهیچ مدرسة البعض نجحو والبعض ما نجحو شنو لومنه علی الطلاب اذا هم مو بکیفهم اجو الها ؟


الفرق هنا الجوائز الموعود بيها الانسان على لسان رسل اللي سوة هذا السيستم ( رب العالمين جل و علا ) هي جوائز عالية القيمة ما وراها نكد ..جنة ..فردوس ..للناجحين ...للي التزموا بآداب السيستم ..و قوانينه ..اللي وضعت اصلا حتى يرتقي الانسان و البشرية كلها ..

هسة نرجع لسؤالك ..ليش رب العالمين يخلي الانسان بهيچ مواقف..
الحقيقة احنا كل مشاكلنا ناتجة من احتكاكنا ابعضنا ..الناس بالناس ناس تظلم ناس ..ناس تأذي ..ناس تسرق مجهود و مال ..ناس قوية شريرة ..ناس ضعيفة ..ناس تاكل ناس ..رب العالمين مو سبب المشاكل ..هو عز و جل خلا سيستم ..

حتی بمثال المدرسة ..اذا یحدث بین الطلاب احتکاک نگدر نگول جزء من سبب هذا الاحتکاک عدم المدیریة اللازمة االحکیمة الرحیمة للمدرسة ...

لو الكل ملتزمة بيه كان صار عدنا مدينة فاضلة ..لكن ما يلتزمون ..

المسئول علی الالتزام بهای القوانین الله ... بعدین المفروض من اللی یفرض القانون حتی بمثال المدرسة أنو یکون منصف باختیارة للقوانین یعنی ووفق قدراته ... مخلی دماغنا یحب الموسیقی ویرتاح للموسیقی بس یگولون الموسیقی حرام ؟ البعض من عدنا یخلیهم ینولدون بقوة عالیه و البعض ینولدون وهم ضعیفین و بعدین مخلی القوانین لکلهم نفس الشیء ...(طبعا کتبت اهنا هوای اشیاء بس امتنعت من ذکرهن ممکن نتکلم بیهن ع الخاص ومن بعدها اضیفها هنا )

فعباده يتعرضون لمواقف مؤلمة و مؤذية بسبب اقرانهم ..شركاءهم بهاي المملكة ..و احيانا تكون هذي المواقف فوق قدرة الانسان على دفعها و حلها ..هنا ..تتدخل الرحمات الاكسترا ..اللي كلنا مجربيها و نعرفها و مارين بيها ..

اکو قری بالعالم کل اهل های القری لو ینولدون ماعدهم شوف یعنی یعنی مامکفوفین لو ینولدون بحالة أو نقص خاص ...وین رحمة الله العالیة من هذول ؟ الحالات اللی خارج قدرة الانسان و مؤثرة علی حیاة الانسان اهوای بس مانشوف اثر من رحمة الله بیها ... قصدی اثر عینی مانشوف

تتدخل الرحمة الالهية و تنقذ العبد و تدفع عنه و عن اولاده و اهله وماله و عرضه ..الخ ..و كل ما كان عملك عند الله و نيتك جيدة كنت اقرب اله و كان هو المدافع عنك ..

دافع عن النبی بیوم احد لو ما دافع ؟ اذا دافع لیش جیش النبی انهزم ولیش انجرح النبی ؟ واذا ما دافع لیش ما دافع غیر الرسول الاکرم اقرب شخص و انسان لله ؟ ..ارید اگول أنو حتی بهای الحالة هم ما نگدر نطبق رحمة الله علی شیء معین حتی نعرفها و نفهمها ...

لأنك ما تستحق ان تتعرض لمواقف ربما تسحقك ..و هذي رحمة خفية ..لأن اكو هواية دفع الهي احنا ما نكتشفه و لا نعرفه .

الدفع الالهی اللی احنه ما نگدر نکتشفه وما نعرفه مو علینا أنو نؤمن بی ...

اتمنى اكون وفقت في ايصال وجهة نظري ..

افکر اکثر بهای مشارکتک .. وراح استفید منکم ع الخاص هم و بعدین اضیف هنا اذا حصلت علی شیء
اما الرحمة اللي كنت حابة اسولف عنها ابتداء ..فأأجلها لوقت اخر ..و انتظر اي تعقيب اذا تحب ..

المفروض ما تحرمینا دکتورتنا

اهلین دکتورتنا الغاااالیة

[فاينمن]

بصراحه مافهمت أسئلتك فراح افضل المتابعه

تسعدنی متابعتک اخی عدنان ..اذا کان عندک رای هم خبرنا

منور عزیزی

[فاينمن]

واللهي يا سام اني هم ممفتهمة هالسالفة

یبدو أنو صفة الرحمة صفة غامضة و کنا نمر منها مرور الکرام ... لو ممکن اصلا ما الها اثر بعالمنا هذا ..لو ممکن أنو اصلا ما الها وجود بتاتا

الموقف الرحيم مثلاً من فقير يدخل بيتك و يسرقك و انت تعرف و مع ذلك تسمح بهالشي لان فقير و رأفت عليه
او من تتنازل عن فلوس داينتها او ادنتها لشخص و مكدر يوفرها الك بالوقت او هم لان فقير و عنده عائلة و يحتاج

یعنی انت تگولین أنو الرحمة هو انو تسوی شیء من دون ما تنتظر نفع لنفسک لو تعطی شیء مع أنو ممکن تحتاجه... أنا اوافق بأن نگول الرحمة هو أنو اسویلی فعل رأفة من دون ما انتظر نتیجة أو نفع الی ...
او من تستر على شخص لان تعرف الظروف اجبرته يسوي الي سواه ، ولو هنا ح تدخل بمعضلة اخلاقية
اعتقد هنا هي الرحمة

سالفة الستر مو رحمة ممکن تکون قریبة من الرحمة بس مو رحمة ... بخصوص الله ... الله یستر لأنو اذا مایستر یفقد صفة الستار ... بعدین حتی من نسوی خطأ گدام اهلنا لو اصدقائنا القریبین هم ما یگولون بالاخص اذا الظروف اجبرتنا
بس من الله يخلقك كامل صحيح بلا امراض او عيوب خلقية ، هاي مو رحمة هذا واجب الله تجاهك لان هو الي خلقك ، اقصد ليش رح اعتبر الله يرحمني اذا اطاني جسد صحيح و هو مفروض من البداية اكون صحيحة ؟

موافق معاک آیة

، اني م طلبت منه يخلقني و استقتلت ع الوجود بحيث طلبت منه يخلقني و اتحمل العواقب ، هاي نقطة ،

اساسا لحد الآن ما حصلنا علی شخص یگدر یثبت النا انو احنه طلبنا من الله أنو یخلقنا
بس ادا ناخذ هالنقطة بشكل واقعي ف الله ماله علاقة بل جينات الآباء او اياً كان السبب المادي ،

بس الله یگدر یؤثر علی الجینات مو ؟ بعدین لیش الله مخلی سبیل حتی من خلاله الطبیعة تگدر تخلی الشخص یطلع ناقص ... أحنه نگول عن الله أنه ارحم الراحمین وهای الصفة العظیمة ما توافق الاحداث اللی نشوفهن

هو الي رح يأثر
و نفس الشي بلنسبة للرزق ، مو رحمة منه يرزقك لان هو الرزاق غير ؟

نعم صح

بالنسبة لسوالف الدعاء ، اعتقد كلنا نشوف انو الله ماله دور فعلي بحياتنا اليومية و انو الحياة تاخذ مجراها سواء دعينا الله او لا
الدعاء بس مخدر ، ماله دور فعلي ، بالذات اذا انت تؤمن بالقدر

مرات نشاهد أنو البعض من خلال الدعاء یوصلون لمبتغاهم بس المشکلة أنو های الحالة ما تشمل الکل وبعدین من بعد ما ینشلع گلبه الشخص یاله یحصل نتیجة تجی من بعد الدعاء

سو رحمة الله اعتقد نشوفها بس بيوم القيامة ، من يعفو عن مجرم " بنظره "

اذا رحمة الله تظهر بالقیامة وقبل القیامة ماعدها ای ظهور عینی فأعتقد مو من الضروری أنو نعتقد بیها بهای العالم .. خلص نؤمن أنو هی موجوده بالآخرة

اما بحياتنا العادية مااشوف اكو رحمة ، لذا اثبات الرحمة يجي بالآخرة

ممممممممم ممکن

هاي بناءً على الصورة اللطيفة الي الاديان تظهر الله بيها ، اما لو كان الله شرير و ديكتاتوري و يحب يعذبنا و خلقنا للتسلية ، ف بهالوكت اي شي الله يسوي الي ح تكون رحمة منه كأن يخلقني صحيحة افتهمت شلون ؟


عفیة ... بس هسه نحتاج واحد یثبت النه أنو الله دیکتاتوری و شریر و خلقنا للتسلیة ..یعنی بین الحالتین واقفین ..


اوف سام هاي عود اني مبطلة من زمان احجي بالدين و بالله

هو أنت من الابتداء سوالفک بس علی السحر والشعوذة وینک وین سوالف الدین

مع أنو خایف منک خاف سحرتی الموضوع بس مع هذا اسعدنی حضورک حجیة آیة أختی فی الله

[فاينمن]

نرجع لموضوع الاخ سام 2
عزيزي سام2 الذي فهمته منك بالرد على سؤالي
انه انت تريد معلومات علمية وعقلية على وجود رحمة الله
عزيزي اقول لك ولكل الذين يعتقدون بان الاعتماد على العقل والعلم
كفيل ان يحل جميع الاشياء
اقول لهم انتم واهمون وتسيرون في طريق مظلم لايوصلكم الى شيء
نعم صحيح ان العقل و العلم هما عاملان مساعدان في فهم الاشياء
ولكن هما ليس كل الاشياء الموصلة للحقيقة

مو بالضرورة من طرق علمیة لو عقلیة نوصل للجواب ..احنه نرید جواب مقنع ..کیفما کان بس نرید جواب أنو نگدر نستند بی ونعتمد علیه

فالعقل ليس بمستوى واحد عند الجميع حتى يوصل الجميع لمعرفة الحقائق الغيبية
وكذلك العلم لم يبلغ المستوى الذي حل لنا كل الاشكالات التي تحدث في هذا الكون
حتى يمكننا ان نكتفي به

ما نفکر بأنو احنه نگدر نوصل لمنتهی الفهم والعلم بس نحاول ندرک الاشیاء و الامور اللی ترتبط بینا

هذه المقدمة خليها في بالك مستقبلا حتى لاتقع في اشكالات عقائدية
قد تكون سببا في وسوسة الشيطان لك

شکرا لک

نرجع لاصل الموضوع الان واضرب لك مثلا بسيطا
لو انت تمشي في شوارع اي دولة وتوقف سيارتك في مكان ممنوع
فماذا سيكون الحال ؟
اكيد سيكون الحال قطع وصل بغرامة مالية او اي عقوبة حسب قانون الدولة مباشرةً

لو ان احدا ما لاسمح الله ارتكب فد جريمة معينة فماذا سيكون الحال
اكيد سيكون الحال القاء القبض عليه فورا و العقوبة حسب نوع الجريمة

طيب نحن يوميا نعصي الله لماذا لايعاقبنا ؟

یعنی أنت تعتقد أنو الرحمة هی أنو الله ما یعاقبنا ؟ طیب والاطفال المریضین من یوم ولادتهم والحالات الخارجة عن قدرة الانسان شنو نگول علیهن یعنی الله معاقبهم ؟ بعدین اللی الله ما یعاقبنا الآن مو معناتها أنو ترک عقابنا وسمح لنا لا ..هو بالنهایة کلنا یعاقبنا ونشوف جزاء کل عمل سوینا و یحاسبنا الله .. القرآن یگول ...:

قل ان تبدوا ما فی انفسکم او تخفوه یحاسبکم به الله

و بغیر مکان یگول ..من یعمل مثقال ذرة خیرا یره ... ومن یعمل مثقال ذرة شرا یره ..

مو معناتها عنده اغماض من عقابنا ...

سالفة وجود القوانین مو بالضرورة تدل علی الرحمة

فالانسان يستحق العقوبة من اول يوم يرتكب فيه جرم
لماذا لايعاقبه الله على جريمته مباشرةً ؟؟

لأنه یرید یعذبه اشد العذاب بعدین

بل ينتظره لعله يتوب فيرتكب الذنب الاخر فينتظره مرة اخرى لعله يتوب
فيرتكب الذنب فينتظره لعله يتوب وهكذا على طول حياته
اليست هذه رحمة من الله ؟؟

القرآن یگول ... أَمْ حَسِبَ الَّذِينَ اجْتَرَحُوا السَّيِّئَاتِ أَنْ نَجْعَلَهُمْ كَالَّذِينَ آمَنُوا وَعَمِلُوا الصَّالِحَاتِ سَوَاءً مَحْيَاهُمْ وَمَمَاتُهُمْ ۚ سَاءَ مَا يَحْكُمُونَ ...بمعنا أنو حتی لو تتوب عن الذنب بس ما راح تخلص کلش کلش من العذاب لو ما راح تموت مثل اللی الله راضی عنهم ... الجمیع یمرون علی لیلة الوحشة حتی العلماء والاولیاء طیب وین رحمة الله ؟ الجمیع یمرون علی الموت اللی هو مخیف و مر ..هنا وین رحمة الله ؟ یگولون علی نزعات الموت أنو لنشر بالمناشیر و قرض بالمقاریض اهون من نزعة من نزعات الموت های وین نخلیها بای قسم من الرحمة ؟

انسان عايش 60 او 70 سنة تحت رحمة الله ويتقلب في رزق الله

یتقلب برزق الله لأنو الله رازق و من واجب الله یرزق المخلوقات لأنو هو اللی حب یخلقهم مو هم طلبو منه مثل ما الام والاب من ینجبون ولد وظیفتهم یقومون بواجبه ... بعدین سالفة الرزق شویون یتعارض مع الرحمة ..حدیث القدسی یگول و رزقک مقسوم فلا تتعب ..یعنی انت تتعب لو ما تتعب رزقک هیچ مخلیه وذاک الشخص الفلانی یتعب لو ما یتعب راح یحصل اکثر منک ..حسب هذا الحدیث ایضا وین رحمة الله ؟

ويتمتع بكامل صحته وقواه العقلية ومع ذلك ينكر وجود الله

اللی ینکر وجود الله لأنه ما قانع بالادلة الموجودة اللی یستخدمونها اهل الدین لوجود الله ... جمیع الناس ماعندهم عداوة مع الله بس لازم یقتنعون بوجوده

ومع ذلك لا يمنع الله عليه رزقه او يصيبه بامراض لايستطيع ان يقوم منها
اليست هذه رحمة الله ؟؟

سولفنه علی الرزق ... بخصوص الامراض ..هل هذه رحمة من الله انو بعض اللی ینکرون الله یعیشون برفاهیة مطلقة و بعض من الناس اللی یعبدون الله مصابین بامراض وحالات تکسر القلب و الله ما یساعدهم ..وین رحمة الله ؟

والشواهد في هذا كثيرة يا عزيزي ذكرتها هنا اختصارا

المشکلة مثل ما اکو شواهد تدل علی لطف الله (مع أنو احنه نشوفها من واجبه لأنو ماکو غیره رب لهذا الکون) اکو شواهد تدل علی عدم رحمة الله ...

وكل ما في الكون يدل على وجود رحمة الله فلا تكن من المشككين

انا ما اشکک بوجود الخالق بس ارید اعرف الله حرف من بعد حرف ... مع أنو عندی یقین ما اگدر احصل علی کل الفهم و الادارک تجاه هذا العالم وتجاه الله بس احاول

اخی العزیز الرمیثی اسعدنی حضورک جدااااا

[فاينمن]

بعد ما قريت كل الردود وتعقيبات الاخ سام2 عليها، اكدر اكول:
١- محد شاف الله بعينه، وانّما احنه افترضنا وجوده، حتى نكدر نفسّر وجودنا و وجود باقي الكون.

احسنت .. أحنه افترضنا وجود الله أو قدرة خارجة عن حدود الکون و العالم و بباطن هذا الکون والعالم هم بحیث تگدر تسیطر علی هذا العالم لکن ما محدوده بهذا الکون والعالم

٢- بما انه احنه فرضناه ( خالق ) ، فلازم ننطيه صفات حلوة و حميدة اتّصف بيها بعض الناس ( طبعاً بصيغة التهويل و التعظيم )، مثل أرحم الراحمين، حتى ننطي لعقلنا اللاواعي إيعاز ( محبة الله ).

بس بعض الصفات مو بالضرورة تکون عند الخالق .. و البعض لا ...اندماجیات مثل ما یگولون اصحاب التوحید .. مثلا یگولون الخالق لابد وأنو یکون غیر متناهی حتی یگدر یحدث ای امر یریده ومثلا یکون عنده حکمة ... وو بس الرحمة ما نشوفها من الضروریات ..بس تعالیم الدین تگول های الصفة عند الله ... و های الصفة وسعت کل شیء لهذا نحس باحتیاجنا لمعرفة هذه الصفة ...

٣- بدوا الناس يربطون كل شي جيد بحياتهم لهذي ( الرحمة )، بس لو جتهم مصيبة راح يذبّوها إما براس الشيطان( اللي فرضنا وجوده كقوة للشر)، او براس الناس.

صح موافق معاک ..بالقبل هم کنت موافق معاک ... کأنو ما یلاحظون انو القدرة او الوجود المؤثر بالعالم هو الله .. وهو فوق کل قدرة

٤- لو نجى واحد من عدنا من حادثة خطيرة راح يكول هاي رحمة الله و لو مات بيها محد يجيب الله بالطاري!

لهیچ اسباب اغلبنه مانعرف صفات الله

تحياتي

نورت الموضوع دکتورنا الغالی

[فاينمن]

لي عودة سام ولكن هذه المرة سأقنعك قناعة تامة لأنني اجبتك مختصرا اما هذه المرة سأجيبك بـ ((خير الكلام ماقل ودل)) لي عودة انتظرني فقط

کل الهلا سیف .. ننتظرک صدیقی ... أن شاء الله تقنعنی و تجیبلنه ادلة کافیة ومقنعة

[بـشــــار]

عزيزي سام
أعظم رحمة من الله عز وجل هي إنطاك عقل حتى تكَدر تفكر بي..
ورب العالمين من كَل لنبينا الكريم وماارسلنا إلا رحمة للعالمين..
رحمة في عالم كان يعاني من الجهل والتخلف والاستعباد وكثير امور قبيحة..
الرحمة هي العطف هي الاحتواء هي البركة هي الرزق هي الصحة هي إنك تعتقد نفسك وحيد بوقت هناك رب يسمعلك..
زين شلون يسمعلي وماكو جواب منه؟
الله عز وجل هو الخالق ومو نادل بمطعم تكَله من بعد إذنك جيبلي هاي الأكلة ويكَلك صار ب10 دقائق تكون عندك..
رب العالمين حكيم وحليم يعرف شنو الي ينفعنا من الي مينفعنا..
لما أدعي من الله عز وجل بدعاء سوء على س من الناس بس لأن أكرها هل رب العالمين راح يستجيب دعوتي ويأذي فعلا هالشخص؟
واجي بعدها ضايج من ربي واصيح عليه واكَله ليش مااستجابيت دعوتي ها!!!!
أدعي ربك بتلقائية بسلاسة بمحبة بثقة وقناعة إن الله عز وجل يسمعك وعاجلا ام اجلا يستجيب دعوتك وتشوف اثرها بحياتك..
الله عز وجل من يكَلك إدعي مو يقصد تحط رجل على رجل ويكَلك شبيك لبيك أني بين إديك..
لما تريد تنجح مراح ينفعك الدعاء والصلاة إذا ماتجد وتجتهد وتكَول وما توفيقي إلا بالله..
وهنا تذكرت عبارة للدكتور مصطفى محمود "اذا نزل مؤمن وكافر إلى البحر فلا ينجو إلا من تعلم السباحة , فالله لا يحابي الجهلاء فالمسلم الجاهل سيغرق والكافر المتعلم سينجو"
الله عز وجل يكره يشوفك عاجز ومحبط وجبان ومستسلم ..
شلون تلكَه الرحمه..
لما تشوف نفسك كَاعد الصبح وإنت بصحة جيدة..
الاخت أية تكول هو واجب منه يرزقني غير هو الرزاق؟
إي نعم هو الرزاق بس بمعنى أنك تشتغل مو تنام 24 ساعة وتريد ملاك يدكَ باب بيتك ويكَلك رب العالمين دزلك ألف دولار اليوم..
ولا ينزلك مائدة من السماء كل يوم أحد ويكَلك من تخلص مايحتاج تغسل الصحون!!
الله عز وجل مو بهاي السذاجة الي البعض يعتقدون بيها..
أما رحمة رب العالمين من ينطيك جسد صحيح حتى تشكره وتحمده لما تشوف غيرك يعاني من أمراض وتشوهات خلقية وعاهات و و الخ ..
وهسة تكَول شنو ذنبهم؟
مالهم ذنب ربك يخلق مايشاء ويحطلك شواهد وصور كَدام عينك وهو رحيم معهم بكثير من الأمور لاأني ولاانت نعرفها فقط هو ..
عليك تحمد ربك فقط على النعمة الي إنت بيها..
رحمة الله وسعت كل شئ كل شئ مو بس الإنسان ولاالحيوان ولاالنبات..
شنو الي يمنع فيزيائيا إصدام أي كوكب بالأرض..
حتى لو تسطرلي معادلات وتجارب ومشتقات و و الخ راح يضل أكو نقص عظيم نجهله وهو إرادة الله..
وهذا الإنسان الي يعتبر نفسه اليوم متكبر وجبار بالأرض شكَد كَدر يفهم من حقيقة هذا الكون..
شكَد كَدر يكتشف أو ينطي الخبر اليقين أنو يلا ياسكان الأرض أمشينا نروح لكوكب زحل هذاك الكوكب صالح للعيش..
هذا الكون من الغباء أن نعتقد إنه خلق نفسه بنفسه من الغباء نعتقد أنو حياتنا ومانحن عليه اليوم إجه من فراغ دون فعل فاعل واذا نعتقد ان رب العالمين فقط شديد العقاب وعنيف ف هذي قمة الغباء والسذاجة..
الله رحيم بيك بكل عمل يصدك عنه ونفسك ماتتقبله..
الله رحيم بيك حتى وإنت بعيد عنه حتى وإنت تكفر بي لأن باب التوبة مفتوح..
الله رحيم لأن إحنا عباده الي لازم نحمد ونشكره بالضراء قبل السراء..
ليش لمن نوكَع وتصير عدنا مشكلة يلا نعرف الله؟
وين جان الله عز وجل لما جنت تسافر وتتونس وتضحك وتلعب؟؟ جان رحيم بيك بكل أوقاتك..
صدكَني ياعزيزي سام شما أذكرلك من صفات الله عز وجل واثار رحمته علينا مراح أكَدر ألخص 1% من رحمته عز وجل..
أي نعم أني أنسان مؤمن وإيماني بالله عز وجل أكبر رحمه أحس بيها..
لأني أشوف الأشياء أكثر من الاخرين الي عقولهم تضرب أسداس بأخماس وتايهين بفكرهم..
لما تباوع على شخص على الأرض وإنت راكب طيارة أو صاعد فوكَ برج حتشوف هالإنسان شكَد قزم كَدام هالمساحة البسيطة ف كيف يكون كَدام الكون؟كيف يكون كَدام رب العالمين؟
المعنى شما نفكر شما نسوي شما نعتبر نفسنا عاملين إنجازات وإبتكارات وتطور العلم و و إلخ مراح نكَدر ولو إجتمعت الخليقة برمتها من أدم لغاية أخر طفل مولود خلال هالاجزاء من الثانية على أن يواجهوا هذا الكون ويكَولون بصوت واحد مانحتاج الله لأن إحنا أقوى!!
صديقي العزيز
مسرور جداً أن أشوفك ويانا بهذا الطرح الجميل..
وياريت تكررها دائما