شيبه شيبه .. احسب افراگك عليه
شيبه شيبه .. سبحة راسك بين اديه
شيبه شيبه .. خطوة الفاگد منيه
سبحة الزهره تره امنيدي خذوها
اگبالي گطعوا خيطها ومن طشروها
طفله طاحت من ظعنه ومالگوها
وين مايندار اشوفن راس ابوها
سكته سكته .. طاحت الدمعات مني
سكته سكته .. خاف شامت سمع وني
سكته سكته .. كبرتني الغاضريه
_________________________________
آنه امك لو أخت منياهي اجيلك
راسك ابحضني گمت وارد شتكيلك
ساعة أون المنحرك ساعة الدليلك
انا متحاره اشيبرد لي غليلك
حيره حيره .. فراگ وجهك عطشاني
حيره حيره .. بين اعوفك لو أتاني
حيره حيره .. وآنه راح امشي سبيه
_________________________________
خويه بعيوني سوالف تفتهمها
من تغمض تذبح الوادم حلمها
خله راسك عالرمح بس ابقه يمها
عالاقل ينگال وياها زلمها
هيبه هييه .. بالرمح تفتر علينه
هيبه هيبه .. راسك اشراع السفينه
هيبه هيبه .. شايله اعيونك هويه
_________________________________
حسين انته الشيبت مدري أمُنياتي
هوه مو هوه گمت أسأل خواتي
حيل متغير مثل حالي وصفاتي
ارد أسبح شيبك ابساعة صلاتي
هيه هيه .. الشيبه من طيحة گمرنه
هيه هيه .. و طيحتك كسرت ظهرنه
هيه هيه السلبوا بيها رقيه
_________________________________
گبل ساعة ودعت ليلي و عمامه
هسه اشوف الصبح متبدي اعله هامه
ادري ماترجع بعد لينه ابسلامه
آنه حسبالي بده يوم القيامه
خطوه خطوه .. الموت لبالي تراوه
خطوه خطوه .. وداعتك امشي ابرهاوه
خطوه خطوه .. لو شبح وجه المنيه
_________________________________
سحگة اسنيني المصايب والهضيمه
واگفه ابعين العطش ياخويه غيمه
ولملميت ارمادهن خيمه اعله خيمه
أقره بالقُرآن وآياته الكريمه
خويه خويه .. زينب الراحت اسيره
خويه خويه .. لكن ابهيئة اميره
خويه خويه .. وهيبة العباس بيه
_________________________________
انه ملتزمه ابوصيتك وابقراري
صير حيدر آنه أبو ذر الغفاري
حيدريه فاطميه ايظل شعاري
ياحنين اوداعتك ماتطفه ناري
ردلي ردلي .. ياعطر ذيچ المحنه
ردلي ردلي ... ظنتي اتردنه لأهلنه
ردلي ردلي .. والسوالف هاشميه
_________________________________
كلمات الشاعر ~` سيد غزوان الغالبي ~`
&
كتابةَ Zahraa Al obaidi
تحميل القصيدة او إستماع mp3 ""اضغط هنا""
رد مع اقتباس
المشاركة الأصلية كتبت بواسطة هيلــه
