هنا

[JHope]

#الرجال الي يتحكمون بحياة البنت يَحَجبوها غصب ويمنعوها من الخروج بحجة #المجتمع
يعانون من نقص, يعرفون تماماً انهم مقصرين بحقها ويعاملوها (كالجارية) او مثل الحيوانات الامريكية المدللة
لذلك اي كلمة طيبة رح تسمعها من رجل غريب رح تلين قلبها وتخليها تحبه.

الحجاب الي يريدو بعيد عن الدين تمام البعد لأن بالاسلام اكو آية (لا إكراه في الدين) والرسول دائماً يوصي بالرفق بالنساء
هم يريدون الحجاب بس حته يسكتون العالم ويكولون بتنه شريفه
مع اني متفقة تماماً انو اكو سافرات اشرف من المحجبات بمليون مرة

او يريدون حجاب حته البنت من تطلع ميتحرشون بيهه مع انو المحجبات وحتى البنات الي يلبسون عبايه ع الراس قالوا لي شخصياً انهم تعرضوا للتحرش
يعني الخلل بالشباب الي نفسياتهم ضعيفة وميكدرون يلزمون نفسهم بالشارع اضافة الى انو ماكو قانون يعاقب المتحرشين وحتى لو اكو الاهل متعصبين وميقبلون البنت تبلغ عنهم

يعني المختصر المفيد... الرجال شخصيته ضعيفه وخاضع للمجتمع وهالشغلة مو بس شغلة حجاب ولبس وانتي بنية........ لا...
كل شي بحياته يسوي.... لازم يحسب للناس الف حساب وكدام العالم ولا وميصير هيجي ومدري شنو ...
شنو رأيكم ؟
وشنو هي الحلول ؟؟!

[Mohammed K.F]

تعليق بسيط على هذا النص

الحجاب الي يريدو بعيد عن الدين تمام البعد لأن بالاسلام اكو آية (لا إكراه في الدين)

الاية المذكورة تشير الى النهي عن اكراه الاخرين وارغامهم على اعتناق دين معين، ولا علاقة لها بالحجاب.
مودتي

[بـشــــار]

هسة المشكلة وين؟؟
بالحجاب لو بشخصية الرجل؟؟
لو بالاية الي عقب عليها محمد والي هي بعيدة كل البعد عن مفهوم الطرح الي طرحته!!
خلي نجيها وحدة وحدة حتى مانشتت الافكار..
اول شي الحجاب هذا مامختص فقط بالدين الاسلامي موجود بالمسيحية واليهودية وبقية الديانات..
كل مجتمع يختلف بدرجة الالتزام بي او عدم الالتزام وبنفس المجتمع كل عائلة تلتزم بيه وفق ماتشوفه ودرجة قناعها وطبيعة المجتمع الي عايشين بي..
البعض يشوفه ستر وعفه وماممكن نكول عليهم ناس متخلفين لان كل شخص حر بما يفعله..
بعيد عن المجتمع وبعيد عن الدين اي شخص حابب يسلك سلوك او يظهر بمظهر ما اذا يحس هالشي ميسيئ له كأنسان ومابي أذية ع الأخرين فهو حر بما يفعله..
سالفة السافرة شي والمحجبة شي هالسالفة اكل الدهر منها وشرب..
التحرش ظاهرة غير اخلاقية موجودة في كل المجتمعات سواء كان المجتمع عربي او غربي..
من غير المعقول ان الكل نكول عليهم خلوقين ومحترمين الا ماتكون هناك فئة شاذة..
والشذوذ ينخلق من الفراغ الثقافي والعاطفي والتربية الي يعاني منها الفرد..
اما عن شخصية الرجل بانها ضعيفة فهذا حكم شاذ ولايمت للعقلانية بصلة..
من غير المنطق اني او انت او انتي نحكم على جنس باكمله بان ضعيف الشخصية..
كل جنس له حسناته وسيئاته
له محاسنه وعيوبه
وكل فرد مسؤول عن تصرفه واخلاقة
اذا كانوا افراد قلة عقليتهم ضحلة يعيشون بمجتمع ما من غير المنطق ان نقول عن المجتمع باكمله مجتمع ضحل!!
صح الخير يخص والشر يعم
لكن من غير المنطق نعمم الشر بطريقة غبية ونسيئ لكيان الانسان فقط لان احنا نشوف تصرف سيئ موجود بالمكان الي عايش بي..
وجزيل الشكر لوجودك بيننا

[هيثم الغراوي]

موضوع ميحتاجله نقاش. .
لأن االاجوبة واضحه