ذكرياتي بالطفوف ... يابوفاضل
رمح لو راية اشوف ... يابوفاضل
اذكر الايام والعشره الطويله
أكعد اكتب ذكرياتك ليله ليله
مالي غيرك يابوفاضل اشتكيله
والله دنيه الخلتك تنسه العقيله
كولشي لعيونك يهون .. يابوفاضل
حته لو تعمه العيون .. يابوفاضل
_________________________
امشي وي راسك يبركان الحميه
واسحك اجروح الزمن بالغاضريه
زينب اختك يابوفاضل مو سبيه
وابإسمها اتسمه تل الزينبيه
زينب وكل الخوات .. يابوفاضل
عالرمل يمشن حفاة .. يابوفاضل
_________________________
من اشوفك وردة ذبلانه ابغصنها
زينب عالنياق ايطول ونها
هذا كله وباليسر تحرس ظعنها
راسك الفوك الرماح ايحامي عنها
اشلون اعيش ابلا هواك .. يابوفاضل
انسه كلبي لو نساك .. يابوفاضل
_________________________
ثنين وثمانين اسيره واليتامه
كلهم ايلوذون بجناح الحمامه
ليلي بعدك يابوفاضل ما انامه
بالحبال امجتفه اطيور السلامه
بالدرب نمشي ونطيح .. يابوفاضل
راسك اسم الله يصيح .. يابوفاضل
_________________________
زينب وكل الخوات املوعيها
والمحامل تمشي وتعاين عليها
طفله من توكع رمح راسك يجيها
عدل ميت يابوفاضل تحدي بيها
يمشي ويانه العليل .. يابوفاضل
وانته بظعونك كفيل .. يابوفاضل
______________________
امشي روح ابلا جسد يمك شفتني
من متت وياك بالطف موتتني
حيرة بالطف يابوفاضل حيرتني
اعثر وانخاك والسوط اعله متني
مايمر بعيوني خوف .. يابوفاضل
اني اشعر بالجفوف .. يابوفاضل
______________________
راسك اعله الرمح رتل آية آية
من مشت وياك قافلة السباية
وين اروحن وآنه صبري ابلا نهاية
امشي وي روس اخوتي الكلهم ضحايه
تدري قلب اختك حنين .. يابوفاضل
مثل قلب ام البنين .. يابوفاضل
______________________
كلمات الشاعر ~ علي الخفاجي
______________________
Mp3
رد مع اقتباس