صورة الغالي .. ضلت ابالي .. امانه
سافرت عنهم .. گلبي ظل يمهم .. امانه
گلبي يتمزگ صحيفة ابوگت الغروب
اشلون يحمل هالمصيبة هوه مصيوب
فارگتهم والمدامع طول الدروب
لو صخر گلبي يخويه لازم ايذوب
بشيلتي السوده .. خوه موجوده .. امانه
عقلي ضل شايل .. احچاية الكافل .. امانه
__________________________
ماتصير الدنيه دنيه ابلايه اخوان
ضايعه مثل الكتاب ابلايه عنوان
چانو اليحمون خدري ليوث الاكوان
هسه يتفرج عليه كان ماكان
انكسر ظهري .. والبقه ستري .. امانه
من ابو اليمه .. قطره من دمه .. امانه
______________________
انه سهرانه ليالي والدرب نام
شلون تغمض عين بيها نار الخيام
هالله هالله اني زينب وامشي للشام
والحبل بچفوفي ياكل حته العظام
نظرة الظامي .. تبقه گدامي .. امانه
من يوصيني .. گتله ياعيني .. امانه
_______________________
يارقيه عمه ون الليل مسموع
انه من گطع التراچي گلبي مگطوع
لاتـنظرين العزيز الراسه مرفوع
باوعي ابوجهي وحچينه ادموع بدموع
يالعزيزه انتي .. باقيه ابذمتي .. امانه
باوعي الحالي .. عافچ الوالي .. امانه
______________________
چنه واحد يم الاخر واحنه نشتاگ
هسه مدري شلون صارت ابنصنه الفراگ
ماتطفي ادموع عيني نار الاشواگ
اه من صفعات وگتي صارن الحاگ
اخذوا اعيوني .. ظلت امتوني .. امانه
ابصدري المكسر .. ظلت الخدر ... امانه
____________________
گوه خليت الأحبه والظعن شال
يعني عفت الورد جثه ابين الرمال
ساعه مثل الجبل چني ابچي شلال
ساعه لني غيوم ميته اگبال العيال
صاحت احلامي .. ظلت ايتامي .. امانه
من عهد جدي .. والحزن عندي .. امانه
_____________________
كلمات الشاعر - سيد تراب الموسوي
رد مع اقتباس
المشاركة الأصلية كتبت بواسطة ضياء المالكي
