كلمات قصيدة هاي شايفها واعرفها (مكتوبة كتابة) باسم الكربلائي - ليلة 17 محرم 1440 - 2018
هاي .. شايفها واعرفها .. تشبه للزچيه
هاي .. مهيوبه مصيوبه .. مگيوده سبيه
هاي .. زينب ياغياره .. زينب ياغياره
للسبي خذني خيالي حته اكتب هالروايه
لني بالكوفه واباوع من اجه ظعن السبايه
والظعن قرآن يمشي وكل يتيم اتشوفه آيه
زينب الكعبه اعله ناگه كعبه بس ابلا حمايه
وين .. فارسها حارسها .. معقوله تأخر
وين .. ماشفته يم اخته .. گالولي تعذر
وين .. عباس وفقاره .. عباس وفقاره
_______________________
هاذي مومعقوله زينب والزمان اشسوه بيها
اتأكدت هيه العقيله من بديت اسمع حچيها
والحبل احمر أشوفه ضعفت وترجف اديها
والكفيل ابعين وحده لكن امركز عليها
شاف .. حاديها ماذيها .. والغالي تشتم
شاف .. حسراتي دمعاتي .. من عينه نزل دم
شاف .. زينب بإنتظاره ... زينب بإنتظاره
_______________________
طلعت الكوفه ابأسرها كلها تنشد وين أهلها
جابوا الحره ابوسطهم حته كلها اتباوع الها
هيه لو مو هيه سألوا هوايه متغير شكلها
كلمن ايباوعها يسأل وينه عباس الكفلها
ليش .. وحدها ماعدها .. اخوه ولاگرايب
ليش ... عافوها خلوها .. فرجه للأجانب
ليش .. تحچي بالإشاره .. تحچي بالإشاره
_______________________
من شفت خسة حرسهه استغربت ما ميته لسه
والظعن لو ردت اوصفه چـالـسفينه ابلايه مرسه
يابشر حد الله هذا لا تگربه ولا تلمسه
وسفه هالخدر الإلهي صار إبن جوشن يـحرسه
حيف .. سلبوهن جابوهن .. وبلايه هوادج
حيف .. تتأسر هالخدر .. سموهن خوارج
حيف .. تاليهن يساره .. تاليهن يساره
_______________________
من تميل الروس مالت من تون يخجل دهرها
صعبه يتحرك متنها لازك الثوب ابظهرها
من عمت عينه اليباوع واليقلل من قدرها
غيرة الكافل شفتها ثارت ابصفنة خدرها
اه .. تاليها يحديها .. شايل راس اخوها
اه .. والكلفه ياوسفه .. زينب ضيعوها
اه .. ياقصر الإماره .. ياقصر الإماره
_______________________
بس عليل ابهالظعينه واليتامه والثواكل
يعني وجه الله ابعظمته بالظعن وايقوده جاهل
والله مدري اشلون صابر عالرمح راسك يكافل
زينب ابهالكلمه تلهج يابوفاضل يابوفاضل
راح . والينه حامينه .. كلمه وبيها تلهج
راح .. كفالي والغالي .. يالشامت ا
تفرج
راح .. والباقي اعتذاره .. والباقي اعتذاره
_______________________
تنظر العبدالله راسه بالسهم مو بالعوالي
للرباب انطت وجها وعاينت حضن أمه خالي
سمعت الظالم يسبها وينظر اعليها ابتعالي
سبحت تسبيحة امها وصدت الروس الغوالي
صاح .. حادبها سابيها .. جبت الكم اسيره
صاح .. شتموها وارموها .. ماعدها عشيره
صاح .. يحچيها ابجساره .. يحجيها ابجساره
_______________________
لا خيال ولاحقيقه صعبه يتوصف حزنها
منهي بالنسوان تركض عالأخو وتترك ابنها
حته ناگتها غريبه يبست الدمعة ابجفنها
حذره من تمشي وقصدها حته ماتلچم متنها
نوگ .. من يمشن يتحاشن .. توگع هاشميه
نوگ .. عرفنهن حشمنهن .. اشرف من أميه
نوگ .. حسن بالمراره .. حسن بالمراره
_______________________
كلمات الشاعر ~` السيـد عبــدالخـالـق المـحنـة `~
_______________________
كــتابةة `~ Zahraa Al obaidi
لتحميـل القصيدة mp3 اضغط هنا
رد مع اقتباس
المشاركة الأصلية كتبت بواسطة سمراء من قوم عيسى
