كلمات قصيدة ليش هيج تغيرت مكتوبة كتابة - باسم الكربلائي
ليش هيج اتغيرت * انته مو انته صرت
ماتحاچيني متت * من سكوتك
علمتني الدنيه چذبه والهوه عابر سبيل
ماكو شي بين الأخو والآخت إسمه المستحيل
منين ماعاين الوجهك ألگه بي دمك يـسيل
رغم هذا لوطحت من الهـزل راسك يميل
طولك ابطول الرمح * چم جرح كلك جرح
منذبح وآنه أنذبح * من سكوتك
______________
ليش هيج اتغيرت * انته مو انته صرت
ماتحاچيني متت * من سكوتك
______________
راسك بحضني وضعته خويه ارجوك السماح
هوايه ضيم ابگلبي خويه ارد اسولف واستراح
صعد منبر جدي شامت وأذن اعليه جراح
افلح اليضرب متنها ألف حي اعله الفلاح
اشهدُ أن علي * ماحضر واستحملي
قاتلك هم قاتلي * من سكوتك
______________
ليش هيج اتغيرت * انته مو انته صرت
ماتحاجيني متت * من سكوتك
______________
راح اجيب الماي واقره عالشفاه الذابلات
من عساها ابخت ماي العلگمي وماي الفرات
الحجر صوب جبهتك خويه ابأثر ترب صلاة
ما ألومه الحجر حقه منيله مثلي خوات
مثلي هم شايف مره * اتبوس اخوها ابمنحره
خيره اخذت محيره * من سكوتك
______________
ليش هيج اتغيرت * انته مو انته صرت
ماتحاچيني متت * من سكوتك
______________
زغار جنه وواعدتني وصحت موقسمه ونصيب
وگـتلي ولعباس ماعوفچ واظل يمج قريب
الموت مو گـطعة انفاس الموت من يرحل حبيب
الله لاينطي الصحاري وشيبـك اتسوي تريب
مسومر بحر الظهر * فاتح اعيونك حمر
من ترابات اليسر * من سكوتك
______________
ليش هيج اتغيرت * انته مو انته صرت
ماتحاچيني متت * من سكوتك
______________
انته ماموجود خويه حين حرگوهه الخيام
ليش اكو ارماد اعله وجهك خويه وضحلي المرام
ابأسفل التنور أسمع نزلوا راس الإمام
نام بحضان الحطب من چان بحضاني ينام
خويه شافوا فاطمه * تلطم وتبجي دمه
الزهره أول لاطمه * من سكوتك
______________
ليش هيج اتغيرت * انته مو انته صرت
ماتحاچيني متت * من سكوتك
______________
بعد فتره وراح ارجعك للجسم بالأربعين
جنهه مو أيام خويه عدت ابزينب سنين
قبل لاتعتذر آنه اعتذر لك يالحنين
بس اسألك لمن أرجع شأرد أگل لأم البنين
هاي أمنه الثانيه * شكثر تدري امتانيه
ثانيه اتعد ثانيه * من سكوتك
______________
ليش هيج اتغيرت * انته مو انته صرت
ماتحاچيني متت * من سكوتك
______________
كلمات الشاعر | حمزة السماوي
_____________
رد مع اقتباس
المشاركة الأصلية كتبت بواسطة ضياء المالكي
