عد بابك ألليله اجت يا علي
عد بابك ألليله اجت يا علي
محتارة ودموع الحزن تندلي
المن بعد عينك تصد يالولي
راح الحنين أتنادي وشظل إلي
تتعذب ألمصابك .. ولتمت أعله بابك
رفعت أديها وتندعي جرحك يطيب
******************
يا علي كل واحد ندب وأنتحب
وبعينه جرحك يا بو زينب خضب
كلمن عليه همّه أعله فگدك غلب
ومن علكم الدنيا وغدرها شرب
وب أصعب المشاهد .. واحد يواسي واحد
رفعت أديها وتندعي جرحك يطيب
******************
ما با رحّت دارك لحّد الزوال
ملهوفة كل لحظه وتعيد السؤال
حالة ذهول امن الصبح لا تزال
لا بيها روح ولا سكّن عدها بال
حر الشمس صدعها .. وما ينوصف وضعها
رفعت أديها وتندعي جرحك يطيب
******************
يا رب محمد والكليم ويسوع
كون الجرح يبره ويهيد اليلوع
ياصاحب السبعه سفوح وربوع
هوه اليتيم اشعنده غير الدموع
أنذور إلك نذرنه .. ولعمره من عمرنه
رفعت أديها وتندعي جرحك يطيب
******************
ما بين أدين الدنية والنا يبات
حكم الدهر جرّعها مُر الحياة
قطعة خبز چانت بدينك نجاة
تتگوه بيها وتلوي چف الهنات
مجره الدمع تكلم .. عن كل گلب مُتيم
رفعت أديها وتندعي جرحك يطيب
******************
كل طيره لو مره جنحها انكسر
يبعد عليها يا علي المستقر
بيد النوايب تصفه ويد الدهر
وبغابه تركض والظلام انتشر
بيد الخطر أسيره .. وين الوجه تديره
رفعت أديها وتندعي جرحك يطيب
أبو إيمان المجراوي
رد مع اقتباس