لِم دربهم......
بعد شمتاني يگلبي...........؟
الليله وحشه......
الليله شدّينه الرحال.....
ولاتناطر چف يعِتَّك...
هاذه صوت الريح يدوي...
اشتلتفت........؟ مامش تعال .....!!!
لِم دربهم....صار ليل
وغيّمت غيض السمه وأذّن بلال
اتيمم ابجرحك ندامه...
وگوم صللّي
الفرگه ( واجب)... والهجر صاير( حلال)
لم دربهم........!!
وطوي سالوفة عشگهم..........!!
جلمة .... جلمة
وصفحة ..... صفحة
اشلون من تطوي الاحبال.......
لا يگلبي.....؟
وهمّه گالو صرنه غربه......!!!
وبعد لاتنشد عليهم...
فشله ع الغربه السؤال.....!!!
اتيتمت بوّل عشگهم......
ونته من زغرك يتيم..اشعوّداك اعله الدلال..؟
ماني گتلك.........!!!.
لاتظل سعفه ابهواهم
تگظي عمرك خوصه بحضان السِلال...!!
ولاتخلي الندم عاهه...
عاهة المكسور تشفه...وعاهة اليندم محال..
العشب مات...وطبعي بدوي..
اشما يشِحّ العِشِب شال...
لم دربهم...
(نارهم تاكل حطبهم...)
خلهم ابشرجي هواهم...
ونطي وجهك للشمال......
الليله وحشه....
الليله شدّينه الرحال...
رد مع اقتباس