واقع مخيف جدا ومستقبل مجهول ??
احنه ما عدنه بخت كثره الذنوب
الهل سبب يلمهدي ربك عطلك
لو نعشگك من صدگ چا ما بطيت
بس شفتنه اهواي ما نستاهلك
كوفه وادمنه وعلي ما بيهه امان
خاف تقبل ? سيدي وتخونك
لا تدزلهم بعد واحد سفير
طوعه مامش هل تشوف عيونك
خاف تگبل والسهم يثلم گفاك
عشره بالميه الصدگ يردونك
والبقيه اقوال ما بيهم غيور
يمكن ابنص دفتر ايبيعونك
وانته تعلم بالبشر علم اليقين
والدليل ابكربله ذبحو هلك
ندعي الله ايعجل ابنورك اكيد
باللسان ولو تشوف اگلوبنه
اسود امن الليل صارت بالنفاق
بالمجالس نلبس اسود ثوبنه
ناكل بلحم البشر ننهش گفاه
واحنه نعرفهه چثيره اذنوبنه
اليغلط ابحقنه نطلعه امن اليهود
وندعي ربك يغفرلنه اذنوبنه
ومن نطيح ابشده نركض للحسين
انگله يبن الزهره اجيت اتوسلك
السائل اليجبل علينه ايمدله ايد
تگول متعارك گبل لو سابنه
گبل نحچيهه ابوجه مابي ظواك
الله ينطيك ونسد ابوابنه
ومن نخاف امن الله ونراعي الظروف
انشوف شنهو الزايد امن اثيابنه
مو جديد وداعت الحل والحرام
ونسئل الله ايخفف النه اذنوبنه
مات اسم انسان بينه امن الطفوف
ذاك من ذاك الحنين الهد الك
ذره من خلق الحسن ما عدنه لا ?
نگلب الدنيه اعله مود احچايه
ننسه قدره ربك بهذا الوجود
ومن نصاحب لازم اعله الغايه
العاقل اليزرع ورد حد الطريق
وانه نشمر ع الدرب سلايه
حته يسحگهه اليتيم بلايه شوف
ونگعد انصفط عليه چم ايه
هذا من ربك اجاك الاختبار
حته بالفردوس هوه ايدللك
شرد اسولفلك يمهدي وكلهه ظيم
وانته تعرف من اساس المشكله
المايل انعدله گبل هذا الصحيح
هسه نركظ للعدل ونميله
كلهه تاهت والستر اعلن حداد
التمشي بدروب العواج امدلله
هاي چم مره الزلازل بالعراق
ربك ايحذر يطگنه ابزلزله
واحنه مرتاحين كلش،ع السبات
ومن نظوج انگوم عود انصد الك
فاضل الغريباوي
رد مع اقتباس
