يا نسمة شمال . الاكبر
گبل لا يگبل عطر عذري اشمه
ينشرح خاطري من اتمرني نسمه
ومن اسمعه بصوته ينده يمه يمه
روحي تهجرني وتهيم تروح يمه
عمري سنيني وكل شي . حبيبي
گلبي وعيني ورمشي . حبيبي
يا زين الخصال . يا نسمة شمال . الاكبر
***************
داخل الخيمه دعيت الله بحبيبه
توسليته ودعوتي دعوة غريبه
يا الاهي اترده سالم من مغيبه
لو رحل ماله مثيل منين اجيبه
ليله تخاطب الباري . الاهي
يرجع تنطفي ناري . الاهي
ويعود الوصال . يا نسمة شمال . الاكبر
***************
والله لو يرجع زماني بالف شهگه
اركض التربان جدمه الي تسحگه
وين ما يوصل الاكبر والله الّحگه
عالارض ارسم خياله وحيل اشبگه
ابني وشمعة اسنيني . بغيابه
منهو الي يسليني . بغيابه
صعبات الليال . يا نسمة شمال . الاكبر
***************
لسه بلساني عذوبة حرف اسمه
ما نسيته وعيني مافارگت رسمه
علي كل ساعه اصيحن چني يمه
سخّرت وجداني اله من صاح يمه
لسه بداخلي يبني . اسمعه
صوتك بعده يندبني . اسمعه
عايش لا يزال . يا نسمة شمال . الاكبر
***************
ودعيتك وعرفت خلصت حياتي
وذرّة احلامي الرياح وامنياتي
يبني غير محبتك ما سكن ذاتي
حاضر اتمنيتك أبساعة وفاتي
يبني الدنيه خلصانه . بوداعك
كلشي ما حسبته انه . بوداعك
انساكم محال . يا نسمة شمال . الاكبر
***************
سرمدي بعدك يظل هذا عذابي
واجرع افراگك الم مر بشرابي
يبني يالغايب اريد اترد جوابي
من اصيحن ياعلي وتسمع خطابي
گلبي فاضت اشواگه . الحظورك
روحي تبقى مشتاگه . الحظورك
انه امك تعال . يا نسمة شمال . الاكبر
الشاعر ابو ايمان المجراوي
رد مع اقتباس
