ما يهم يبن الزچيه لو نفذ مني العمر ، شعر حسيني
بويه راح ابقى بحنيني امتانيه . احسب الايام لحظه وثانيه
وانتظاري ابلا حدود . انتظر لمن تعود
راح اخاوي اسنين عمري وافتح ابواب الصبر
واگعد بدرب المشيته واسئل اعليك اليمر
لوعمر نوح انه عمري بويه الك ابقى انتظر
وما يهم يبن الزچيه لو نفذ مني العمر
لهفة العاشگ لظل ملهوفه . عيني يا ساعه حبيبي اتشوفه
ما شفت منك صدود . انتظر لمن تعود
******************
راح اعلم الساني چلمه من افز من الصبح
الي ترجع بالسلامه وعسى گلبي ينشرح
ما امل طعم انتظارك لوغفيت اعله الجرح
وابقى كل يوم بكياني بويه الك ابني صرح
بالسلام اتعود اعوّد الساني . واروي من نبع الامل وجداني
علمتني اعله الصمود . انتظر لمن تعود
******************
بويه كل يوم انه اشوفك ما غبت عن النظر
ساعه اشوفك في خيالي ساعه اشوفك بالگمر
بويه من اهجع واغمّض عيني تمليها الصور
ما هجرت افكاري مرّه يا حبيبي المنتظر
صاحبت نومتي وكل صحواتي . ما نسيتك مره ساكن ذاتي
دمعي يكتب عالخدود . انتظر لمن تعود
******************
سارح البال واخذني العالم اسمه الذكريات
اگبالي خله اسنين عمري المرت باجمل حياة
انه وانته اتمر ليالي وعلى ايدك چنت ابات
ومن تصحيني اعلى كيفك اتگلي يا احله البنات
ما اشوفك بويه اصيحن وينك . وين ما امشي تصد لي بعينك
عندي نظراتك ردود . انتظر لمن تعود
******************
بالمكان الچنه نگعد بويه صرت اتخيلك
اسمعك فاطمه اتنادي وصوتك احساسي ملك
بويه ها شتريد اگولن واركض بلهفه الك
بعمري يالغالي فديتك وحشه بعدك منزلك
صوتك الهسه بقى باسماعي . يالعليله اتحظري لوداعي
باچر الحادي يحود . انتظر لمن تعود
******************
يا دهر شلّك علينه بالله متگلي شلك
چم عزيزالي اخذته گلبي من همك هلك
للحزن واللوعه گوطر خاطري بكسره سلك
وبرحا دنياي ادورن دورة اجرام الفلك
وحدي بالدار انتظر احبابي . يا ترى يا ساعه يندگ بابي
تنكسر كل القيود . انتظر لمن تعود
الشاعر ابو ايمان المجراوي
رد مع اقتباس
