هنا

[أكرم.]

كلمات كعدية + استماع + مشاهدة + تحميل
اداها الرادود المبدع الملا علي يوسف الكربلائي
في الحوزة الزينبية
من كلمات الشاعر
عبد الرسول الخفاجي
**********************
المستهل
غبت عني ودنيتي وحشة بلياك
لو نسيت امك عليها صعب فركاك
جيت اهز مهدك واناغيلك والولي .. يالرباب المهد خالي يكَلولي
أنسى روحي ومهجتي وما اكَدر أنساك
-------------------------------------
نايمه وفزيت يبني
وجيتك بلهفة حنيني
لني حلمانه كرب
وكت الرضاعة وتناديني
وهمت وي نغمات صوتك
والنغيط اليناغيني
بحلوة النومة اعتنيت
وعالمهد صديت عيني
لن شفت مهدك خالي يوحش يبني
كَلت الدهر بأول سهم صوبني
خله بدليلي النايبه تعذبني
بعدك كَصه بيه الوكت شيبني
در حليبك عالصدر جيف الوكت فات
عالرضاعة ومرت اعله الوكت ساعات
خايفه يبني رحت عني وعفتني
ولو نويت تروح شوما ودعتني
انسى روحي ومهجتي وما اكَدر انساك
------------------------------------
طفح مي عيني وتبده
يبني والماي شيلمه
ولو توشل العين ميهه
ماتضل اتشوف تعمه
وانه دوهني زماني
بفركَتك والله يا يمه
راح حيلي وروحي راحت
من جسمهه ومالي همه
هديت حيلي وذوبتني بفركَاك
فتيت كَلبي وراحت الروح وياك
مولحت عيني وانطفت من جدواك
ياماي عيني الي طفح وين الكَاك
اخذ روحي الهايمه تتوسد وياك
عالكَرب يمك تريد شلون تسلاك
عايشه بلياك بالدنيه غريبه
والكَلب يسعر ولا يطفه لهيبه
انسى روحي ومهجتي وما اكدر انساك
-------------------
امسيت مهضومه اعله فكَدك
والنوايح ترثي حالي
منين ما اصد بالعيون
ولن شبح يخطف كَبالي
ايعتني ويهددني بيك
يكَلي راح الجان غالي
تغمى روحي واصحيهه
وانجفي ابعثرت ذيالي
هم انتظر يوم وعلي يبني اتعود
وافرح بدنياتي وترد ليه اردود
واعلكَـ شموع الفرح وايخضر العود
والكَلب يستر بيك والروح اتهود
لاجت الدمعه ابجفنهه وخنكَت الروح
وعبرتي ضاكَت ابصدري ومنهه مجروح
راح تعبي وسهر كل ذيج الليالي
ضيعتني كربلا وغيرت حالي
انسى روحي ومهجتي وما اكَدر أنساك
---------------------------------------
اضل اندب يعبد الله
وريتك لصوتي تسمعه
جنت احسب يبني شاب
تصير تضوي بليلي شمعه
ولوهضمني الوكت تنغر
علي وتنشف الدمعه
مادريت بكربلا تنساني
ولكَلبي تفجعه
يا ضوه العين وشلي بعدك بالعين..
يا سلوتي ويا ثمر دلال حسين...
عني رحت الكَاك يوليدي وين؟
ومنين أجيب الصبر دليني منين؟؟
جنت اكَضي ليلتي بكترك واناغيك
ولو كَضه ليلي وصبح كَدامي الاكَيك
النايبه بعدك يعبد الله دهتني
والمصايب عكَب عينك دوهنتني
انسى روحي ومهجتي وما أكَدر انساك
-------------------------------------
ما خذت من خاطر امك
من رحت ماودعتهه
ولا كَلت ودعتج الله
ابكسرة الخاطر عفتهه
وما خفت سهم النوايب
من بعد عينك يفتهه
واضن كَلبك ينكسر
يوليدي حالي لو شفتهه
تمور الجبال الراسيه لونتهه
وتميد بيهه الكَاع لو سمعتها
تذوب الصخور الجامده لوحشتهه
ضلت وحيده وحايره لغربتهه
جنت اضمك بالكَلب وبجبدي اغطيك
واصد نسمت الهوى خاف انها تاذيك
بعده ثغرك مالحكَـ ينطق الجلمه
رحت عني وحتى ما كَتلي يا يمه
انسى روحي ومهجتي وما اكَدر انساك
-------------------------------------
يا ثمر كَلبي ونبعته
ويا سهد عيني ووسنهه
ضلت امك عكَب عينك
هايمه وساهر جفنهه
وماكَلت خافنها تضمه
وعلى افراكَي يجف لبنهه
وفرشت هموم النوايب
ونامت وغطاهه ونهه
خليت عين امك تهل دمع ودم
فرشت مصايبهه وتغطت بالهم
تسحن صبرهه وبالنوايب تلهم
وتجوح ابلوعاتها وتتالم
فاركَتني وعلي مرت سود الايام
شابحه عيوني واضل سهرانه ما انام
يا هو يجبر خاطري المكسور يبني
والدهر خلاني محتاره وضهدني!!
انسى روحي ومهجتي وما اكَدر انساك
------------------------------------
للتحميل
تنزيل (28.1 MB)
للمشاهدة
من هنا
للاستماع

[صفاء العامري]

أحسنت حاج

[Asinat]

سلامة قلبك الف سلامة أخي العزيز : " إن لله ما أخذ وله ما أعطى وكل شيء عنده بأجل مسمى فلتصبر ولتحتسب" ... ...

[أكرم.]

أحسنت حاج

سلامة قلبك الف سلامة أخي العزيز : " إن لله ما أخذ وله ما أعطى وكل شيء عنده بأجل مسمى فلتصبر ولتحتسب" ... ...

تسلمون الغالين
نصبر والله كريم
نورتوا