زلم ربّــــــت أربعه أم الكمر ، شعر حسيني ل ام البنين
زلم ربّــــــت أربعه أم الكمر
ونذر نذرتهم لجل أبن الغرر
أوّفته لنذرها ** بكل ثمر عمرها
تختلف عـــــــن النساء الطاهــــــــره أم البنين
كلهــا أحســاس ومحنّه
وكلـــب ينبض بالحنين
والأيثــــار اللـي تملكه
حيّــــــر الناس أجمعين
ضحّت بكل اللي عدها
لجل مـــــولاها الحسين
لو ألف عــــدها ولد تفدي الألف
مو مدح هذه حقيقة ومو وصف
ونصرته الذخرها
بكل ثمر عمرها
مــن إجت بيت الأمامه
خادمـــــه طلبت تصير
لكل ولـد فاطمة الزهره
وربطت وياها المصير
تعلم الحـــــــره بقدرهم
تعلم بخدمــــــــة الأمير
شـــأن إلها يصير عالي
تصير بــــاب اليستجير
باب حاجه صارت الكل البشر
ولطرقها البابهــا يجني الثمر
وتكرمه لذكرها
بكل ثمر عمرها
تعبت وسهــــرت ليالي
وأنجبت أربــــع شباب
وبرباهــــــــــم علّمتهم
عالشــــداد وعالصعاب
حب أبو الأكبر درسهم
يــم علي داحي الأبواب
وصار هــــوّ كل أملهم
تفكده لــــو لحظه غاب
بالعزيز وغالــــــــي يتْفَدّونه
ولحظه ما تكدر تعيش بدونه
بكربله نصرها
بكل ثمر عمرها
أربعه يحيـــــر بوصفهم
كــل لسان وكـــــل قلم
يقصّر الشاعـــر بوصفه
ومــا يصفها شما رسم
ويعجز اللي يروي عنها
حتى لـــو صاحب علم
جبل واحدهــــــم أوصفه
شحدنـــه نوصل للقمم
ما يصل حدهــــم لون شاعر نظم
يتيه بين نجـــومها وراعي العلم
وما يصل دررها
بكل ثمر عمرها
بيهم توصّــــــي العفيفة
من مِشَوْ عــن الوطن
صابـره ومحتسبه تنخه
بالكمر حادي الضعن
تكلّــــه أنت يابو فاضل
للضعــن صير الأمن
خلّي زينب وسط عينك
واطبـــك عليها الجفن
يبني زينب غاليه وضنوة علي
همومها بيديك أريــــدن تنجلي
وتحرسه الخدرها
بكل ثمر عمرها
قرينـــه بالتاريخ وكفه
مـــا تصح بأي زمن
لبو فاضــــل والأخوته
بالشدد وكــت المحن
وي أبـــو اليمّه أخوهم
ضَحَّوْ بــــأعظم ثمن
والخلود تسجّــــل إلهم
وسِــكْــنَـوْ بجنة عدن
جوار أبوهم علي حمّاي الحمه
وإلهم تجازي بحشرهـم فاطمه
بالحشر تسرها
بكل ثمر عمرها
يــــا إلاهــي أرد أنشدك
هــــــل مسه بأم البنين
وجاه عباس أبــو الغيره
وكل ولـدها المخلصين
تعجّل بطلعــــــة الغايب
أبن سيــــــد المرسلين
وأنهي كل همّه وغربته
يــــــــــــا إلاه العالمين
ربي عجّل طلعته الأبــن الحسن
خلّه يحيي نهــــج دينه والسنن
تنتظر فخرها
بكل ثمر عمرها
قاسم حتروش البلداوي
رد مع اقتباس
