يا گمر توّه اكتمل .. مو إلك هذا الزعل
عوّدت عيني عليك . بعمري يالغالي أشتريك
*************
وين رايح يا حبيبي لبقى من بعدك أصيـــــــح
يمته ترجع لي وأشوفك حتى من همي أستريح
طيري انته بگلبي عشك لا تطير أبمهب ريــح
دنيتك صارت عواصف والزوابع من صفيــح
يا أبو جناح الترف . مو وكت دم ونزف
عيني مشبوحه ألسعيك . بعمري يالغالي أشتريك
*************
لسه عيني الأثر جدمك تربي والمدمع يسيح
چني مريم وانته چنك سيدي عيسى المسيـح
يبني ما أريدن أمدحك هسه مو ساعة مديـح
لا كن انته بعيني دنيه شلون اشو فنّك ذبيـح
من شفت دمك نبع . گلبي شريانه انكطع
نفسي طاحت بين أديك . بعمري يالغالي أشتريك
*************
يبني ليهسه رسومك تملي جدران الخيــال
انته لوحة عمري كله أملونه بلون الـــدلال
ما يبارح فكري ساعه طولك وذاك الجمال
ما نسيتك هذا گلبي ينسه أحبابه محـــــــال
ذاخره أبالي كنز . نور أشوفك من أفز
وين ما ترحل اجيك . بعمري يالغالي أشتريك
*************
عيني من لحظة وداعك ما شفت بيها الضـــوه
والهوه ألما بيه عطرك ما احسبنه هـــــــــــــوه
بحضرتك يمه أرد اسولف همي مو گلبه أنكـوه
وجهي شاحب گوم شوفه وخدي من دمعي روه
يبني كل عمري أشيفيد . لو رحت عني بعيد
كل أمل علگته بيك . بعمري يالغالي أشتريك
*************
الدنيه مو دنيه بدونك والحياة إبلا حيــــــــاة
والعمر شنهو لزومه لو يخلص ذكريـــــــات
مُر وداعك يبني ضكته وطعمه بالساني يبات
ولا سبيل الظل أليه خاصمتني الأمنيـــــــات
صفحة أحلامي انطوت . شمعة ابني ما ضوت
عندي ما ضل بس نعيك . بعمري يالغالي أشتريك
*************
رد مع اقتباس
