يبني خليني أشمك . لهفتي الصدري أضمك
عجلت ساعة وفاتي . من غبت غابت حياتي
************
چلمة اليمه يالاكبر المن احچيها بعد
وانه متعود لساني من اهزك بالمهد
يامه يامه رددتها وأبقى اردد للأبد
يمه لمن تغفه عيني والله منطيتك عهد
يمه يا يمه وغلاتك . انته بعيوني اشحلاتك
چنت أغطيك بعباتي . من غبت غابت حياتي
************
يا حلاته بروحي اسمك من اناديلك علي
روحي لجدامك رهينه فدوه ونذور وهلي
بگلب مجروح أرد اسولف والهموم بداخلي
من بعد ما چان يضوي اظلم أصبح منزلي
غابت أنوار الثريه . وانه بس افرك بديه
وحدي عافوني ولاتي . من غبت غابت حياتي
************
طولك الهسه أعله بالي يبني من تگبل چنت
چني أشوفك يمي حاضر ما اصدگها متت
المن مسافر يغالي وشعجب مني رحت
ما سمعت أوداع منك ليش يالاكبر غبت
وحدي بالخيمة واناطر . ترجع أتجبر الخواطر
بددت كل أمنياتي . من غبت غابت حياتي
************
يا ألاهي أترده سالم هاذي چانت دعوتي
ظافر بخصمه يعاود من يطب ألخيمتي
گتله يا ربي غريبة وانته ترحم غربتي
يبني غاب الوعي مني غمضيت بدمعتي
وانته عينك شاهدتني . وأعله راسي قبلتني
وشكثر عندك غلاتي . من غبت غابت حياتي
************
عگلي جن إبلا وجودك وانتظر تالي العمر
خلصت أيامي بحنيني وبالگلب ازرع صبر
أمنية روحي وفؤادي ادخل آوياك الكبر
عيني أخليها أعله عينك واشتم بذاك العطر
والله مشتاگه يالاكبر . گلبي من شوگي تفطر
ما بقت بس ذكرياتي . من غبت غابت حياتي
************
رد مع اقتباس
