بسمِ الحْسين وبسِم هذا الكيان
هوّه مصحف والثأُر بَسْمَلْتَه
هاي إسمَك صرخةِ الرُعب المُهاب
من ضريحك چم عرِش طيحته؟
يا حسين وهالنداء امحال ايموت
هذا من گَطْع النحَر خلّدته
إنتَ بوي وماتمك روّاني باس
وكل شِعارك داخلي رددته
مولدك دمعة ومماتك إنتصار
حتى قانون الفرح غيرته؟
ثورة إنتَ مو مبادئها السلاح
العالم ابموقف إلك أقنعته
وحدك وسبعين بس جولك جنود
وهسّه كل الكون لك جندته
ومن صرخت بحيره وحدك بالطفوف
الصخر حتى الصخر سمّعته
بيك حيدر منغرِس .. بيكِ البتول
بيك طه الورثّك مدرسته
إنته فكرة وابتكار الله العظيم
العدو ويّه المحب جنّنته
يا حوار وربّك الألّفه جان
واخرجه التاريخ من مثّلته
كربله بيها مشاهد يا حسين
وانتَ كل مشهد لك اتسيدته
تنذكر مو يوم .. لا .. كلّ الدهور
شوف چم ماتم إلك شيدته
وتبقى صوت اتنادي بحروفه الشعوب
وكل وطن محتل غصُب .. حرّرته
وآنا عشتك قصة ماليها ختام
إي أحبّك حُب أبد ما خنته
أختنگ والهم يوصّل للرئاة
وترجع انفاسي إذاْ اسمك گلته
إنتَ حشر الله في يوم الحساب
انت ناره يا حسين وجنته
إنتَ باب الجنه حگ العاشگين
للأبد مفتوح ما قفّلته
تبخل اعلى الناس إنتَ؟مستحيل
إنته طفلك للسهم قدّمته
إنتَ من تحچي العرِش يصغي ابخشوع
وصوت هيهاتك لحن أنشدته
بكل مكان ألگاك شعلة امنِ الإباء
يا مكان اتكون بيه طهّرته
محتضر الإسلام گبلك يا حسين
وجيت بالدم سيدي وانعشته
استفزاك الشمِر..داسك صحيح
وانتَ بالتاريخ نصرًا دسته
مؤمن انّك ما ترد كل من اجاك
واليجيلك تعرف ابسالفته
الكرامات ابضريحك واضحات
شِفِت منشل جالك ووگفته
شفِت واحد طالب الذرية .. جاك
وجاك ثاني العام حامل بنته
شِفِت أخرس راد اينادي ياحسين
ومن وصَل يم الگبر نطگته
مو غريبه معجزاتك يا حسين
وانتَ قرآن ابرمح رتلته
حتى من جيتك وانا بلايه قصيد
شعري هاي انته الذي ألّفته
إنتَ وانتَ وانتَ كل حاجة تكون
كل مجِد بالكون جيت ونلته
يشهد التاريخ إنّك باقي دوم
شوف وين ايزيد ووينك انته
.......
الشاعر خليل آل إسماعيل
محرم 1440
رد مع اقتباس
