جيتك يشيال العلم حاچيني حاچيني
ما عِين آنه اچدامي گمت تدريني
گابلت الچفوف وبچيت اسنيني اسنيني
جيتك نهر عطشان گوم ارويني
يالوجهك ابلون الگمر ما تحله يمك نجمه
محراب صدرك ياوفي وصلى الفرات ابجسمه
عباس مثلك ماشفت يجري الحنان ابدمه
واتگلي خويه اشگد ردت اسمعها هاي الچلمه
ياسلوة العين .. تره حسين .. ايموت ابدونك
عنوان الاحساس .. يعباس . شفت بعيونك
ترحل اشلون .. وانته شمعة ليلي
سولف وياي .. وعن حبيبي احچيلي
ليش ياماي .. ذكرى بس خلي لي
سولف وياي .. عن حبيبي احچيلي
ظهري انكسر واشلون ارد للخيمه للخيمه
ابعيني المدامع خويه مثل الغيمه
وتنشد اعليك اهناك چم ايتيمه ايتيمه
كلها تصيح الماي يابو الشيمه
عباس ليش اعله النهر غايب حبيبي اهلالك
ياخويه والله من العطش رايح تموت اطفالك
من صوب الجود السهم صوب جميع آمالك
گامت نشيد المشرعة اطيور النهر تقرالك
ياصاحب الجود .. مته اتعود .. الك حنينه
غيري انته بالماي .. ياوفاي .. ودعت اسكينه
جيتك انخاك .. ليش رايد اتچيلي
سولف وياي .. عن حبيبي احجيلي
ليش ياماي .. ذكرى بس خلي لي
سولف وياي .. عن حبيبي احچيلي
بيدك اغرفت الماي بس بديته بديته
وسهم المنية ابعينك اتلگيته
عباس يالبيك الظهر شديته شديته
عدمن اخوك حسين چا خليته
مجروح بس چلمة عتب .. عباس اريد احچيهه
حاچيني بالراية بعد .. المن يخويه انطيهه
عباس تدري ابصورتك .. عد زينب امخليهه
بالخيمه كل ما تنهضم .. تگعد تعاتب بيهه
من تمشي وتروح .. بلا روح .. تعوف اعضيدك
انته ادره بالحال .. والاطفال .. تعال اتريدك
خويه عگبك .. ياهوه ايكفيلي
سولف وياي .. وعن حبيبي احجيلي
ليش ياماي .. ذكرى بس خلي لي
سولف وياي .. عن حبيبي احچيلي
يا اباالفضل گوم اگعد اتلگاني اتلگاني
مشتاگه اضمك خويه بين احضاني
خليني واحد يشبـگ اعله الثاني اعله الثاني
موقف ضميرك ع النهر بچاني
بجفاك قلت حيلتي .. شمتت يخويه العدوان
عباس چا يمته طحت .. توه العلم بيدك چان
عايفني روح ابلا جسد .. يالنايم اعله التربان
مثلك صحت يا اباالفضل .. عندي بعد كون اخوان
ردتك عدل كون .. يمكنون .. وتشاهد حالي
حين العلم طاح .. صحت راح .. اخويه الغالي
ردتك اتگوم .. من بُعد تومي لي
بس سولف وياي .. وعن حبيبي احچيلي
ليش ياماي .. ذكرى بس خلي لي
سولف وياي .. عن حبيبي احچيلي
كلمات الشاعر - تحسين الخفاجي
تدوين زهراء العبيدي
لتحميل القصيدة صوتي mp3 ""اضغط هنا""
رد مع اقتباس
المشاركة الأصلية كتبت بواسطة صفاء العامري
