( عطش مقصود )
مِن شَحّن سنين الماي
محّد غيّم اعله الراس..
ولمن عطشت الجربه
ولا شفنه متن عباس..
عطشانين..
واحنه الفايضين اعله الوطن والناس!
من اول عطش بحسين
لاخر گطره بوجوه السياسيين .. عطشانين
عيب انسولف اعله الماي
واحنه المن گصصنه اعله السواتر طين!
من صاح الوطن حيهم
ركضناله زلم ميتين..
ومن متنه (عطش مقصود)
ما غيّم ولا ندّه اعله المخضرين!
لو يطّون بالدم ماي
چا فاضت شواطينه..
من نِشْفَت گصصهم خوف
غير احنه التبدينه..
وانترست شوارعنه صور ودموع
چا ما ردّوا الزينه؟!
لحّد يُعْطُف اعلينه..
اليظن بالغيم الابيّض ماي
يُكْفر بالورد هوّه وسنادينه..
مملوحين.. من الله
ووصل بينه الملح للراي ..
منهوبين.. من اول رزق بالگاع
لاخر ماي..
متعوبين.. ونريدلنه في نرتاح
ودخّان النفط يسگف سمانه فياي
گَبُل كل ما شربنه الماي
نتذكر مصاب حسين والرضعان..
وهسه اشما عطشنه نگول
سلام الله على البصره ونخلها وخيرها العطشان
شرارة ليش ما تبرد بعد بالناس
مادام الوطن ناعور بين الغُرُب والسلطان
( الحگ ينوخذ من ينطلب ينهان )
علي عماد
رد مع اقتباس
