السلام عليكم اصدقائي والاصح عائلتي الدررية الي من قريت دعواتكم وخوفكم عرفت انو مو وحدي الي راح اقاتل بهاي المحنة لان الكل يمي ...حقيقة ما كنت ناوية احجي بالموضوع لان ما احب احد ينقهر او يضوج وهذا طبعي وما ردت اقهركم بس انصدمت بموضوع اغرد بهمس بس فرحت اكثر لان عرفت كمية الحب والانسان ما يوكف وحدة والكل يمة ...
حقيقة المرض...
اني من زمان وقبل 6شهور بفترات متقطعة جانت اكو شامات وبقع تطلع بجسمي واضافة لاعراض اخرى الله يبعدها عنكم وما اروح عليها للطبيب بس قبل شهر تأزمت حالتي كولش وانتشرت بشكل مو طبيعي واني كنت شاكة بالمرض بس من شافتني صديقتي الي هي طبيبة خافت ونصحتني اروح وايضاً اصرار خطيبي المتواصل راجعت وكل هاي الفترة ما يخلوني اشوف تحاليلي وعشت اطول شهر بحياتي الي كان عبارة من طبيب لطبيب جنت اشوف الالم بعيون الكل واولهم خطيبي الي عشت وياه عمري كله يمكن اكذب عيون الكل بس عيونة ما كنت اكذبها وما حاولت اسئلهم واكولهم ليش تضمون لدرجة علاجي ما يخلوني اشوفه؟!!!...جنت ماخذتهم مثل ما نكول على مايهم بس قبل اسبوع طكت روحي وواجهتم ...وما انصدمت لان كنت اعرف الحمدلله ايماني ب الله قوي رغم اعرف خطورة المرض وتعب العلاج والرحلة الي منتظرتني بس ما احب انهزم كدام الاشخاص الي يحبوني يمكن مرات ابجي وحدي وادعي الله انو ما اموت لان اكو هواي احلام ما حققتها وما اريد اعوف الانسان الي وعدته ما اتخلى عنه ابد وجنت اكوله انو حتى الموت ما يفرقني عنك بس من ناحية ثانية ادعي الله اذا مكتوب اموت ف اريد اموت بسرعه وبدون ما اتعذب....
كنت اتمنى المرض يكون شك بس للاسف تأكدت من حقيقتة...راح اضطر اترك هاي السنة دراستي علمود العلاج وبعد فترة ح اسافر اكمل علاجي اتمنى منكم تدعون الي واذا الله كتب وما رجعت اتمنى تذكروني بالشي الزين واكون قدمت شي حلو للكل...
