تزاعلنه ! و جبت بالمشية چم داوود
( ما تحب وجهك ) :
شبعد للـ "فضَّة" و تشبهك ؟
گفض كفيت الگلوب الضخينة شوگ ..
و انت الما تحب وجهك
بهونك ..
وچد الـ "هذا انا" من اتمون ع الـ "وينك"
لو ادري العمى نيشان .. ما تيهتك بگلبي
لو يدري الدعاء امدمَّه ما صار السگف حاجوز
اشما يمشي العمر بالطين كل من يعثر بگلبه !
اليحب عيون ما ينعبر بالنگبة
و اجي منگب !
و اضوگك .. يا حلـو حِلك
التكتلك عيني التكتلك
بعدني اشما اچيم الليل .. حسبة طيف تچويني !
و بعد مگفاي ..
مگفة امراية من تكثر جروحي يضيع وجهك من تلاگيني
و بعد بيه حزن منفوس
و اجي متبدي ..
و اغسل راسه بالدخان من يتطوطح الفانوس
كل هذا الحزن بعيوني لو صاير قصيدة اشوه
كل روجة عتب تتكسر اعلى الشيب ،
من تغفه الضفيرة اشراع
و هذا انا ..
ما اصعد منصة شوچ حتى يشوفني النعناع
نسيت !
و ادري ما تنساني لو گلبك مثل وجهك
و انتَ الما تحب وجهك
اضمك وين !
يالمتبدي لون احمر يميز عين كل حاسود
صغنه من الحديد گلوب ..
تزاعلنه ! و جبت بالمشية چم داوود
غريب و من يغثني الشوگ احط چم باب ع الشباچ
و اجي و يطيحلك حگي
و سدينه السوالف سدَّت الفصلية للسرگي
انشدك من يفز عطرك
كسر بالجام لو خصرك ؟
ابلا شوف العمر يركض !
ابلا شوف .. الاغاني اول دِوَه ايمرِّض
يا ذكرة التهز گلبك عثگ شوغة ؟
يا "آخ" التوشلني
شرخصني !
بكل قصيدة امطلعك المو زين ..
حتى الوادم تحبني
اثوب للمحنة اوجوه ..
لا خلف الله ع الغيمة ، يطيح الخير وي وجهك
و انتَ الما تحب وجهك
ايهاب عيال الظالمي
رد مع اقتباس
