كش ملك تاج اعله راسه
يخاف من تاجه يطير
وكش رئيس .. المو رئيس
بغير شعبه يستشير
وكش وزير.. الجان يحلم
يوكف اباب الوزير
وكش امير المايساويله
سعر رشمة بعير
وكش زغير الصار
بالقدرة جبير
وكش اذا صار الوطن
لگمة حلال اعله الغريب
وكاس شربت من عصير
وكش اذا فوق الرصيف
يموت شاعر لو مثقف
اغتالته طلقة حرامي
ينزع ويلبس حرير
هاي كلهة ماتساوي
لحظة من موقف عراقي
ابين روحه وعيشته
ونفسه يحير
هاي كلهة ماترجع
ثمن دمعة
اتطيح من جفن الفقير
اشكد فرق بين الاصابع
شمع ذابت حالبه
وخبزة للوادم تصير
اشكد فرق لليكتب
بروحه قصيده
تبات دفتر عشك
وياك بسرير
اشكد فرق لليرسم اقلام الرصاص
فوق رحلات المدارس
جناح فخته املون
وبالحب يطير
اشكد فرق لليسهر بليل ويفكر
يرسم الضحكه وعصافير وبلابل
وشمس بالضلمة يصير
اشكد فرق للگضة ايامه شريف
وگصته بيضة
يفوح من عدها العبير
اشكد شريف الباس
بسنيني العذاب
اعيون شعبه ويضل عاشگ للاخير
اشكد نضيف
اليضل بفصول الزمن
ثوبه نضيف
الماركع بس لاسم هذا الوطن
ولله سبحانه القدير
رد مع اقتباس
المشاركة الأصلية كتبت بواسطة فقار الكرخي
