دخيلك ياشمع متن العروس نباگ
مدن خنسه
ومحابس تارسه الگيعان
ومسابگ حلم مذعور لهوگ شفة البيبان
ياعين التلم اليل
والغربه ضباب اسود
دخيلك ياشمع متن العروس نباگ
بيش اعبر سراط الحيف
حزنك نهب گمريتي
طميت الگصص بالماي
من شفت النخل مگرود
وجروح الگناطر بيض
مضيف الدمع ،،، مايلتفت للمرتاح
فاتح بابه لليبچون
الي بدين الگمر ميلاد
لچن محرابي مامبخوت
كون يموت ..
وبيش يموت
الظم عمره ولگاه مبيوگ بيش يموت !
ترى بعين الستر مايوگف الشباچ
لون ادري ضريح الخوف
يكره شارة الضويات
چا شلت الضلام نذور
ولون ادري المطر سلعه
ويصعد سعره وكت الگيض
چا صليت لـــ ناعور
خسارة طين هاي الناس
ادور لنهر شوباش
ماتدري الوطن مطعون من مايه
اثاري العمه مو للشوف لـــ النيه
الجرح مو فطن بس يندل بياهو يطيح
ليش نسودن التواب وانچمله بذنب مغبون
شراع بليس ماصله
خلونه نعرف حسين
حته نعرف ياهو الله
أهي رگضة عمايم والنفس ممحل
گضه عمره الشهيد يعيش عالحيطان
كافي تخلف امي وتنطي للگيعان
وطن وعره تجاعيده
مايغسل حزنها الدم
تيجان السفن تنهان من يكسر خشمها الماي
نرخص والخشب شراي
هذوله احنه بلايه گلوب
من دور علينه الموت لبدنه بسد رسايلنه
ولوحدنه
شما يلصف ذراع الخوف تتگطع معاضدنه
ياخذنه ضمه النسيان لاخر أخ ويردنه
أبچي اعله القصيده المشت مذعوره بنوايه الناس
لـيمت يستحي التاريخ ويركد الحلم بالراس
لهسه افلاحة التابوت
تحصد بالثكاله عيون
ليليه السجن عريس والزفه شليل نحور
ياهو الستر عرض الگاع من حبلن بنات الهور !
كل فزة خصر ملچوم
يثمل شارب السجان
وين الگالي عفة شوگ
تغبش لــ تراچي زلوف
وحنيها بشمس روحي
انه بضعن الگمر فارس
بس هيه الگماري ألوان
شسوي الگصة العاهر ولا تعرگ
مادام الجفن ناطور
مايثبت جدم لــ طيف
النجمه الماحضت بهلال تسجد گنطره الـباچر
نوبات الكتب عاجر
تغص عين الشعر ويموت
بكل صفنه ثنعش شاعر
سبحانك يالمرصع ضوه وبلور
ساكت ،،
والدعاء كادود خمس أوكات
چا يمته تفك الباب
يهلبت من سماواتك عذر يسوه
چم زمزم شربنه متاع
من طاح العطش سجيل
لاصرنه ربع لــ بليس ولا صرنه ربع جبريل
ضعنه وجيل يسحگ جيل !
ناصر البدري
رد مع اقتباس
