ألمن فاتحة الشبّاچ ياروحي؟
دموع العتب ماتسواش تتبده اعلى ياهو الچان
شتعتبين والغيمة خذتها الريح
چا هوّ المطر بعتاب؟
من وحّده و يندل سچّة العطشان
ليلة برد والنجمات نوّمهن حچي عيوني
وغفه حتى الضوه السهران
واحنا اسرارنه مفرعات
لاشيلة ولاچلّاب
فشلة من الجرح ياروح
مابينه بعد وگفة اعلى عتبة باب
ماطول الدرب مگطوع
والوادم خذاها الليل
نعتب ليش ونتاني
اليغيب بلاعذر معذور
لاگيله وطن ثاني
وهذوله اهل الگلوب البيض
حتى ويه الفرح يبچون
بيهم للدمع سولة
ينكسرون لو ضحكوا
وينعصرون
لو سمعوا بتالي السلف هلهولة
المايرضه المطر يغسل جروح الگاع
بي شجرة عطش وفراگ مشتولة
يروحي وسدي باب العين
مامش للشمس رجعة
وأنه گتلچ واذكريني
اليسد گلبه بوجه ضحكة
ايعرف من يا مچان تسيّر الدمعة
اليطفّي الگمر والضويات
چي عاشگ
على احلامه چبيرة وزايدة الشمعة
يروحي وداعة دموعچ ولايسوون
حتى وداعچ ومگفاچ
كافي الليل مابي لون
اريد ارتاح واتكتّر
واسد عيوني والشبّاچ
.
ميثاق الهلالي
رد مع اقتباس
