اتمنه احب غيرك
هذاك انه حدر من الدمع محطوط ساگيني ابواچيك
اكتل خيبة عيوني
كثر ما بالحچي اموصيك مافرزن گمت ما بين جلماتي وتراجيك
رغبني العشگ ترغيب خصه انه حنين بساع تغلبني بمحاجيك
هذاك انه حدر فيّ العمر حادي
التعب ذبني
هذاك انه الصحت ردني وخذتني لديرة ضنونك
هذا انه الغرگ لوني
غشيم بروجة الحسبات حب لونك
هذاك انه اليجوني اهلك اذا تبطي ويفگدونك
هذاك انه الوفي الما رخص عيونك
هذاك انه اليفز مغتاض من يحلم تحب غيره
هذاك انه المحلف مايحب ثنين
روازينك حلوگ الناس التحبك
منهن ينعرف طينك
هذاك انه
هذاك انه التوشلني وتهزني بجلمة الماشي وارد بيدك هظم متروس
خلص من السنين هواي ماندري شكثر باگي
ولك حتى بدرابين الوجوه الزاعلتها ولا ندم باگي
ولك كد ما خشن صدري
شما حط هدوم كام يشگگ زياگي
يعبرني الفجر ويفوت ما ضايگ طعم ناسي
ولامن ذكرياتك للحرگ باگي
ولك بس جثة الدخان تتخوصر على رياگي
شبيك ميبس رياگي
ولك واتمنه احب غيرك لچن مثلك وطن چذاب ما لاگي
منك عرفت الوادم شنوه الطين
يم حلگك نسينه الدين
يم طولك اجي لوحدي وارد ثنين
يم شفايفك تفشل خدود التين
يم عينك اجي زغيرون وارجع ويا تجاعيدي عمر سبعين
دليني الشباب منين
رجعني فلا تعبان
مو گتلك هذاك انه
اي والله هذاك انه الغشيم الغاد من من عدي
هذاك انه ضوه دموع فضح كل الدروب الطافيه بخدي
هذك انه الكثر نوحه جزه جروحه
البواچي اكثر من اجروحي
انه ودمعي جزينه الناس
انه وعودي جزينه الياس
لا والله بشر يابس جذب جازي وجه للياس
انه وبالي جزينه الكاس
تذكرتك طفت روحي كمت ما ادري بشفافي
شربت اسمك بلا مكاسر جزيت الكاس
روح انكت شبابيجي يطيح بحضنك الوهواس
روح اغسل تجاعيدي تطيح الناس
روح اگلب فراشي وشوف چم جثه على فراشي
ليليه اخنك بعيني نحر للنوم
ليليه النجوم تصوم
ليليه التعب يترس عناگيدي
ليليه ارد مهظوم بس اتصبر الوادم يرد بيدي
ليليه الف كاسي بسجاجيدي
ليليه اضم ديني بمواعيدي
بعد شتريد من جلمة. هذاك انه
هذاك انه الفلا مغلوب بس يمك اغشم الروح
هذاك انه ليكبر واهسه ويالناس چن ماي وشواطيه
هذاك انه الطفح ضيه
على نهر التعب طفحت جثثه ضيه
هذاك انه الكتل فيه حفر حدما شلع من العرگ فيه
هذاك انه خلص كافي هذاك انه اذا رايدني هذا انه
هذا انه واذا مستغرب عيوني الذنب ذنبك
هذا انه الگبل حبك
هذا انه الفلا صحله عرف زاجل كثر ما فشلن طيوره
ولا ساعي قبل ياخذلك الصوره
ولا ريح الخذت صوتي وطحت يمته اعله شباجك
ولا ماي الخذه اوراقي
ولو تذبل
يهلبت ولجرف يشمرهن بعينك
رسايل فارغه وداعة روازينك
رسايل فارغه وداعة الما شفته دمع عينك
فززني هلي يرضون
گدرني بكشختك
للمرايه عيون
صاحبني وارد مسجون
شني الحريه من دونك اريد وياك ارد مسجون
راضيني الشعر چانون
كرار الصيمري
رد مع اقتباس
