طاحن سوالف ضامهن صار هواي
لاگـيتني وضلن عيوني مچلبات
وطاحت دمعتي وذكره تتبع ذكره
وطاحن سوالف ضامهن صار هواي
اَي من أهد ما چان خـيبر شجره
وصح ماشبگتك هيه هيج العشاگ
امشابگ العشاگ نضره بــ نضره
گتلك تعال أبيـنه عشرة ياس
ونسمة بساتين وسوالف خضره
چا شنهي نـفعه الطيف اذا ماينجاس
هيه المحابس شنهي دون الشذره
وادمنه توجع والمفارگ مفضوح
وحچاية التنگال صارت مره
من احضن أصورك أتـفز الحيطان
اَي حسرة التـنور تطلع حمره
اموادع العشاگ مثل المكتول
حته الله ينغث من خراب العشره
كتلك وره عيوني نزلك قران
وماضل نبي بـالناس خاطر يقره
ياگيض روحي والزعل شمرة ماي
ناوشني نيلك خـل اطوف بخصره
أمـنتفز رسايلـنه أشد بيها متاع
جلمة تعال وعلگ من كل حضره
اتشلبو عيونك وحلمك لاحـوه
والكاتلتني التين ضاگو صدره
انهطر بسمك لو ترس وجهي الغيض
الدله تثمل من تموت الجمره
مبهوته روحي والعشگ وحشة ريل
لا لـگه سـچة ولا گصيبه تـعبره
يونس طلع ورتاح من حلگ الحوت
بس انه مخنوك بحلگ كل حسره
لاگـيتني ملگه الهوه للغرگان
شما احضن بطولك الفرگه أجـره
وصافن عليه ومدري منك شيطيح
وذيج الخدود الحلوه صارت صفره
مغثوث اشوفك والمياسين ثگال
ولا مرك مسامر اخيوط الگمره
لاگيتني ولا گيتك بأخر طيف
وبألوان وجهك عبره تستر عبره
اَي من تلاگينه الهلا تفحط الگاع
وبـوداعنه كلمن كشخلـه بحسره
ناصر البدري
رد مع اقتباس
