قصيدة حوار بين ابليس وابن آدم لجابر الكاظمي باللهجة العراقية
هذه قصيدة تمثل الصراع بين ابن آدم و الشيطان ...
وهي للشاعر جابر الكاظمي وباللهجة العراقيه ...
لقد جلس ابليس مخاطبا ابن آدم يحاسبه :
قال اشعندي آنا وياك يابن آدم
عليْ تِرمي الشتايم واللعن ألوان ؟!
تعال اقعد ونتحاسب آنا وياك
و مابينك وبيني يحكم الوجدان
آنا الباري آمرني أسجد لآدم
وما نفّذِتْ حُكمِ الخالقِ الديان
قلت ياربي آنه اسجد الوجهك لجن
كلفة علي ما أسجد لانسان
اخلقت آدم يا ربي ابقدرتك من طين
و آنه اخلقتني من سنا النيران
غضب رب الجلالة و قال روح ابْعِدْ
وطردني من العبودية ورحت ندمان
هذي قصّتي ويّا الـــــــباري الــــــنوبة
ارجع القصــــــتك يا بـــو فلان
من قابيل أبديها لقتل هابيل و اشلون
انْسِفَكْ دَمّه ذوله موش إخوان ؟!
هم آنا اقطعتْ مَنْحَر النبي يحــيى
نبي وينذبح ما تجاوبني ذنبه اش كان ؟!
هم آنا لقُلِــتْ ياناس عِبْدوني
مثل فرعون وتحـدّى قِوَى الرحمــن ؟!
هم آنا اللي ردت اغدر بالنبي موسى
يُوْمِ الليْ قِلَـبْ ذيكِ العَصا ثُعبان ؟!
هم آنا اللي ردت اغدر بالنبـي يوسف
مثل أخوته وتالي اتِهْمَوا السَرْحان
( السرحان هو الذئب )
هم آنا اللي ردت أصــلب النبي عـيســــى على ذاك الصــــليب اقبال اهــل نجران ؟!
هــــم آنا اللي جبت وحشــي على الحمزه
وأكـلت كبده مثل زوجة أبي سفيان ؟!
وحق ربي اللي تعبده الناس يا ابن آدم
شِفِتْ مِنّك مُصيبة تشيّب الرضعان !!!
ابن بضعة نبيك طــــاح بارض الطف
وجســــــمه بلا كفن واتكفّن بتربان
وبني جنسه اعتـنت من كل مهب وصوب
وصَدْرِ حسين صار لخيلهم ميدان
وعقب قتله انحمل فوق الرمح راســه
وعلى الأيتام و الحراير حــــرقوا الصيوان
( الصيوان هو المخيم )
هــم آنا اللي قلت اقطع نــزاع القوم
يا حرمله وروح اضرب طـفل عطشـان ؟!
هم آنا اللي سبيت أطــفـــال فــوق النوق
يسيرة بنت علي توقف وســـط ديوان ؟!
اشكثر من عقب قتل حسين أهل بيته
شافتْ مِحَن وهموم وغموم وأشجان ؟!
أشكر ربي لأنّه خلقني ابلـــــيس وما
ســـــواني واحــــــد من بــــني مروان
رد مع اقتباس
