ليش غبتي وعن حبيبج ساعة الفركه انشغلتي
ليش غبتي وجم محطه البيهه مر ريلج جريب ومانزلتي
ليش وشجم ليش مرت كسرت روحي بحسرتي
ليش من سال الدمع مامرت ابالج عشرتي
ايست منج صدك من هجرن طيورج شجرتي
توسدت هم الليالي ودوريتج ظلمه ورياح الهجر تخمد شمعتي
تعلكت بخيوط ناسجهه الوهم والحيل بايد ما سمعتي
من صحتلج ساعة الطيحه تعالي اهتزت الدنيا لوكعتي
وما رجعتي وانه اشد جرحي اعلى جرحي وبيه صيحه
تهيج جروحي النسنج ................ وينج انتي
وين ضيعتي المحنه.... وين شوكج ..
. وين وديتي الدموع الجانن ينزن محنه شما زعلتي
وين احلامج دكولي تبخرن لو صادفن غيري ونسن همي وصفنتي
وين يالمالج امان ايام مرن وين تيهتي السوالف وين صرتي
وين حتى الوين ملت من سؤالي ومن ضياعي ومن دمعتي
كفرت الدمعه اعلى خدي وما تحرك بيج ساكن لا ذكر كلبج محبتي
اتجرعت كاس الملامه وياج كله وكطره كطره اسكيج من شهدي ومحنتي
وانه يومي اللي يمر يوم القيامه خلاف عينج
وانتي كل كلبج قساوه وما رحمتي
انزف بطعنات ادينج واعتنيلج خاف كلبج ماتحمل منظر اللوعه بطعنتي
وادفن جروحي بملح كدام عينج واضحك كبالج بطر هلبت فطنتي
اندفن كل يوم باحزاني القديمه وانتي كل ساعه بحلم وردي اندفنتي
هاي انتي
لا ابد موهاي البكلبي انزرع حبهه وسكيته بظيم عمري بشوغتي بهمي ولهفتي
كمت ادور حتى باوراق الدفاتر عن ملامح منج تخفف صدمتي
حتى اكولن طير ضيعته بضباب وطار مايندل يرد لعشه ويرجع ضحكتي
حتى ادورلج عذر يقبل يعذرج حتى الاعذار اتعذر ماتعذرج يالهجرتي
رد مع اقتباس
