قصيدة الشك والغيرة (مكتوبة كلمات) الشاعر يحيى العلاق
الشك عندج طبع
والغيرة حرفة
اظنها وياج ماترسه اعله ضفه
وحقج انتي انتي ومتتغيرين
الميت ميتي ياعمي واعرفه
استجواب من الصبح لليل
والتحقيق موزون ومقفه
الو .. هسه انته وين
ومتجه وين
ها مخنوك وتريد اتنفه
يعني لوحدك لو احد وياك
منيه اقصد منو لاكاك صدفه؟
اي وديلي صورة اشلابس اليوم
حلو
وجماله كاشخ هيه زفه؟
وشدعوه قميصك هيج مفتوح
لاتاخذ برد يمعود ادفه
قبل شويه خطك جان مشغول
بيمن ياتره بيا مستخفه
اسكتي لخاطر الله لاتكملين
اتجاوزتي وحجيتي حجاية كلفه
الحجيه ع الخط جانت وياي
لو رقم امي هم تردين احذفه
وج خليني ساكت تره الوهواس دمرني
ويدك ابراسي دفه
منو السلم عليج وانا وياج
شو مخبوص ويباوع ابلهفه
خيتي وخيتي جلب شني الموضوع
ادري منين اخيج عرفه ولفه
ايسولف بالاخوه ايشوفني اندار
بعيونه اكل ياكل الشفه
تره النظرات تشتم تحظن اتبوس
تحوي الماكدر يحويها جفه
سلملي اعله خوتك يبو الخوان
متفكد خواتك كون احلفه
أأمن لي ابشر!
انا الشمس هاي
مرات اعتقد ماعدهه عفه
من تطلع عليج اتصفن الناس
هوه الترف ينضم
انتي ترفه
وهمزين الشعر ملفوف بالشال
كبل لف الغشيم الما يلفه
انتبهي وديري بالج وانتي بالبيت
بعد ممنوع رجليج اتحفه
وصلت المرحله مااثق بالكاع
احس حتى التراب اعيونه صلفه
حقج ما الومج من تغارين
وحقي من اخذج واسكن ابمنفه
ثاري الما يحاسب ولفه ويغار
جذب رب الجذب مايحب ولفه
______
كلمات الشاعر يحيى العلاق
______
تدوين Zahraa
درر العراق
قسم الشعر الشعبي
رد مع اقتباس
المشاركة الأصلية كتبت بواسطة صفاء العامري
