دويتو هذا هو العراق " شعر شعبي للعراق مكتوب 2019
يحيى العلاق و مهند العزاوي
نتصالح لو مانتصالح ؟
قاله باله برتقاله
وافرض طلعت مانتصالح
شراح نسوي بهاي الحاله ؟
معناهة انقسم موطنه
دولة شيعة ودولة سنه
كل واحد يكتب دستوه
وكل واحد جدول اعماله
ونشرع قانون ايفرق
ويكول الما واحد كاله
يا ويل السني اليتجرأ
ويصاحب شيعي ويبراله
ويا ويل الشيعي ايحن كلبه
ويدك ترميشة الجواله
ولو شافوا بالنقال اسمه
إلا ايشلونه النقاله
والمتزوج من الثاني
يطردهه وينكر اطفاله
وتشمل هاي الاجراءات
حتى على ارقام السياره
ماكو لوحة بصرة عراق
وماكو لوحة عراق دياله
سنة عراق وشيعة عراق
وكل واحد يعرف منواله
زوجي وفردي
طبعاً باستثناء الكردي
مانكدر نمنع تجواله
وممنوع ايغنون الداخل
لو يستمعون المواله
وممنوع احنه انغني الميمر
لو مرت لمة خياله
وممنوع ابشارع يتلاكن
ام دحام وام اچماله
كولو هذا اليوم اشماله ؟
وكولو فال الله ولا فاله
ليش اتخيل هاي الحاله ؟
كمت اتخيل هاي الحاله
من شفت الاستاذ اغتاله
واحد مايوصل لنعاله
ومن شفت الدكتور اتهجر
واحتلوا بيته النشاله
ومن شفت العالم متهدد
حاير وين ايشد ارحاله
يوميه وكالو نتصالح
والاشكال انفض اشكاله
ويوم الثاني اتموت اطفال
ويتفجر مسطر عماله
لو تتفقون ونتصالح
لو نرجع عل قاله باله
قاله باله برتقاله
يحيى العلاق
............
وتصير ومو كلش صعبه
الشيعي الطالع من الكاظم
يلكا النعمان ابنص دربه
وتصير ومو كلش صعبه
بصراوي يزور الغربيه
بين اهله وميحس ابغربه
وتصير ومو كلش صعبه
وعدي سؤال ايفر الراس
ياهو الميحب العباس ؟
ومتأكد سديت الباب
وماريد الشك ايدك بابي
الامة الوحدها محمد
مو فشلة ايفرقها ارهابي
شوف اكتابك نفس اكتابي
عوف اعتابك ضم اعتابي
ما معصومين ولو نغلط
يم الله احسابك وحسابي
مهند العزاوي
........
ولتصدك ابكلمن كال مختلفين
كله اتوهمت ياضيق منظورك
والتمس يجيك ابيوم
من رمضان راح ابنفسه
يعرف لمن ايزورك
فطورك تمر بصرة
ولبن من اربيل
ادليمية رمادي وسمج من هورك
ساعتها يدنك يخجل
من يحاجيك
يلكه الوحده حته بسفرة افطورك
يحيى العلاق
________
تدوينZahraa
رد مع اقتباس
المشاركة الأصلية كتبت بواسطة sawsanmahmoud
