غريب واندل جروحي
غريب واندل جروحي
واندل حزن الحديثات
من تحچي الجفون الكحل والدمعه
واندل ذاك العذيبي
اليفز كل ما توجّ شمعه
غريب واقره لون الطين
استاهد رسوم الناس تتغنه بـ سمار الماي
اصابيعي سمار الماي
يتعده اللحن روجات بچفوفي
وولا غنوه القرتني انسان
وولا خورة مزن تنثر محاچيها عله البيبان
المطر حدر التعب بيبان
غريب الماحضه بخله
يسافر للگمر نجمه
ونوبات الوطن يغفه وتفز لچمه
الوطن وسوالفك ذمه
ويهنياله
اليجيس عيونك الشهله برد دمه
وبعيونك فرح ينشم
وبروحك مُهر
لو ثار مايغفه رفيف الدم
مُهر
يصهل لهيب الناس بالغربه وطن مجفي
وشفت روحي
برذاذ الدم وطن مجفي
وشفت الـ اه
تبزغ وين ما تلگه جفه وحسره
هذا انه بـ نعاوي الناس
اتيه ابين چلمات الدمع مجره
اتيه بحزن چلماتك
چلماتك
خذتني متاع للظلمه صبح يلهث
وروجاتك تعدت چم جرف بيه
وسره بروحي حنين وشوگ
چم گنطره بروحي
تناغي اثر جدمك لحد ما فاض بيّه الطين
وهذا انه
اذا غنيت اناغي الكاس هلبت يمر بطيوفك
هلبت
بالوطن حنه جزاها الحيل تتلحن عله زلوفك
هذا انه
لون ظاك السفر بيه اجيس
احمد الطفيلي
رد مع اقتباس
