خسرتيني بعد مالوگ لـ عيونچ
خسرتيني ،
بعد مالوگ لـ عيونچ
ولا ارهم شمع تندار ضوياته بسما أضنونچ
خسرتيني ،
و جزيتچ شوف فارگ عين
ولچ يا ظلمة أسنيني الحنين انباگ ،
باچر طين يعطش طين
هيستچ حزن ما ينگضي بـ موسم
وسولفتچ على جروحي ،
لگيتچ هم
يـ ورده شما اردلها ،
عشرتي وياچ عثرة شـم
ما راهم لـ عطرچ لا تلوميني
ولا لايگ لـ حسنچ لا تذميني
مدري شـ وازه بيباني وضگت چفچ ،،؟
ومدري شبلل أجناحي وطحت يمچ ،،؟
ولچ حسبالي گلبچ ساجيه ،
شما عطش گلبي ،
أيفيض
شمدريني سمومه أيبيعني أعله الگيض ،،؟
ما ادري !!
ما أدري السفر بـ عيونچ أيتعب
و لا أدري حصاد أمحبتچ ينهب
خسرتيني ،
وخسرت أفياي عمري النهبته أشموسـچ
ولچ ما ظل غصن بـ الروح ،
شـ ألها أوي الصبخ فوسچ
و شـ ألج يمي ،،؟
يـ بنت الناس
تيهيني
أشتهيت أسرح لـ كلشي بعيد ،
واعبر گوه عـ المامش غصب واعناد
أشتهيت اندفن غاد أ.من الغباشي أطيوف ،
بـ أول فزه للدنيا وبعد هم غاد
شـ تلوميني ،،؟
الملامه الـ ما تسكرني بـ عشگ يسوه دفنها أمراد
شـ تشهگيني؟
النسيم أيگود ما ينگاد
شـ تلميني ؟
ولچ مليت أموت لـ وطن لا رايد ولا ينراد
أي مليت ،
هاي سنين اشب وحدي
هاي سنين اطوف الناس واهوى الناس ،
واغفى بـ كلشي ما عندي
و آخ انتي ،
أنتي أگدار كل چذبه
وحگ حزني ،
أشتريت عيونچ بـ شوفي ،
ولگيتچ بايعتني لـ كلشي بيه غربه
خسرتني ،
المري تهوى الكسر نوبات ،
و ابو روح العزيزه أيموت اذا شاف العشگ ذنبه
جواد زغير
رد مع اقتباس
