سلام ^^
٢٠ معلومة عنّي او بالاحرى ١٥..محيكونون غريبين هواي لأنو معندي شغلات غريبة بحياتي او بشخصيتي اصلا -.-
- ما مسافرة ولا مرا بحياتي .. و لا حتى واصلة لشمال العراق .. حتى هالشي لا اتمناه كلش ولا افكر بيه ابد .. بس يعني مو مشكلة ان سافرت بالمستقبل .. م رافضة الفكرة
٢.فارّة بغداد كلها و اعرف كل اماكنها و احبها كلش و مقتنعة انو اني كلش متونسة بحياتي لأني هنا
٣.احب عائلتي و تفكيرهم و انو الحرية موجودة لكل شخص بيها من كل النواحي .. مافد يوم احد منعني من طلعة ويا صديقاتي او زملائي بالكلية او بأي مكان ثاني .. من يصير اتفاق ع طلعة او سفرة م يحتاج استأذنهم اصلا بس انطيهم عِلِم
٤.من احد يطلب مني انو اشرح له شي موضوع معين لازم يتحمل الجدّية اللي تنزل علية و عصبيتي و رزالتي.. من ناحية حرصي انو يفتهمون اللي شرحته الهم مو ع شي ثاني .. و صديقات الاعدادية و حاليا كروبي بالكلية يعرفون هالشي و ما عدهم اعتراض ابدا او عدم تقبل للموضوع -.-
٥.مزاجي بأيام الدوام يتقبل السچ و النوم فقط .. اي طلعة او سفرة او زفاف او حفلة ارفضها اصلا حتى لو جان عندي وقت لأنو معندي خلگ ولا مزاج ..
بس عود لا بأس بالطلعات و السفرات اللي تصير بالكلية لأنو هي من ضمن الدوام
٦.اتقبل الانتقاد الي او لأي شخص ثاني يقربلي او اعرفه و ما اتأثر اصلا.. بس اخوية لاء .. فجأة الگى نفسي معصبة و داخلة بحرب علموده -.-
٧.الحد الاقصى لستوريات الانستا عندي ٥ ستوريات .. اذا نزلت اكثر ادخل بكئابة و ممكن الغي الانستا كم يوم حتى انسى هالشي :/
٨.قبل لا ادخل سادس صارتلي مشاكل كبيرةع سالفة زواج و هيج و رادو يجبروني .. و الافضع من هيج انو اعوف دراستي هماتين . .. عائلتنا مو من هالنوع المتعصب اللي يجبر الواحد ..بس جان تدخل الناس بحياتنا هو السبب
بس الحمد لله م صار هالشي
٩.اجرأ و احلى قرار بحياتي انو عفت الطبية و قدمت الصيدلة اول شي .. و ممتندمة ولا حتندم
١٠.دايما تطلع منّي كلمات بلهجة الاطفال :/ بصورة عفوية كد ما متأثرة بجهال اختي .. و كل اللي يعرفوني لأول مرا يكولولي متملقة و مدري ايش
١١.اسمي احلى ذكرى بقتلي من بابا الله يرحمه ❤️.. و هو سبب طشتي بالكلية و بالمدرسة
١٢.اطول مدة صداقة الكترونية هي ٥ سنوات و بعدها مستمرة ^_^ داخل المنتدى
١٣.احب الكوري و الانمي منذ الازل
١٤.قبل لا ادخل سادس جنت ما اعرف يعني شنو انستا و تيلي و هالسوالف و معندي فون اصلا .. جان عندي بس الدرر افتحه ع اللابتوب
١٥.بالعطلة البيت كله عليه كتنظيف و ترتيب هيج .. بالدوام البيت كله مو علية
***********
اضافة .. الـ 5 معلومات الناقصة ادريس كتبهم عني و اني ادرجتهم ^_^
-١٦- فيروز رقيقة جداً مثل جناح فراشة ، جداً متواضعه ومو من النوع الي يشكي همه ولازم احد يحس بيها ويضغط عليها حتى تحجي وتشكي الي بداخلها وترتاح ، يعني مرات تضطرون تجيبون عصا وتكتلونها حتى تحجي الي بداخلها ههههه
-١٧- فيروز ابد مو متسلطه ومظلومة ههه حتى اختها الاصغر منها اقوى بسوالف المشاكل ، ومو من النوع الي تواجه الناس بأخطائهم مهما ضغطوا عليها
-١٨- فيروز قنوعة جداً ، أحيناً عدها هواي امور تمر بحياتها تستوجب الحزن والتأخر عن واجباتها لكن هي متفائلة وايجابية
-١٩- أذا زعلت معناها لازم تسوي معجزه حتى ترضيها (هي ما تحقد عليك بس انو تضل حزينه ومتخذة شكل هل سمايل
-_- ...) سر انو هي ترضى عنكم ورى الزعل خلوها تضحك وشوفوها شكد هي تعنيلكم (ولا تتصنعون شيء او تبالغون وكونوا بسيطين)
-٢٠- فيروز متحجي نكت ، عمركم شفتوها تحجي نكته ؟ بس هي فكاهيه ، وفيروز متحب الشعر بس شعراء محددين
رد مع اقتباس
المشاركة الأصلية كتبت بواسطة ღĞiяℓღ
