20 معلومة عني بعضها غريب وبعضها عادي وما بين هذا وذاك تهت في بلادي
يلة نبدي هع
١-من انام ويمضي على نومي اكثر من خمس ساعات بعد الي يناديني ويحجي وياي او يسئلني واني نايم عادي اسمعه وافهمه وارد عليه بكامل الوعي واني نايم .
٢-احب العزلة دائماً واذا كَاعد بمكان بيه ناس
مثلاً خطار وحجيهم مو يم المواضيع الي احبهة
انسحب بشكل تكتيكي والعكس صحيح .
٣-هادئ كلش بالتعامل مع الظروف الخارجية لدرجة البرود مثلاً اذا شفت شي يريد يوكَع واني
شوية بعيد عليه انتظره يوكَع انوب اشيله ما عدا
الشغلات الثمينه شوية اكون حار بالتفاعل .
٤-احب دائماً افرض شخصيتي بالمكان الي اروح بيه وبالغالب اكون صامت حتى اتعرف على طباع
الاشخاص المتواجدين بذاك المكان علمود اعرف شلون احجي وياهم كذلك امتاز بالغموض وية
الجميع .
٥-مشاعري تكون جياشة اكثر على مواقع الانترنيت
مقارنه بالواقع ، يعني مثلاً يجوز احزن على موقف اشوفه عالنت واذا نفس الموقف اشوفه بالشارع ما يأثر بيه .
٦-امي تحبني حب قوي مقارنة بخوتي البقية وهذا
الشي واضح من تصرفاتهة تجاهي قبل ان تصرح بيه والسبب هو اني الوحيد الي بالعائلة كسرت القاعدة مال كله مامة ومامه وكَمت اناديهة بألفاظ
العشق او بأسمه مثلاً ادلعهة كوكو او حياتي ، حبيبي
... الخ .
٧-عندي قابلية اتحكم بعصبيتي لدرجة اكَدر امثل
انو اني معصب بس بالحقيقة ما معصب وهاي اكثر شي استعملهة لتخويف الجهال
٨-الشخص الي يسويلي معروف معين ما انساله ياه ابد واردله بأضعاف الا اذا بدر منه شيئ معين
اني اكرهة او اعتبره خط احمر .
٩-احب المغامرات بشكل كبير حتى على حساب صحتي او حياتي .
١٠-دائماً الشي ألي اخاف منه اوكَع نفسي بيه وابقى احاول اطلع منه ، مرة مرتين بعد ما اخاف
واصير خبرة بهذا الشي
١١- عندي اصرار مو طبيعي لتحقيق اهدافي حتى
لو جان راسي يوجعني او مريض ما اهتم واستمر
وصارت عندي هاي الحالة بالامتحانات ...
١٢-كل ما احس نفسي صرت فوضوي وادمنت على كم شغلة مستعد اوقف استخدام هاي الكم شغلة مثلاً الى ايام معينه واستعمل بمكانهة غير شغلات تسد الوقت وبعدين ارجع استخدمهة بشكل عادي واذا رجعت الفوضى تعاد الكرة من جديد
١٣-احب اتعلم كلشي يعجبني واصرف وقت عليه
بس ما استمر يعني على كَد الاساسيات واعوفه *_*
١٤-اذا تعلق الامر بالمنافسة فبعد ما اعرف نفسي
يعني اكَوم ابدع من حيث لا ادري ومثال عليهة مسابقة اجمل تعليق على صورة كنت اول مرة اكتب بحياتي ما عدا (الانشاء مال عربي بالمدرسة)
كتبت واخذت بيهة مركز رابع وغيرهة من المنافسات الي تصير بالجامعة
١٥-اكَدر اتحكم بعاطفتي بمقدار معين يعني اذا حبيت بنية مثلاً وتركتني فجأة بدون مقدمات فأحزن ليوم واحد بس وما احتاج احضرهة او شي واذا رادت ترجع مرة ثانية استقبلهة بشكل طبيعي
١٦-دقيق بأختيار الاصدقاء المقربين يعني الي ارتاحلة اسويه مقرب الي اما الي ما ارتاحله تبقى علاقتي سطحية وياه
١٧-بالغالب المشاكل النفسية الي اتعرضلهة احاول احلهة بنفسي وخاصة من تحدث بظروف صعبة اما اذا تأزمت كلش فأروح لصديق قديم الي مجرد احجيله اعتبرهة انحلت ...
١٨-ما احبذ ركوب السيارات الفخمة يكفي سيارة عادية تسد الحاجة ، بحيث اخوي عنده جارجر صار سنة ما اصعدهة الا بالمناسبات او من تكون طلعة عائلية بيهة ...
١٩- احب اتأمل بكلشي يصادفني بحيث مرة من المرات رحت للساحة مال طوبة وانضربت بوري طلع ماكو لعبة فأكو جان سرب مال نمل فتابعت مشيهن وشفت انو همة ما يمشون بطريق مستقيم اكو حصو او صخور اتأخرهم عن الطريق وتعرقل مسيرتهم وربطتهة بالحياة العملية كيف مستحيل تكون مستقيم على طول كذلك تكرار المحاولة فيما اذا سقطت النملة من الصخرة بسبب الريح تعاود مرة ثانية وثالثة ...
٢٠-اذا صابني الملل او شي لتحقيق هدف معين
احجي وية نفسي على انو واحد جاي يحجي وياي
الى ان اقنعهة وترجع تنشحن من جديد وتتكرر هاي
الحال بكل فترة يصيبهة الملل...
شكراً وسهلاً
رد مع اقتباس
المشاركة الأصلية كتبت بواسطة نـيـلـي
