المعلومات طويلة جداً إذا كان عندك وقت فراغ أقرأهن وجيب وياك شامية او نستلة او جبس او عصير او لفة واقرأهن
علمود اني احب الاكل واحب احد يفكر بية وهو ياكل
1- احب كل الحيوانات بشكل مو طبيعي بحيث اتمنى اتبنى كل الحيوانات حتى قوارض اجيب بس منو يخليني :( وكلش اكره احد يأذي حيوان ، أذي بشر گدامي ولتأذي حيوان .
2- رغم الاغلبية يعتبروني أجتماعية كلش بس بالحقيقة اني العكس وهواي استحي حتى من اهلي والي ملتقي بية بالحقيقة لاحظ شگد نسبة توتري .
3- كلما اغسل وجهي اشهگ بالصابون
4- كلشي ينتشر والناس تحبه اگوم اكرهه بدون سبب حتى لو ما مجربته بس احب اخالف دائماً
مثلاً اذا طلبنا اكل والكل عجبه كنتاكي اني لازم اگول لا واخرب الطلبية كلهاوداحس بالفترة الاخيرة گمت أقلل من هاي السالفة
5- دائماً أحس بالوحدة حتى لو جنت مستمتعة بوقتي وكل الي احبهم موجودين ، يبقى فراغ بداخلي ، واذا مثلاً اكو جمعة ومتونسة واضحك فجأة ينقلب وجهي 180 درجة واروح اگعد وحدي .
6- مهووسة بالتفاصيل صح الاغلبية هجي بس اني احفظهن لدرجة اذا احب شخص اگعد اتأمل رموش عينه واحفظهن رمش رمش شكلاً وعدداً واحفظ حتى عدد مساماته :)
7- دائماً انسى ، انسى الذكريات وانسى الناس وانسى الاسماء والوجوه وحتى تجاربي ، ماما تذكر كلشي مسويته بس اني ما اذكر شيء !
8- اتخبل من غسل المواعين والطباخ عندي استعداد اغسل البيت من الباب للباب ( لان بيتنا بي 3 بيبان
9 - لبست بوشية ( نقاب ) لمدة 4 سنوات ونزعتها ، السالفتين چانن بأختياري وع سالفة البوشية اني الوحيدة بين مجموعتي بالكلية متبرجة سافرةكلهن لابسات عبي :)
10 - احب الالوان والاشياء الي تلمع عشق عشق ، دائماً اشتري الاشياء الي هجي مثلاً ما عندي حذاء سودة او لون روتيني كلهن الوان لطيفة ^-^ حتى ملابسي :)
11 - ما اسأل ع احد الة اذا لاحظت غيابه او صايرله شيء وما احب احد يعاتبني بخصوص هذا الشيء ، اوكي انت ببالي ميحتاج نسولف كل يوم
12- احتفظ بكل شيء ، عندي أوراق محتفظة بيهن من چنت بالروضة ، رسومات وألعاب ، وعندي مزهريات بگد چف الايد بابا جابلياهن من جان عمري 5 سنوات لحد هسة محتفظة بيهن :) ، واحتفظ بكل قصاصة ورق تحمل اي كلمة بيني وبين صديقاتي ، وحتى محتفظة بأغلفة نساتل جابلياهن مصطفى العراب .
13- أتعرضت لتحرش جنسي واني صغيرة ولحد الان حافظة شكل المتحرش ووجهه وصوته .
14 - اذا يوم ما أسمع بي أغنية يتعكر مزاجي وأبقى اتعارك وية كل الناس
15 - اخوية سجاد هو الانسان الوحيد الي أثق بي ، كل شيء ويا عندي سمعاً وطاعة ، حباً وثقةً بي ، ومحد گدر يوصل لمقامه بروحي بحيث أصيحله مرايتي
16 - ما احب الاطفال وما اعرف اتعامل وياهم الي عمرهم من 3 سنوات وهچي ، اخاف اسوي شيء خطأ الهم ولذلك عندي رهاب من الأمومة واحسها اكبر مسؤولية بالحياة
17- رغم عمري جبير بس بعدني أحب اصير طفلة وأتدلل يم بابا ع كلشي
18 - أحب امشي حافية بكل مكان ، واحب ملمس اوراق الاشجار والحصى والاعشاب تحت اقدامي ، أستمتع بي بحيث مرة نزعت حذائي بالدوام والدكتور رادني وحذائي اختفى واتورطت
19- ريحة الخضروات مثل القرنابيط ، اللهانة وغيرهن تصيبني بالصداع .
20- احب الاشجار بشكل مجنون ، احب ألمسهن واحضنهن واسند ظهري عليهن ، اتمنى بحياة ثانية أكون شجرة
رد مع اقتباس
