بدرس الدموع ينشز الما مجروح
لايرفع ايده الجفنه ماظل مرطوب
لحد هسه لذة ضحكتك تحي الروح
جن لذة اول ركعه للكله ذنوب
الشجره العليها اكتبنه ذكرانه العام
رحتلها من كالولي عنك مخطوب
شافتني وحدي استثكلت من ملكاي
القفاله ماتنهاب اذا مو ع البوب
لامتني بس ادموعي صارن حاجوز
عن اللسان العين مرات تنوب
وهو الخشب باطباعه ميكثر اللوم
من يدري بالبسمار يدخل مغصوب
لامالة الله تلوكلك هاي الناس
شيب الزلوف يلوك بس للمتعوب
وشحصلت كضيت عمري اندل بيك
البسجن هم عينه تندل البوب
رديت من شفت الورد شابع ماي
ثاري النهر بلمطره ميظل مرغوب
واتعمد اوكع مااسمعك سميت
يافشلة اخرس بيده دزو مكتوب
الفشله مو تنغلب كدام الناس
الفشله من كدام كلبك مغلوب
لميت دمعي وفشلتي وحجي الناس
بأخر وداع وعطرك الباخر ثوب
وصورك الما مره خلني وحيد
متعلكه سبحه بجف الستوه يتوب
سهله الصور شيطلعك انته من الروح
المطلوب حته بنومه هم ظل مطلوب
وقررت ادور عن وطن مابي ليل
مثل التدور عن كبر وكت غروب
واستوطنيت بديره كلهم عشاك
كلما اشوف اثنين افزن مرعوب
بديره ماكو مفارك اتلهه وياه
المصيوب يعرف جرحه بس المصيوب
حيدر محمد الشاطي
رد مع اقتباس
