حياتي محرز فدوة يروحولك كل الكدعانالمشاركة الأصلية كتبت بواسطة انسان ثاني
الله على اخلاقك يا ابو صلاح فديتك يا فخر العرب هههه
تسلم حبيبي بشار بس اذا مفكر بالزواج تعال لحك لان الاسبوع الجاي راح يرجعون لـ اهلهم و راح اتبهذل اني
لا لايرحون
حسيت كلبي انقبض
هاهية قررت ارتبط بيهن ويطبخولي وانزل صورهن بمدونتي واغثك ..
احاربك بسلاحك الجنت تقاتلنا بي هههههه
هههه الله ع تواضعك يا ابو مكةحياتي محرز فدوة يروحولك كل الكدعان
لا لايرحون
حسيت كلبي انقبض
هاهية قررت ارتبط بيهن ويطبخولي وانزل صورهن بمدونتي واغثك ..
احاربك بسلاحك الجنت تقاتلنا بي هههههه
اوووف هاي شغلة فاتتني واني الي جنت اجذب واكول طبخي وعمايل ايدي و هسه انكشفت مع الاسف ههههههههه
مادام صارت هيج حبيبي البنات سافرن وهاي هيه عليه وعلى اعدائي ههههه
حاول لما تشوف مزاج شريكك رايق و انتَ تعرف كلش زين انه عنده مشاكل و صار فترة ما مر عليه وقت راحة انه ما تزعجه بـ أمور تافهة
حتى لا تصير حمل عليه و يبدأ يعيد النظر بشراكتكم و يشوفك عبء بالوقت الي مفروض تكون بيه اكثر المساندين
تعرف هذا الشخص الـ يسألك أنت شلونك وترد الحمد لله ، يرجع يسألك صدك زين ، ممحتاج شي ؟ ويدور بتفاصيلك
الي اذا يسوي شغلة تخليك فرحان وراها يتأكد من ترجعون اتونست لو لا ؟ وميكتفي بفرحتك من يوصلك يبقى واكف وياك الحد متفوت للبيت تضحك
الـ يسألك على شغلة جانت مضايقتك من فترة طويلة انت نفسك ناسيها لو بطلت تهتملها
اليبقى يواسيك وتدري هو مجروح اكثر منك ووضعه اصعب منك
هاي الناس متستاهل تخليهم بصف واحد ويه بقية التعرفهم
حتى لو بقية التعرفهم تحبهم ويقدروك ....
قبل شهرين كاعدين اني وصديق بكهوه مقدم على تعيين بشركة اهليه صارله سنة ، مقهور لان طلعت اسماء المقبولين وهو مو وياهم ، كلي راتب زين وشغل مريح ووكت اقل ، ماراح الكه مثل هيج شغل وفرصة بعمري ، شفته قبل ايام كلي تتذكر التعيين القدمت علّيه بهالشركة ؟ كتله اتذكر
كلي سدوها قبل اسبوعين ، ابو الشركة طلع مديون والموظفين كلهم بطلوا ، واجتني شغلة براتب ضعف الاتمنيته .
بفلم sliding doors يحجي على بطلة فلم راجعة من شغلها ورايحة تصعد بالمترو ، فجأة باب المترو انسد ركضت وراه حتى تفتحه ، الناس رادت تساعدها نص جسمها جوه والنص ثاني بقى بره . واحد ثبت الباب بأيده الحد ماصعدت ، الغريب من وصلت لكت زوجها يخونها ويه وحده بفراشها
من الصدمة قررت تهاجر وتشتغل من جديد وحياتها اتحولت للأحسن .
الفلم وره شوية يعيد نفس المشهد ، البطلة تحاول تصعد بالمترو والناس تساعدها بس للأسف مالحكت
اتصلت على حبيبها واعتذرتله راح تتأخر ، بقى يخونها سنين وهي متدري ، كملت شغلها الي تطورت بي بس بقت ممرتاحة بحياتها برغم انجازاتها الشخصية .
اتذكر هذا الفلم والمواقف الحجولياها أصدقاء وأتذكر شكم مرة بقينا مخدوعين والقدر هو النبهنا
كم مرة بقينا مستعجلين والقدر هو النقذنا
كم باب المفروض تلحكه ؟ وكم باب المفروض تعوفه ينسد كدامك من غير متحس بندم ؟
كم مرة بقيت تركض على شغلة وللأسف جان ركضك وسعيك خطأ؟
تذكر ان اليوم هو الغد الذي كنت قلقاً عليه بالأمس
ديل كارينجي .....
شكراً للبساطة والكل شي متواضع
شكراً لأكل البيت ، شكراً البنطرون الشغل ، للقميص الينلبس يومية ، شكراً للجايجي الگلبه طيب من ينطيك استكان ، لأبو التكسي اليوصلك ويكلك خليها
شكراً العربانة الفلافل وصاحبها ، للمدير اليشاقة ، والضابط المحترم ، والدكتور الميتفلسف عليك ، شكراً للمدرس اليشرح حلو ، شكراً للأنسانة القنعت تكعد ويه عيالها ، وللرجل اليخلي زوجتة تروح الصديقاتها ، شكراً لليسامح الناس، واليحط نفسه مكان الناس ، والينطي حق الناس
شكراً للميعاتب بكل فترة من تتصل بي
اليكول للفقير لبسك حلو وشكلك حلو وشعرك حلو
شكراً لليفوت مكان بهدوء ويطلع منه بهدوء
ويعوف بي اثر قوي
شكراً للموجودين دائماً
شكراً الكل شيء سهل ....
شكد ميصير عمره صيحله اخوية ، مو ابو الفحم عمرلي النركيلة ، واسمها التساعدني بتنظيف البيت مو خدامة ، واسمه عامل نظافة مو زبال
والمطعم من تصيح الويتر " من رخصتك " ومن يجيبلك الطلب كله "شكرا" هو منتظرها
واذا نزلت طبق اكلت منه لكمتين وشبعت اخذه سفري وانطي لأي فقير بالشارع ، واذا كدامك محل جبير يبيع شغلة انت رايدها وشفتها يم بسطية اشتري من البسطية ولتوكف على الف والفين وياه ماراح يحلن ازمتك الاقتصادية ، واليمد ايده ومتريد تنطي ابتسامة وكله الله ينطيك ، احترم ضعفه وانكساره وخل يروح بأدب
الدنيا ما واگفه ع رحمتك تره الله الي يرحم ....
بصف ثالث ابتدائي اجتنه المديرة ست خالدة گالت راح نختار ٣ حتى يرفعون العلم يوم الخميس ، بسرعة حضرت نفسي حتى اطلع ، صاحت اول اسم و صفكوله الطلاب كلت هسه تصيحني صاحت الثاني وهم صفكوله كلت ما معقولة وجان تصيح الثالث و صفكوله انصدمت لان اسمي ماكو و اني بهاي الصفنة رجعت دخلت اني بسرعة كلت اكيد تذكرتني وحتصيحني ، جان تصيح اسم رابع وراحت ، هنا احبطت كلش واهتزت ثقتي بنفسي لان جنت ادري بروحي احسن من الكل بس بديت افكر معقولة اني حالي حال البقية وماعندي شيء مميز ؟ معقولة اهلي يضحكون عليه من يكلولي انت احسن واحد و انت اشطر واحد ! ، لهناك ودخلت المديرة و ضحكتلي گالت يلا ماما تعال شمنتظر اني ما انتبهتلك عبالي ما مداوم ، هنا كبريائي يگلي ابقى برحلتك ونرجسيتي تگلي لازم تروح وانت الي ترفع العلم و تقرا النشيد الوطني ، من كبرت عرفت ان ست خالدة هي القدر و هذا هو لعب القدر لازم يراوغك ويستهلك صبرك الى ان ينطيك الي تريده
عرفت ان القدر يمكن مايختارني اول مرة ، وممكن مايختارني بالثانية بس الي تعلمته لازم انتظر لحظة الاختيار ، ساعة ، شهر ، سنين ، المهم من يجي
لتنسى تخلي الصف كله يصفكلك ^_* ........
لحد هسه اذكر اول مرة عرفت بيها معنى الفوضى من رجعنه للعراق بعد السقوط وعبرنه الحدود بدون ما احد يگلنه منين جايين و وين رايحين ، اول مرة اعرف الثقافة من عرفت علي الوردي كاتب و عالم اجتماع مو كارتون مثل النمر الوردي ، اول مرة عرفت الكشخة من اشتريت طقم هاواي و لبسته ونزلت بي ع بحر ، تره حياتنا و ذكرياتنا عبارة عن جهلنه و قصر نظرنه بهواي مواقف ، لكن المهم انك من تذكر هل مواقف ما تستعر منها و تضحك لبساطتها وعدم تكلفها ، للاسف جيل هسه يريدك دائماً تظهر بموقف المثقف الي يكول (شگتلكم ياجهلة) ، واليضحك عَلى البسطاء الميعرفون ماركة زارا ومالابس من لويس ڤويتون و ما يدري دولتشي اند غابانا عطر لو كبسول مال مفاصل والياخذ سناب عَلى الدرج مال رويال كلاكسي وويه كل كلمة بالعراقي يحجي كلمتين انكليزي ، اتذكروا غلطاتكم وتفكيركم السطحي وجهلكم قبل ، ولتتبره منه ، احنه بشر اصدقائي مو بلاستيك يخليك متحس بالنقص
صدگني الشعور بالنقص هو من تصير غير انسان حتى ترضي غيرك .....
الراحلة ... دكتورة وطن
اول ما سجلت بالدرر چانت تشارك بموضوع دردشة بقسم المقهى ، چنت اتشاقه وياها و اصور الاحصائيات مال المشاركين وتطلع هي اعلى عضو مشارك ، چنت اگلها ماعندج شغل وعمل بس نايمة بالموضوع بحيث تگلي بس اشوف اسمك بالموضوع اشرد وانضم لان ادري راح تفضحني هههه ، منا بدت صداقتنه ، هذا الحچي بالعطلة ، وراها بدأ الدوام و بدأ الدوري الاسباني و طلعت زنوبة مدريدية ، چنا من نفوز تجي وتباركلي اول واحد ، ومن نخسر تگلي راح اضم وجهي حتى لحد يعيرنه ، چانت تحجيلي عن علاقتها بخطيبها وانه برشلوني و شون يتشمت بيها من يخسر الريال و هوايه يختلفون بسبب هل موضوع ، اكثر حجينا جان برسائل الزوار و الهمسات ، بعد فترة هي طلبت من اغرد بهمس ان تسوي محادثة جماعية بـ تليغرام حتى نحچي احنه الثلاثة ، چانت محادثاتنا عبارة عن تحشيش و نحركها ع خطيبها هههه ، چانت تلدغ بحرف الراء و من تنطق بـ اسمي تگوله (وامي) ، هاي اللدغة تخليك تشوف البنية مهما كبرت تبقى طفلة ، تحسها تتدلع كلما تنطق حرف الراء ، بالنهاية زنوبة اختفت و قل تواصلنه بسبب دراستها ، الى ان اجتني بيوم من الايام تگلي انا مريضة ، بقيت مصدوم ما مصدك هاي الطفلة المتروسة حيوية وحب للحياة تتمرض ، بقيت اتواصل وياها قدر المستطاع اثناء فترة علاجها حتى تحس انها مو وحدها ، واخر شيء قبل كم يوم دزتلي رسالة تطمني بيها انها موجودة ، اليوم كلش انصدمت من قريت خبر وفاتها ، ايجوز لاني احبها كلش مو گادر اصدگ هي رحلت عن هذه الحياة بهل سهولة ، و ايجوز لان كلشي صار سريع فـ العقل مو راضي يستوعب ، بس اسوء شيء بهيج موقف انك ما تگدر تعبر عن حزنك ، انا حزين لدرجة ماعندي شيء اگوله حتى اواسي نفسي بي ، حزين لدرجة رافض تقبل الموضوع ، فعلاً الموت راحة للميت و عذاب لمحبيه ، راح امسح من ذاكرتي وقت مرضج حتى تبقى صورتج بخيالي من تضحكين وتتشاقين و تگليلي على عناد الكل .... هلا مدريد
حبيبتي و صديقتي واختي الصغيرة زنوبة
افتقدت ضحكتج و اني اسف لان مانزلت دموعي عليج ، لانج اغلى منهم فـ گلبي بچالچ
