سألوني الخلك هم عندك انت احباب
كلت واحد حبيبي و ما اريد اكثر
تعرف ليش احبك راح اكلك ليش
لان انت النفس وبلياك ما نكدر
انت النفس ليه واظل عايش بيك
ومن تطلع تظل الروح تتحسر
يمر طيفك اكبالي وبيك اظل ولهان
واصبر الروح وابقى لشوفك اتنطر
احب اسمك لان هو النغم للروح
واحب ذكرك لانك بالعقل تفتر
واحب رسمك اكبال العين من يلوح
واحب عقلك لانه بغيري ما فكر
واحب خدك حبيبي شلون خد عليك
واحب عيونك الحلوات من تخزر
عليك اوصاف ما تحملها هاي الناس
عجيبة على اليكرهك لو ردت تنغر
دفتر كلبي الك والعقل قلمك هاك
ومن قصة غرامك املي هالدفتر
ما اعوفك وحق كل حرف بسمك لا
و حت لو صار حبك بالكلب خنجر
مو بالكيف احبك حتى اجوز اهواك
حبك يظل للابد مكتوب و مقدر
و خيرت الكلب لو انت لو هالناس
جاوبني الكلب بفراكة ما اكدر
لان بشوفتك صرت انسة كل الناس
وانسة انة منو و منين وانت لحالي تصور
يالشفافك نهر منك اريد الماي
لان من ماي شفتك هالكلب يخدر
عين بعين اشوفك انسة عمري الراح
واذا احظن ظلوعك كلبي يتفطر
اريد وياك اعيش بلا حزن واهات
وانسة الحزن داخل كلبي المكسر
ورغم كل الجرة والصار بية وياك
و رغم جروح حبك يا نسيم البر
عشكك يظل عايش بيه يا قداح
شما طال البعد وياك وتأخر
ولون قيس بعشك ليلى تولع دوم
انه مجنون عبلة والاسم عنتــــــــر
للعلم القصيدة بقلمي
لكن اصبحت متداولة في اغلب المنتديات
لكن ليست بالصورة الكاملة واليوم حبيت انزلها
كاملة في منتدانا العزيز
اعذب تحاياي المعطرة بأريج الياسمين
كبريائي قاهرهم
رد مع اقتباس
المشاركة الأصلية كتبت بواسطة ملك الأحزان
