هنا

[سورين]

بالنسبة لأهل النجف الهم اسبابهم بهذا الفعل ولا تنسين ان المظاهرات بدون القليل من حالات الشغب غير مسموعة او مكترث لها.. مثلاً اهل البصرة من اقتطعوا الطرق الرئيسية وتهديد القطاعات النفطية ما هي الا وسيلة او ورقة ضغط ع الحكومة لان كانت هناك مظاهرات سلمية ولكن لم تكن مسموعة اي ليس لها ضغط ولكن عندما تم اضافة القليل من الشغب تم سماعها وتم ألقاء البال لها من قبل اهالي المحافظات البعيدة ومن قبل الحكومة.. وللأسف عند انتشار الانتفاضة بعموم مناطق العراق تمت محاربتها بقطع شبكة الانترنت من قبل وزارة الاتصالات ومنها السيطرة ع وسائل الاتصال الاجتماعي.. واحب ان اضيف ان المظاهرات باقية وتتمدد بكل مناطق البصرة وبسلمية تامة

نصف الشعب غاضب ع الانترنيت
رغم كانت خطوة لمنع الشائعات لا اكثر
كون اغلب الجالسين خلف مواقع التواصل ' مراهقين '

ما اعرف بشأن باقي المحافظات
وما اريد اصدق اي حديث يتناقل بدون رؤيته
نقلت الاوضاع السلبية بمحافظتي
من اجل اصلاحها لمظاهرات سلمية ومطالب واضحة

[سورين]

شوفي باختصار
الي عنده وعي وثقافة التظاهر ضد الظلم والاسبتداد والمطالبة بالحقوق عمره ما يخرب او يكسر ..
تدرين ليش ؟
لان طالع وعنده اهداف ومطالب مؤمن بيها وعلى هالاساس طلع
ولكن من يقوم بهالاعمال مستحيل يكون من المتظاهرين
مشكلتنا ما نتعلم من الماضي نهائيا .. طول عمرنا نوكع بنفس الحفر ونوكف ونرجع بعدها هم نوكع بيها
يعني كم مرة طلعت الناس مظاهرات واعتصامات وبكل مرة تستخدم الحكومة نفس الطرق لاخماد هاي التظاهرات .. وولا نتعلم ولا نحسب حساب انه الحكومة راح تسوي هالشي بكل تظاهرة.
لازم يطلعون ناس ويدخلوهم بنص المتظاهرين ... ناس تخرب وتكسر وناس تصيح بالروح بالدم نفديك ياهو الجان وناس ترفع علم داعش
مع كل احترامي : نفس الطاس ونفس الحمام
اسف على الاطالة بس هي حركة وغصة بالنفس تنتهي الى تساؤل : الى متى ؟؟!
تحيتي

من يكون المحرك الرئيسي لهذه التظاهرات هو حب الوطن والعراق
راح تنجح
لكن من تكون حباً بفلان وفلان ومن اجل البطون
فما راح يفلح اي شيء !

[سورين]

مثل مكلتي شباب طايشين ومايمتلكوون اي ثقافة والا شنو علاقة المطار حتى راحوو وخربو وصارت هاي الخسائر
شكرا حبيبتي

ربي يحفظ العراق ويستر ع ناسه
العفو يروحي

[CaSpEr]

نصف الشعب غاضب ع الانترنيت
رغم كانت خطوة لمنع الشائعات لا اكثر
كون اغلب الجالسين خلف مواقع التواصل ' مراهقين '

ما اعرف بشأن باقي المحافظات
وما اريد اصدق اي حديث يتناقل بدون رؤيته
نقلت الاوضاع السلبية بمحافظتي
من اجل اصلاحها لمظاهرات سلمية ومطالب واضحة

نصف الشعب غاضب ع فصل الانترنت بعموم العراق لأن وسائل التواصل الاجتماعي هي السبيل الوحيد لأنتشار اخبار المظاهرات كوناً ان القنوات التلفزيونية تابعة للأحزاب الحاكمة والحكومة ولأن كل القنوات المتواجدة تمارس التكتم الاعلامي ع المظاهرات ولا تظهر او تبث الا حالات الشغب بالمظاهرات..

واما عن باقي المظاهرات بباقي المحافظات احب ان اگول هي مظاهرات سلمية واي محاولات شغب تظهر بالمظاهرة ما هي الا محاولات المندسين من اتباع الاحزاب والمستفادين من هذا الظلم لقلب الطاولة ضد الشعب والمتظاهرين..

[سعد العراقي راقي*]

اخوي منتسب بجهازمكافحة الشغب
امس خطية اجه وايده مورمه---سالته ها شبيها ايدك
كال هجمو على بيت المحافظ وماخليناهم يدخلون للبيت
فيكول واحد صار من جانبي وضل يشمر طابوك على البيت
المهم وحده من الطابوكات(ثليثية) ضربت ايد اخوي
فيكول من كثر ماتاذيت رحت اضرب هذا المتظاهر بالعصا --فمن وصلته كال والله ما جان قصدي اضربك جان قصدي اكسر الجام بس اجت بالغلط ب ايدك
يكول كتله والله لو كايلي وانا مشتريلك جامة وكاسرها ولا كاسر ايدي
ههههههههههههههههههههههههه ههههه
-------------------
المشكلة يااختي مو بالتظاهرة لكن المشكلة هي انها مفتوحة ويستطيع اي شخص او اي حزب او اي جماعة استغلالها لتحقيق اهداف او غايات


تحياتي لك

[Hunter]

شوفي يروحي
اني اكره ايران للامانة
لكن من قامت الثورة الي كانت صدوگ مليونية ضد الشاه
اجة احد منهم ومسك قلم الشاه او حركه ؟!
هاي اموالهم كذلك وما استفادوا همة منها !
وللشاه كان معرض سيارات يضم الالاف منها لم تحرك ذرة غبار من فوقها !
ما الفرق بينهم وبيننا ؟!
كلنا بشر !
لكن الفرق بالثقافة :)
اني ما ادافع عن اي مسؤول لكن أنتقد التصرفات الي شوهت هاي التظاهرات بالنجف
ثم انتِ لو انتخبتي شخص ووصلتي للحكم
تتظاهرين عليه ؟!
بان دوش من الي صعدوا بأنتخابات النجف احرگ بيتها !
وضع غير عقلاني ابد !

فعلا كانت ثورة الخميني سلمية جدا جدا .. كلشي و لا معرض السيارات مالته

[سورين]

فعلا كانت ثورة الخميني سلمية جدا جدا .. كلشي و لا معرض السيارات مالته

شكراً للصور *-*
مع ذلك ما اتضررت ايران بوقتها مثل الضرر الي ديصير عدنا هسة
اني مو ضد التظاهرات
ضد مشاكل العنف والشغب لا اكثر

[الرميثي]

في محافظتي تم حرق بعض من بناية المحكمة وحرق مبنى بث تلفزيون محلي

[Hunter]

شكراً للصور *-*
مع ذلك ما اتضررت ايران بوقتها مثل الضرر الي ديصير عدنا هسة
اني مو ضد التظاهرات
ضد مشاكل العنف والشغب لا اكثر

يعني هسة الشعب الايراني بنفس انعدام ثقافة شباب النجف المفروض ..

مظاهر العنف هاي رح تنتج من تنفذ كل الوسائل وي الحكومة ماكو اي مظاهرة غيرت شي او ثورة حققت شي بدون مصار بيها تخريب و امامج ايران و فرنسا اذا تردين تتطلعين اكثر ع الي صار عدهم بدل كراج الشاه ..

اني ما اهتم لا لمظاهر العنف و لا التخريب كلها وسائل ضغط ع الحكومة لان محد يقرر يغير شي اذا تظلين 15 سنة تتظاهر بنفس الاسلوب لذلك اهتم بالمطالب و نوعيتها و منو الي يقود هذه المظاهرات و ترة النجف مو شيكاغو و لا البصرة دبي اثنينهن خرابة ترة من ورة الحكومة .. القبلها بدت مظاهرات جيدة لكن من ركب الموج مقتدى خرب الاول و التالي و استغلهم أبشع استغلال .. البناية تنبي ترة بس اذا ما ماكو روح ثورية و افكار تغير الواقع لو يطلعون بكلنس يتظاهرون ميتغير شي .. فالي يتظاهر و يطالب بتغيير و عنده قضية حتى لو ما قاري اي كتاب اكثر ثقافة و شجاعة من الي يقرة مئات الكتب

[انسان ثاني]

بصراحة استغرب على منْ يريد ان يعطي صبغة (الثورة) على هذه التظاهرات التي كانت من المفترض ان تكون سلمية ، الحكومة الفاسدة التي تطالبون بتغيّرها هي نتاج عرسنا الانتخابي ، و قائد الاصلاح هو احد اكبر رموز الفساد و لكن نحنُ من جعلناه ارنستو تشي جيڤارا الجديد و جعلنا من الحنانة بوليڤيا الجديدة ، مطار النجف ليس مطار حكومي حتى يتم استهدافة ، المطار هو استثمار تابع لمجلس المحافظة حصراً ، لذلك منْ تَهجم على المطار هو لم يضر حكومة بغداد انما اضر محافظة النجف فقط ، و هناك سؤال يدور في ذهني ولم اجد لهُ اجابة ، تم حرق منزل الشيخ فايد ، تم حرق منزل صادق اللبان (دعوة) ، تم التهجم على منزل بان دوش (مجلس) تم مهاجمة مكتب قيس الخزعلي (عصائب) ، حسب بعض المصادر (غير) الموثوقة انه تم مهاجمة بيت الحكيم في حي السعد ولكن الشرطة منعت التدخل ، طيب هناكَ ضلع مهم يسكن الحنانة لماذا لم يتم الاعتداء عليه ان كانت فعلاً المظاهرات ضد الفساد و الاعتداء جاء بعد ان طفح الكيل ؟؟؟؟؟