شكرا على النقل!
شلونكم درر هالتجمع العراقي الجميل
ان شاء الله الكل بخير
عندي فكرة حبيت اسويها ونشترك كلنا بيها ونتبادل الاراء والافكار والنقاشات من خلالها بحيث كل يومين او ثلاثة انزللكم موضوع بيها فد شي من حياتنا اليومية اغلبنا نشترك باستخدامها او التعايش وياها ونسولف ونتناقش ونتبادل الاراء ووجهات النظر من خلالها .. بس دورت ع السريع بين الاقسام ما لكيت القسم المناسب الي ممكن انشر بيه الموضوع واطرح عليكم الفكرة.
فكلت خلي انزله هنا لو يمشولنا اياه الادارة لو يسوولي باند لو يحذفون الموضوع لو الله يستر
الفكرة بالبداية اهم شي بيها هو التفاعل ما نريد نظل نايمين لو ندخل هنا للمنتدى بس نضيع وقتنا واحد ينشر موضوع وخمسين يجون يكتبون شكرا على النقل ويطلعون
وجودنا هنا هو تبادل المعرفة والثقافة ونتناقش ونتحاور ونطرح افكار ومشاكل وحلول لان بالنهاية احنا هنا اخوة واصدقاء واسرة متواضعة يجمعنا حب العراق والاخوّة الصادقة والمحبة والاحترام.
فمن هسة اكلكم الي ما يكدر يشارك الا بشكرا على النقل وماشابه فلا يتعب نفسه ويجي لان الهدف من الموضوع مو جمع مشاركات وبس لان عداد المشاركات لا راح يفيد ولا راح ناخذ عليه فلوس ولا احد راح يجي يصفك النا ويكللنا عفية بالبطل.
نريد نستغل كل وقتنا هنا بالفائدة والمتعة ونطلع بنتيجة حلوة بتواجدنا.
طولت عليكم ادري بس كلت خلي اتعب شوية بالبداية بالتوضيح احسن ما يضيع التعب بعدين بدون اي نتائج.
هسة هاي هية فكرتي اذا جمعنا 25 صوت موافق نبدي على بركة الله وان شاء الله من اول موضوع او موضوعين الكل راح يفتهم الفكرة.
لكم كل الود والتقدير والاحترام .
رد مع اقتباس
المشاركة الأصلية كتبت بواسطة رجل كهل
