شلون نتحكم بالشهية
اسباب الشهية المفتوحة كثير ،،، اما يكون خلل في الهرمونات وهذا لازم يتعالج عند الطبيب ،،، او يكون سبب نفسي وعاطفي ،،، وهذا السبب اغلب الناس تعاني منة وصاير اسلوب الحياه عدهم مثلاً : شخص متعود لما يعصب ياكل ،،،، او من تسوء حالتة النفسية ياكل ،،، او من يتعب هواية ،،، ياكل ووووو غيرها وغيرها ،،، قلة شرب المي ايضاً تحسسكم بالجوع ،،، هاي كلها اسباب وهمية واساساً ماكو جوع مجرد تعوّد ،،، وعلى فكرة ترا هذا مو حل للمشكلة راح يزيد الوزن ويصير خمول اكثر وراح تسوء الحالة اكثر واكثر
من تحسون بالجوع العاطفي (الوهمي) اول شي اشربوا مي ،، وممكن تتمشون ،،، تسمعون موسيقى ،، تلعبون رياضة ،،، سووا الهواية اللي تحبوها ،، رسم او قراءة او رقص او اي شي تتونسون بي ،، مو كلشي اكل وكأنو الاكل هو محور الحياة
العزيمة والارادة : اذا انتو بداخلكم مقررين تحافظون على صحتكم ولياقتكم ونشاطكم ،،، راح يكون هذا اسلوب حياتكم ،،، مو مجرد عندي كم كيلو زيادة انزلهم بأي طريقة وارجع لنظام التخبيص ... والمعدة المسكينة ماتعرف شنو تهضم حتى تهضم ،،،
الشخص اللي هدفة ينزل كم كيلو،،، عايش بدوامة ،، عند اول رقم بالميزان ما يعجبة يضعف ويستسلم ،، ويتنقل من رجيم لرجيم علمود ينزل بأسرع وقت واسهل جهد (بأقل الخساير بنظرة)
شنو نبقى كل عمرنا رجيم (اكثر جملة اسمعها) لا حبايبي ،، اللي نزل وزن ويريد يحافظ على وزنة وصحتة واللي ماعندة زيادة ويريد يحافظ على وزنة وصحتة ،،، الحل الامثل:
يكون اسلوب حياتنا 70% الى 80 % اكل صحي و 20% الى 30% اكلات نحب ناكلها ،،، يعني
نحاول دايماً نختار الاكل الصحي مشوي بدل مقلي ،، قليل الزيوت ،، بدل المخبوزات والبسكت الابيض نختار الاشياء بالقمح وكاملة الحبوب ،،،، نشرب كميات كافية من المي ،،، نكثر من اكل البروتين لان يشبع اكثر وصعب جداً الجسم يحول البروتين الى دهون الا اذا اكلتوا بكميات خيالية ،،،، ناكل الاشياء اللي بيها الياف عالية مثل الفواكه والخضار ،،، نحاول نزيد من حركتنا ونشاطنا اليومي بالمشي او ممارسة الرياضة ،،، ناكل دهون صحية بكميات معقولة ،،، نبدي نقلل شوي شوي من كمية الملح والسكر (مصيبة السكر لان صار موجود بكل المنتجات) بأكلنا علمود نتعود على الطعم الجديد ،،، وتقللون من السهر لان من تسهرون تاكلون اكثر والجسم ما ياخذ كفايتة من النوم وتقل قابلية الجسم للحرق ،،،، لا تخلون نفسكم تجوعون لازم تاكلون وجبات صغيرة ومتعددة مثلاً كل 3 ساعات. ... هاي تكون النسبة الاكبر من حياتكم اليومية ،،، ومافي مانع انو ناخذ ايس كريم من يعجبنا او قطعة كيك او قطعة شوكولا،، او حتى اذا طبخة نحبها ناكلها مرة بالاسبوع ،،، يعني نراضي نفسنا بس بأعتدال
اول فترة راح تحسون بجوع هواية وبصعوبة هذا النظام وتتلوون على السرير من تريدون تنامون بس فترة بسيطة وبعدها تحسون شكد انتو مرتاحين وصحتكم احسن
صدقوني لو كلنا مشينا بهاي الطريقة ،،، ماراح تصير سمنة ولا نحتاج رجيمات ولا راح نتمرض ونحتاج اطباء ،،،، اغلبكم امهات غيروا نظام حياة عيلتكم كلها،،، ذولة الاطفال خليهم يعيشون حياة صحية ويتعودون على نمط حياة صحي ،،، ترا هذا التخبيص اللي احنا عايشين بي بسبب تعود على اكل غلط ومن كبرنا طلعتلنا المشاكل وصرنا ندور حلول،،، اتمنى تكون وصلتلكم الفكرة واتمنالكم حياة كلها صحة ورشاقة
رد مع اقتباس
المشاركة الأصلية كتبت بواسطة Haidar Iraq
