مرحبا
حبيت اكتب هالشي الى احدى صديقاتي لان عدها ظرف زغير بس هي تحس انو الحياة قفلت بوجها
وهم ولكون مطلوب التفاعل في هذا القسم حبيت اشارك في هذا الجزء من حياتي وهو الي اسمي انكساري او ضعفي
بلشت حياتي الاسودادية هي من اخر يوم في ٢٠١٤ هو جان يوم خميس لما رجعنه من الدوام انا واختي ومقررين نحتفل وكذا لكن الي سويناه شنو
انا رجعت بدلت ورائساً للموبايل
واختي ابقي بملابسج مال دوام وهم كمشي موبايلج وكعدي
ف للمغرب واحنه ولا عبالك اجه بابا صاح علينه مسمعناه ضاج كلش واجه رزلنه وسحب موبايلاتنه وشاف اختي بملابس الدوام كال دوام ماكو بعد موبايلات ماكو هم ف كضينه يومنه بجي بحيث نمنه ب ٨ وماندري بنفسنه وراحت علينه حفلة راس السنة
يومين واحنه نبجي ونريد بابا يوافق نرجع للدوام ف توسلنه بماما تكلمه ف لما راحت تحجي رحت وراها اسمع شتكوله وشيكول هو
ف كالها : صدك جذب انتي تدرين انا اريدهن يكملن دراستهن ويصير براسهن خير بس جاي اخوفهن
ورجعنه دوامنه وموبايلاتنه رجعت ..
ف الحمد الله عدت اول مشكله على خير ...
بعد كم يوم في ٢٠١٥/١/١٥ يوم الجمعة ساعة ٩
جانت امتحانات نصف السنة انا رابع واختي ثالث متوسط
سهرانين ابوية مو بلبيت امي جانت بلصالة ويمها صوبة نفطية كلش بارده جانت الدنيا
وانا واختي بغرفتنه هي تقرة وتراسل صديقتها
وانا اتفرج تلفزيون
طبعا بوقته ترزلنه من ماما لان كلش ضحكنه اهواي
بعد نص ساعة راحت اختي تشرب مي ف غضون دقيقة بس
وما اسمع الا الصريخ ..... انا طفيتها
الي صار حادث حريق اختي وماما
اختي ٥٠% من جسمها ودخلت مستشفى
وماما رجلها اليمنه وايدها اليسرة تضميد وعلاج ورجعت للبيت
طبعا عشت في هالفترة ٤ ايام من الشغل ودراسة وماكو نوم وقلق
اليوم الخامس الي ع اساس تطلع اختي من الغرفة المغلقة مال الحريق الى غرفة عادية
وصل خبر انو العمر الكم
بلشت التعب الحقيقي والوحدة انو اختي الوحيدة الي مجان اكو بحياتي ساعة مابيها هي ... راحت
في اليوم السادس بلليل اتصال من المديرة انو لازم اجي باجر وامتحن ست مااكدر وماريد كالت ماكو غصبا باجر تجين تتمتحنين ل ٥ مواد
يوم السابع رحت امتحن
رجعت للختمة ونسوان وهوسة
اجتي مرة جوارين تسلم عليه
كالتلي : حبيبتي خالة انتي هسه الوحيدة الاهلج صبري امج وصبري ابوج
قهرتني كلش باوعت بعيونه وكتلها : زين خاله انا منو اليصبرني
هنا اكثر موقف عشت بي ضعيفة بكل حياتي
ثاني يوم ابويه جان مريض ومياكل من اكل الفاتحه ف لا من بيت جدي ف كتلهم خلص راح انا اطبخ سويت الغده و حميت ماي اريد اشرب نسكافية
ف الماي كلش حار جان خليته بكلاص شلت الكلاص دامشي جان يطك الكلاص وينكسر من حروره الماي و وكع على رجلي و ٣ ايام انا محروقة وما احجي الاهلي اخاف عليهم ينهبطون الى ان الحرق ورم ف حاؤلت من علاج امي اداوي وشافوني
بعدها عدت ايام رحت اجيب النتيجه ناجحة ومعدلي ٨٧
رجعت من المدرسة وحدي
وجان اشوف ثنين بنات زغار اعمارهن ٧ _ ٨ الله شاهد عمري كله مشايفتهن جان وحده منهن كالت : انتي زهراء
كتله اي كالت انتي خطيه جنتي ويا اختج وهسه وحدج
بعدها صدك عشت الوحدة وصرت انطوائية واقفل الباب ع نفسي واكعد وحدي وبجي وهالسؤالف
كذا يوم عدن
اجه ابوية كال انتي تعبانه باجر نروح نزور شكو مرقد بلحلة بلكي تتغير نفسيتج
اجه باجر ورحنه
زرنه ٣ مراقد
وجاي نمشي بطريق دولي وفارغ الشارع ومااحس اله ...
اصرخ وجاي اعين بابا يوكف السيارة
نزلت بسرعة وشفت رجال مدمه
التفت سيارتنه تفسيخ كيف طلعنه منه ماعرف
بابا خدوش وجروح سعف الرجال واخذو حبس
والرجال كبير بلعمر بل انعاش هو سابقا مريض ونصحو ان يلعب بايسكل وهاي اول مرة اله يصعد بايسكل
وكذالك صعدنه هو الي اجه علينه
و انا بقيت وحدي يم ناس ماعرفهم وطبعا بين المرور والشرطه وهوسة التحقيق وحدي
المهم
عدت ايام من التعب الشديد وابوية بلحبس لان الرجال بين الحياة والموت والقضية واقفة
بعدها ٣٠ يوم طلع ابوية بكفاله
وراها بيومين توفة الرجال الله يرحمه
حساب اختي في الدرر https://www.dorar-aliraq.net/member.php?u=62902
امممم هاي المواقف من اذكرها احمد الله لاني قوية
لاني اجتازيتهن صح مو بسهولة بس عدن
و الله سبحانه وتعالى مايكلف نفس الا مافي وسعها
طبعا العبرة مو احزنكم
لكن دائما من شاف مشاكل وظروف غيره هانت عليه مشاكله وظروفة
ف الحمد الله على كل حال
يبعد عنكم ربي كل هم وكل مشاكل
رد مع اقتباس
المشاركة الأصلية كتبت بواسطة Haidar Iraq
