السلام عليكم
قبل سنة ونص اشتريت سيارة من نوع تويوتا لونها احمر، موديل 1995 ( يعني من التراث).. صاحبتها ماخذتها ورث من امها اللي بدورها هم ماخذتها ورث من امها... باختصار احلى من سيارة سامر المازدا (اضغط هنا)
دفعولي بيها بكد سعرها مرتين ورفضت ابيعها.. وقليل اسوقها لان اخاف عليها
من ضمن اللي يريدوها ويلح علية يشتريها هو الوالد الكريم.. واني رافض كل انواع الترغيب ومتحمل اساليب الترهيب وما زلت صامدا امام كل المغريات
اخر مرة الوالد اخذ السيارة وطلع بيها، وطبعا بدون علمي ( بناءا على قاعدة انت وما تملك لابيك ).. ما عرفت السيارة طالعة الا لمن اجتني رسالة عالايميل بيها فاتورة بمبلغ حوالي 10 دولار.. تكلفة وجود السيارة بالباركينك( موقف السيارات) وهو مبلغ لازم اني ادفعه
المهم من رجع الوالد بالسيارة كان معصب ويدردم وشمر المفاتيح علية وصاح بعصبية ( هاك سيارتك...انضربت)
بعد ما استوعبت كلامه وصحيت من الصدمة سألته شنو صار؟ وين انضربت؟ منو ضربها؟
تكملة الحوار ( بالازرق كلامي):
- غير مخلين عمود بنص الموقف!
- وانت شعليك بالعمود؟
- ردت اطلع ضربته وانحكت السيارة بالعمود شلون اشوفه وانت تارس السيارة مرايات!!!!
- اذا وية المرايات وما شفت العمود.. شنو تسوي اذا ماكو مرايات؟
للعلم السيارة بيها 8 مرايات، 3 من كل جهة و 2 بالداخل
اريد اعرف هو معصب علية لو على السيارة لو على العمود؟اكيد مو على نفسه..لان هو مو غلطان!
يلا يولي العمود..المهم سلامة الوالد
رد مع اقتباس
هع
..هاي حاسدينها سيارتك جايبتلك العين