ارسم صورة
شتحب ارسم ؟
ارسم صرح الحب الصادق
واكتب تاريخة ودستورة
قيس وليلى؟
قيس اتهجر
وليلي ليومك مقهورة
عبلة وعنتر؟
عبلة انخطفت
وعنتر نايم ما يدري ويشخر
حيل اتأثر
ما متخيل
شيبوب الماخذ كرسي ويتبختر
شبيك وليدي
ارسم اي شي
راح ارسملك طفل اعراقي
شاطر كلش
عاف اكتابة وكظ المسطر
وراح ارسملك اخوي الاكبر
متخرج ذاك اهوة مكتر
ياباب يدك
والمسؤل يكلة اتعذر
خلص صبرة
تعين جندي
اول راتب جانت عبوة
بنص الشارع دمه اطشر
وراح ارسملك اخر صورة
صرح الحب الصادق امي
التاريخ لعتبتها يقبل
شربت ضيم الدنيا بكبرة
بس ما شربت كاس الذل
ودستورك ماحل مشكلتي
خلي يحل مشكلتة الاول
بعدين لمشكلتي يحل
رد مع اقتباس
