اطكها امن العماره الارض الاهواز!حسين الساعدي
انه اجنازتي المعتازه جناز
بعد ذاك العزيز اللي دفنته
هسه ابعازته و للفزعه معتاز
لاواني زماني وما كدرته!
ضل ايعيل بيه و هسه ماجاز
يريد ابثاره وتعنه ابحربته!
كَسَرني وتركني ابغير عكاز
وعافاني ابدرب عله ابعثرته!
شيرجع ايامي وذيج الاعزاز
إويكَسرون الزمان الما كسرته!
جنت ابزودهم ومسوي الاعجاز
وشحده الزمن يلعب لعبته!
اطكها امن العماره الارض الاهواز
وفنه الما يلاكيني ابضحكته!
انه اللي جنت بالعركه فواز
افوز ابيومي كله وما خسرته
بمطارد الخيل وصيدة الباز
ازامطهم شلع والكاس اخذته
بالطره والكتبه اوكفة الكاز
يخسر روحه يمي الما غلبته!
حسبالك خزرتي اتكول هزاز!
اخليه يرتجف ياهو الخزرته!
كل هاي الرجال ابصفي تنحاز
واليعاديني ! مفضوح ابدمعته
اكرفهم كرف وبايدي الانجاز
واخلي اليشرد ايفوز ابشردته!
احيرهم اتحير مثل الألغاز
الما يكحمها يحتار ابصفنته!
جانت ناري بيدي وانه خباز
يزلف عالدرب ذاك الخبزته!
يضحكون الضحكتي وصوتي فزاز
يفز كل المضيف اللي حضرته!
جنت ابوكفتي ينطون الايعاز
لحد يبقه مرتاح ابكعدته!
ياصيتِ العرب كلها اويه شيراز
اليذكر اسمي! مخنوك ابعبرته!
لان ما قابلاني الفارس وفاز
سيفي اليوصله ابشكت دركته!
جنت العب لعب وبكلشي ممتاز
ومهجور الدرب ذاك الكطعته!
جنت ابعينهم بعيوني غماز
وشحده اليقابلني ابغمزته!
هسه الحجي الصار ابعيني بزاز
واغلس واسكت وماجن سمعته!
اغلس عالحجي وما جن سمعته!
حسين االساعدي
رد مع اقتباس
المشاركة الأصلية كتبت بواسطة حسن هاشم
