متاهات
البارت الاول
_لج صبا فضيها موتيني شكد تسألين
_غير نفتهم راح نكعد اكثر من اربعين يوم...بعد لمن نسأل
_لعد شكو مخلين مدرسيين خصوصين
_حبي هاي انتي مخلية...اني ماخليت مين ادفع اقساطهم...
سكتت هبة...جانت اقرب وحدة من صديقاتي لي...وتعرف وضعنا المادي زين...واعرف ماتقصد تحرجني بس هية من اهل الله مثل مانكول..يعني الي بكلبها على لسانها
_يلا هباوي خلصت امشي....
جان اخر يوم لنا بالدوام استلمنا بطاقات الدخول...
وعرفنا يامدرسة راح نمتحن...
وهم جان عندي كم سؤال من قريت وكفت بيهن
فسالت المدرسات...
_هبة عود امر عليج اخذ منج الملخصات مال المدرسين تفيدني
_صار حبي...بس اريد اعرف شلون تفتهمين على المدرسات ...اني ولا اعرف اركز وياهن
_لازم اركز ماعندي غير حل ...
جنا نمشي اني وهبة بأتجاه الباب الخارجي...
_اكولج صبا صدك شنو تتمنين اطلعين
_اريد كلية تربية
_شمعنى
_مستقبلها مضمون...ودوام المدرسة من تتعيين مريح ..
دوامنا ل١٢ الظهر وعدنا عطلة اخر السنة..وهم عطلة نص السنة...
_هههه...شكد عجوزية...هو مايرهملج بس هيج وظيفة
_حبيبتي على الاقل اضمن اتعيين ...
جنت احجي وياها ومدنكة على جنطتي اكلب خاف نسيت شي...
عندي نسيان مو طبيعي....
_لج صبا باعي هالحلو...
ما رفعت راسي لان اعرف ذوق هبة ادور ذولة الكيكية...ابو كذلة ومحفحف حواجبه ولابس بنطلون حصر...
_صدقة لله شوفي خصلة الشيب الي براسه...
جنت بعدني ملتهية اكلب بدفتر الرياضيات...
_ها كمتي تباعين على الشياب هم
_لا لج هذا مو شايب شاب بس اكو خصلة شيب براسه
رفعت راسي اباوع ...شفت صدك ولد مرتب كلش
مانكدر نكول وسيم بمعنى الكلمة لكن شكله رجولي
رغم مبين صغير....
_هاي يسموها شعلة ..تصير ولادية
هو جان يباوع على البنات من طرف عينه ويدخن ومرتجي على سيارته ....
بس حسيت اني اعرفه...وين شايفته ما داذكر...
شوي وشفت اخوية مهند تقدم بأتجاهي...
_ها صباوي كملتي
_اي شو هنا شعجب...
بهالاثناء ترخصت هبة وراحت لان ابوها اجى عليها
_مريت اني وهشام منة وشفت البنات يطلعون كلت اخذج بطريقي...حارة والبيت بعيد
_اي والله تسوي فضل
مشيت وراه ما اشوف الا تقرب من الولد ابو الشعلة
واني اكول وين شايفته....
سلمت عليه ...جاوبني بدون مايباوع علية
صعدت ليورة...وصارت كعدتي بورة اخوية مهند
الطريق كله اراقب هشام...جانوا يحجون سوة على شغلة ....
اكيد مايحس بوجودي...شراح اجي يم الي يصادقهن.
شكل مرتب وفلوس وشخصية...
راح يباوع علية ...واني صدريتي نفسها صار تلث سنوات حتى لونها راح من كثر الغسل ...
استغفرت ربي ودرت وجهي على الجامة...
وصلنا سلمت ونزلت....لكيت امي وابوية كاعدين بالمطبخ...اصلا بيتنا عبارة عن غرفة صالة بسيطة
ومطبخ وغرفة نوم صغيرة لامي وابوية وغرفة فوك لمهند واحمد اخواني...
واني انام بالغرفة وية امي وابوية... ابوية رجال جبير بالعمر...
_السلام عليكم
_وعليكم السلام...جاوبني ابوية
_هلا يمة...شو صوت سيارة
خليت جنطتي على الكاونتر...وتقربت اباوع شكو بالجدر
_اي مهند مر علية هو وهشام
_ليش مانزل لعد...سألني ابوية
_ماعرف ...دخلت وعفتهم يحجون
رحت بدلت واجيت اساعد امي حتى نصب غدة..
دخل احمد...السلام...
_وعليكم
احمد...ميت جوع شطابخين
صبا ...مثل ماتشوف يابسة وتمن
احمد ...اهووو هم فاصوليا
ابو مهند...كول ياالله ابني نعمة الله
احمد...عرفنا نعمة الله...بس شوكت الله يفرجها علينا..
عافنا وصعد لغرفته...
احمد اخوية اكبر مني بسنتين صف ثاني ادارة واقتصاد....ودائما متذمر على وضعنا ويباوع لفوك ويريد يصير عنده فلوس وخاصة من يشوف هشام ولبسه يطك قهر
بينما مهند اخوية الجبير...رابع هندسة...كلش قنوع وحباب...وكل همه شوكت يتخرج حتة يشتغل ويساعد اهلي...
طبعا هو فترة العطلة يشتغل وية ابوية بمحل نجارة...وبالدوام هم بس عصريات
هشام مو بس صديق مهند لا...
اقارب ابوية من خواله...بس ما اشوفه هلكد من يجي راسا يطلع وية مهند...واذا دخلوا للبيت ادخل للغرفة...يعني شايفته من اني صغيرة بس
اما ابوية...اوووف شحجي عنه....رجال فقير كلش
جان وحيد اهله ابوه مات وتركله معمل ومحل نجارة ...وبيوت مأجرة غير بيت رنان ساكن بيه...
بيت عمه لافوا عليه...وزوجوه بنتهم ...
هو اصلا جان يحبها...بقت مزوجته سنتين ماكو اطفال..
خلال هالسنتين...بيت عمه ناموا براسه...
ومرته جانت تاخذ منه وتنطي لاهلها....لحد ما صبح يوم لكى نفسه مديون...باع المعمل ...
وطبعا الي اشتراه ولد عمه بالكسران...
وبقى على المحل...بس هم انطلب لان مرات يجيب
فلوس طلبية...تاخذهن مرته يوميا بحجة شكل
وهم باع كم بيت الي عنده حتة يسد الدين...
ومن مابقى لا وراه ولا كدامه وصار مطلوب
راد من مرته تبيع ذهبها يفك الدين ...
تعاركت وياه...وزعلت يم اهلها...
واهلها رادوا منه يسجل البيت العايشين بيه بأسمها...
بيبيتي من شافت بهالشكل عرفت قصدهم
كالت شكد نصحتك منهم ماسمعت ...
البيت جا
ن باسمها كامت باعته وانطت فلوسه للناس
وراحت تريد ترجع مرته ...ماقبل ابوه
ا كال بنتي
متعلمة على العز...
وطلبوا يطلكها...بعد ماخذوا المؤخر كامل...
يعني هجموا بيته ومصوا دمه يلا عافوه
بعدها بيبتي شافت مابقى عدها شي هنا ....
اخذت ابوية ...ورجعت لاهلها...همة ابغداد...
وهية جانت مزوجة بغير محافظة ....
اهلها ساعدوها وية الكم فلس الي عدها فتحوا محل واشترت هالبيت....
وبعد فترة طويلة يلا قبل ابوية يزوج بعد صدمته بمرته وبنت عمته...
اخذتله امي وحدة من اقاربها...وماخلفت بس احنة التلاثة....
وطبعا ابوية بقى نفس فقر الطباع...ومحله يدوب جايب العيشة وايجاره...
تغديت ورحت للغرفة ...جانت كنتور وتعلاكة وميز تواليت...بس مابيها جرباية ...
نمد فراش بالكاع وانام...حتة يبقى المكان واسع...
تمددت واني صافنة على السكف....
هسة هاي شنو مواصفاتها الي ممكن يباوع عليها هشام....
اكيد يريدها حلوة....واهلها مركز ومال...
كمت من مكاني واباوع على نفسي بالمراية....
حتة ماملك جمال قوي...شكلي عادي...
يجوز لو شوية اعتني بنفسي....ومكياج يطلع بية شوفة...
ضحكت....هاي شبية اليوم تخبلت....
خلي رجلية ثابتة على الارض...لا اباوع لفوك لا تنكسر ركبتي...
خلصت العطلة بين المراجعة ومساعدة امي بالبيت...
بس بقت شوفت هشام بذاك اليوم ابالي....
وبقيت من يجي اراقبه من ورة الشباك...
ماعرف ليش ...قبل ماجنت مخليته بفكري...
بس من شفته شلون يباوع بيومها للبنات بتكبر..
من شفت وكفته بشموخ وهيبة...
بقت هالصورة ابالي...
قبل الامتحانات ...نعزمنا بمهر اخت هشام...
جان اسمها رند .
مهند...باجر ترحين للمهر صبا مو
صبا...لا مهند عندي مراجعة
مهند....لا عيب حبيبتي...ام هشام بنفسها عزمتنا
صبا سكتت ماردت اكوله شلبس...
صبا...مهند وصلني لبيت هبة اريد اخذ ملخصات منها
مهند...يلا امشي..
وصلني بطريقه...طبعا مشي ماعنده سيارة..
بس بيت هبة مسافة عن بيتنا واني مامتعودة اطلع وحدي...
مهند...نص ساعة وارجع عليج..
دكيت الباب طلع ابوها ...ورجع صاحها...
هبة...هلو حياتي ...شلونج
تلكتني تبوس بية...
صبا...شلونج هباوي
هبة...بعدني اصارع وية المدرسين من جهة واهلي من جهة ثانية
صبا...قصدج بعدج على خبالج..
دخلنا للصالة...والله لو علية اي معهد كافي
المهم ادخل لعالم الجامعة...واصيدلي عريس زين
ياتعليم يابطيخ
صبا...مو اكلج خبلة..
هبة...هسة عوفينا من هالحجي ...كوللي ليش ماكلتي
تعرفين الحلو
صبا...لج ياحلو
_ابو شعلة بيضة
_ها...ماعرفته ..صار هواي ماشايفته
_ليش شيصير منكم
_اقاربنا
_بس مبين طاك
_اي زين وضعهم
_شبيج يابختي لعد ...ماكدرتي تلوفين عليه
_شالوف...ماشوفين شلونه
_وانتي ماقاصرة بس انتبهي لنفسج...
_ما اعرف هالشغلات...وحتة مااشوفه من يجي
_تحيزي فرصة وخلي ينتبه عليج
_هسة باجر عدهم مهر اخته
_اي روحي غيري جو
سكتت...شبيج صبا
_اكيد راح تكون حفلة جبيرة..واني مامحسبة حسابي
_يلا يمعودة...كومي وياية
_وين نروح
_دكومي...وين قابل اختطفج
اخذتني لغرفتها...فتحت الكنتور...اختاري فستان يناسبج
_لا هبة شنو تحجين
_لج خبلة اني وبنات خالي دائما نتبادل ...يعني عادية المسالة...
بس كوليلي...هية حفلة بس بنات
_اي
_خلص لعد...باعي هذا الفستان جديد لبسته بحنة اختي تخبلوا عليه
جرت فستان وردي قصير ...فرشته كدامي على الجرباية..
جان مخصر لحد الخصر بعدين يصير كلوشة لحد الركبة...
بسيط بس قماشه محفر منه وبيه...وردن طويلة خفيفة ...
_انتي قياسج مثل قياسي...
راحت لميز التواليت وطلعت ماشات كرستال صغيرة ...
_انتي شعرج سرح لفي اطرافه...وارفعي خصلة جانبية بهاي الماشات...
ظلينا بعدها نسولف شخلصنة مواد مراجعة..لحد ما اجت امها كالت اجى اخوج...
وصلتني للباب..انطتني علاكة... من وصلت للبيت وفتحت العلاكة...شفتها حتة حذاء عالي اسود مخليتلي....
كيفت...غسلت ولفيت اطراف شعري...صح هو مو طويل يوصل جوة كتفي بشوي...
بس لونه حلو كستنائي وسرح...وبقيت لافته ثاني اليوم للعصر لان الكعدة العصر...
مهند...اتحضروا اخذكم فد ساعة النوب..
صبا...نروح كيات لو تاكسي..
مهند...لا هشام راح يوصلكم...
ام مهند...لا يمة عيب راحيين لمهرهم وهو يوصلنا
مهند...يمة هو جاي علية ...وكتله راح اوصل امي وصبا...كال اني اوصلهم ونطلع مناك لشغلتنا..
جنت استمع لهم واني كلبي يدك واحس يعرفون بشنو افكر...
رحت لغرفة امي لبست الفستان وفتحت شعري...
بس رفعته بكتر وهناك اعدله...
طبت امي...لج صبا مينلج هذا الثوب...وشنو لابسته هالكصر
صبا....على كيفج يمة لا يسمعوج...ليش هالصوت العالي
هذا الثوب من هبة البسه وارجع لها
ام مهند...مو عيب يمة تاخذين منها
صبا...لعد.شسوي ماعندي ...ومهند الح اروح للحفلة
ام مهند...جان كلتي يمة ابوج ياخذلج واحد
صبا...ابوية هالشهر يريد يجمع حتة يسوي السطح...موشفتي خر بالشتى
ام مهند...اي والله يمة صدك...يلا من ترجعين باجر ودي لها...
بدلت امي...واجى مهند كال هشام دينتظر...
لبست صاية فوك الفستان وشال..
وطلعت واني ابين متماسكة...بس بداخلي خوف غريب...
هالمرة صعدت اول وحدة بحيث صرت وراه
و
الطريق كله ابد ماشفته رفع عينه علية...
وصلنا وراحوا...تلكتنا اخته لارا صف ثاني كلية علوم
ورحبت حيل بينا بشكل غريب...
جان بعد ماجاي هلكد ناس...بيتهم جبير ماشاء الله
امه طبعا تعرف امي...بس اني ماشايفتهم لان ابد ما اجي وياها
ام هشام...هاي صبا...ماشاء الله صايرة مرة
ام مهند...اي خية هنة البنات يفورن بسرعة
لارا...تعاي فوك بغرفتي عدلي نفسج
وقبل ما اصعد سمعت ام هشام سألت لارا عنه
لارا...ماما كال رايح ويجي من تخلص الحفلة
دخلت غرفتها...ظليت اتفرج على الجمال ..غرفة تركية بناتية حديثة والبردات وردي متوالمة وية الفرشة مال الجرباية...
ميز التواليت مليان مكياجات وعطور اشكال والوان..
انتبهت على صوتها...
_تعاي صبا اخليلج شوية مكياج
_لا عفية مامتعودة
_هية حفلة حبيبتي وبس بنات
كعدت خلتلي شوية باودر وكحل والاينر...وحمرة خفيفة...بس ماقبلت ترسم عيني...
_شوفي شلون حلو طلع عليج
باوعت على نفسي بالمراية...صدك هواي تغير
_من اتدخلين كلية لازم تسوين حواجبج...ترة يقلدون عليج...
باوعت عليها....شعر ميشته ويخبل وعيون صفر مجرورات وبشرة حنطية صافية...
جميلة اقل مايقال عنها تشبه امها...بينما هشام مايشبههم ....
صاحوا عليها جوة....ترخصت وكالت اخذي راحتج
فتحت شعري ورفعته من جهة...وباوعت شكل ثاني افتريت حول نفسي....
صدك الترتيب هواي يغير من شكل الشخص...
ظليت اتفرج على الغرفة...بس حسيت لارا تأخرت
طلعت من الغرفة اريد انزل...
جان عندي فضول اشوف غرفة هشام...بس باوعت
شفت كم باب مسدودة كلت قابل افتحها كلها..
وبعدين شافني احد خل احترم نفسي وانزل..
المشكلة ماجنت اعرف امشي بالكعب العالي وشكد
دربت نفسي البارحة بس هم مو هلكد مسيطرة
وية مادانزل سمعت صوت وراي منو انتي
ارتبكت ردت اسرع بالنزلة وية استعجالي...عثرت باول باية....
وتستمر الحكاية.....
رد مع اقتباس
