المشاركة الأصلية كتبت بواسطة وسـام
المشاركة الأصلية كتبت بواسطة وسـام
امس سمعت قصه اغرب من الخيال من شاب وسيم جداً قبل اربعتشهر متزوج ومطلك
اربعتشهر ياظالم البخت ؟!!
گال أسمع خال خلي اسولفلك
گال اني ابن فلان وانته تعرفه أكيد .
گتله أكيد اعرفه ابوك رجال علم بالبصره ومتمكن وسمعته ليره ذهب .
گال من تخرجت من كلية الهندسه ابوي اشترالي قطعة ارض وبناها بيت رنان وسجلها بأسمي وگال هدية نجاحك .
زين وشنو علاقة الطلاگ بهاي السالفه ؟
گال خال اسمع لاتستعجل .
وراها بسنه بالضبط بعلاقات الوالد تعينت بغاز الجنوب وراتبي خير من الله اضافة الى شغلي العصريات بالشركه ويه والدي ،
الوالد يلح على زواجي واني رافض وعباله اكو وحده مرتبط بيها وكذا واني ماعندي احد الله شاهد ،
المهم گتله حجي شوفلي بنيه على عرفك من هاي معارفك الخيره
وفعلاً صار الراي على بت شيخ فلان الي بنته ماشايفه باب البيت ولامخلصه دراسه بالسادس ابتدائي تقره وتكتب بس ومبطلينها ،
وصارت القسمه بخلال 15 يوم وتزوجنا وعدل وگبل لبيتي الجديد .
البنيه مواليد 98 وجميله جداً
وماتعرف كل شي گلت اربيها على أيدي والله رزقني بيها .
خامس يوم الزواج اكتشفت انه البنيه تحك بجسمها ليل ونهار وحتى دم يطلع منه !!
يابه شكو گالت حساسيه
گتلها امشي اليوم نروح لطبيبة جلديه ونشوف شنو العله
دخلنا انا وياها للدكتوره وبدت تكشف عليها وباوعتلي الدكتوره بنظره عجيبه
گالت انته شتصير الها ؟!
گتلها زوجتي وصار اسبوع من تزوجنا .
گالت هاي البنيه وين چانت محبوسه ؟
گتلها دكتوره هاي بت شيخ فلان وبيتهم قصر ،
گالت هاي البنيه بيها حشرة ( القراد ) الي تصير غالباً عند السجناء الي يتعرضون للرطوبه و ميشوفون الشمس فترات طويله ..
المهم تقبلت الأمر لأن آني اعرف ابوها واخوانها متشددين كلش والدكتوره كتبتلنا علاج وعصارات وبدينا نتعالج وبدلنا كل الفراشات والحمد لله صارت زينه وراح منها الگراد .
ومشت الامور على خير
البنيه طباخه ماهره ومدللتني فوق التصور
.............
يتبع
المشاركة الأصلية كتبت بواسطة وسـام
واني هم حبيتها البنيه ودللتها وماارفضلها طلب على الرغم هيه بت خير وماتطلب اشياء هواييگول انه هم اشتريتلها ايفون 7 وشريحه جديده وعندي نت بالبيت
وكل شويه اتصل عليها واني بالشغل واشوفها شمحتاجه وشلونها وماشيه الأمور ،
كل يومين يخلص رصيدها يابه ليش گالت وحدي بالبيت واستاحش واتصل بأمي وخالاتي ونسولف ويخلص الرصيد ،
يابه مو عدنا نت حطي واتساب او فايبر وسولفي على راحتچ چا احنا المن ندفع اشتراك ؟
گالت ماأعرف انته سوي اليه
وفعلاً نزلت الها برنامج واتساب وفايبر
وره كم يوم گالت نزلي ماسنجر لأن كل خالاتي عدهن ماسنجر ومسويات گروب ونسولف بي وهم اتفرج على مقاطع بالفيس اضوج وحدي ،
وكان لها ماتريد نزلت فيس وماسنجر وضفت بس خالاتها وغلقت طلبات الصداقه والمتابعه .
ومشت الأمور شهرين وشويه
يگول ذاك اليوم هيه بالمطبخ تسوي ريوك واني متأخر ع السايق مال الخط ففتحت الكنتور اطلع لباس وفانيله جدد حتى ابدل ولبست وتريكت وطلعت وبالدوام حسيت هاي الفانيله عريضه حيل عليه
بالدوام رحت للتواليت باوعت عليها وتعوذت الشيطان وسكتت گلت اكيد عرضت وسومر لونها من الغسل والماي المالح ،
ونسيت السالفه .
ذاك اليوم فاتح الفيس مالي وشفت صديقي مسوي تاك لصديقي الثاني بس ماطالع الاسم ماله بلون غامق
گلت شني هذا فلان لاغي صداقتي ؟!!
رحت على صفحته ماطلعت عندي گلت خاف معطلها وماتطلع
بس ظلت السالفه بالي لأن صديقي وماصاير بينا شي مو زين ليش يحظرني من صفحته ؟!!
المهم ظليت احوس ففكرت ادخل على صفحته من غير صفحه واشوف .
............
يتبع
المشاركة الأصلية كتبت بواسطة وسـام
بالعاده اني ارجع من الدوام الساعه اربعه ونص العصر بس ذاك اليوم حاطيني بلجنة كشف بمركز المحافظه وطلعت وياهم ورجعت بالثنين للبيت ،دخلت لكيت زوجتي على حبايه ونص وتلمع
وتلگتني متفاجئه شلون جاي من وكت وفرحانه بيه ،
وتغدينا سوى ونمنا ساعه ،
گعدت العصر گتلها يلا البسي خلي نطلع للمول نتونس ونتعشا برى صار هواي مطالعين
وفعلاً طلعنا وتونسنا ورجعنا للبيت
كان يوم خميس وباچر ماكو دوام سألتها اذا تريد تروح لأهلها لأن صار شهرين مارايحين رفضت بشده وبدون سبب
واني هم سديت الموضوع
گتلها لعد امشينا باچر نروح لأهلي نتغدى يمهم واتفقنا .
يوم ثاني رحنا يم أهلي وتغدينا وامي واخواتي كلش فرحانين بينا وابوي بيده يقدم الاكل لزوجتي ع السفره واني طاير من الفرح
وره الغده امي سألتني شعجب ماگتلي زوجتك حامل ؟
گتلها يمه صلي ع النبي بعدنا بالشهر الثالث من الزواج ياحمل هذا ؟
گالت صدگ تحجي ولك !! زوجتك حامل مبينه وبطنها مدوره
كتلها والله يمه مااعرف بهاي السوالف .
گالت خوش يمه العصر اخذها للسونار ونشوف انته تغديت روح نام وعوفها يمي
وره ساعه گعدتني زوجتي گالت يلا خلي نروح لبيتنا ترى ضجت كلش
يابه ليش مو على اساس تروحين انتي وامي للسونار ؟
گالت لا مااريد اروح متواعده ويه امي وخالتي نروح سوى
گتلها ماشي بس البس ونطلع
طبعاً امي ظل بخاطرها بس اني رضيتها وبست راسها واعتذرت انو صديق من بغداد جايني خطار ولازم نروح عيب منه وطلعنا رجعنا لبيتنا .
وره يومين بالضبط خابرتني واني بالشغل گالت حبيبي امي وخالتي يمي وراح نطلع نروح للدكتوره
گتلها اي عادي روحي حبيبتي وطمنيني مناك
رجعت للبيت الساعه خمسه العصر وحدي لكيت مخليه الاكل مالي ع الكاونتر حميته بالمايكرويف واتغديت وتمددت بالهول .
سمعت صوت بالمطبخ يشبه صوت شورت الكهرباء رحت بسرعه دورت ماكو شي!! ورجعت تمددت
بعد ساعه تقريباً رجعت هيه وامها وخالتها وبشائر الفرح تبدو عليهن
وبلا سلام گتلهن ها بشرن ؟!!
گالت عمتي بالخير والبركه زوجتك حامل
واني طرت من الفرح ماادري شسوي
گمت بست راسها واني كلش فرحان وخجلان
.… …
يتبع
المشاركة الأصلية كتبت بواسطة وسـام
خالو لا تشتت السالفه عليه
احجيلي سالفة صديقك الحاظرك من الفيس وشنو علاقته بموضوع الطلاگ ؟!!
لاتستعجل خال تجيك السالفه بس انته اربط الاحداث ولاتنسى .
ماشي حبيبي توكل بالله كمل اني اسمع ..
من صار الحمل بدت تتوحم وتتنسه ولعبان نفس ودوخه فأقترحت عليه انو تجي خالتها تبقى عدنا كم يوم واني رحبت جداً بالفكره كون خالتها متقاربه وياها بالعمر وصديقات جداً وأكيد راح تراعيها .
وفعلاً اجت خالتها والأمور ماشيه تمام وأول يومين كانت تنام بالاستقبال الى ان اشتريت سرير وكنتور صيني بابين حطيته بالغرفه الثانيه واصلاً الغرفه مفروشه ،
بهاي الاثناء زوجتي تدهورت حالتها جداً بسبب الحمل نزل وزنها بشكل ملحوظ ويوميه للدكتوره وتمنيت لو ما حبلت كان افضل وكانت امي تصبرني انو هذا اول حمل وأكيد راح تمر بهيج اشياء وبس تعبر الشهر السابع راح تستقر حالتها وكذا ،
فد يوم بالليل گاعد اتصفح بالفيس بوك وهم لفت نظري صديقي الي حاظرني مااعرف معطل صفحته وفكرت افوت عليه من صفحة زوجتي واشوفه موجود لو لا .
رحت جبت نقالها من الشحن وفتحت صفحة الفيس ودخلت على خانة البحث وهنا كانت الصدمه !!
لگيت حسابين لشباب فتت على اول واحد وگلبت بصفحته شويه ومباشرةً دخلت للرسائل وعينك ماتشوف الا النور محادثات طويله عريضه وقلوب حب لكن انتبهت انه اكو صور بالمحادثه مو صور زوجتي
دققت زين واذا هاي صور وحده من خالاتها غير الموجوده ويانه بالبيت .
نسخت المحادثات كلها ورسلتها لصفحتي ومسحت كل شي حتى لا أثير الشكوك ورجعت التليفون بمكانه وبديت اقره من اول مسج لنهاية المحادثه .
سالفه عجيبه غريبه ردت اربط احداثها بزواجي مارهمت
بس من يومها وانه لاليلي ليل ولانهاري نهار والشك موتني حتى أكل مااكل وبس جگاير ورجعت للشرب بعد ما تركته من تزوجت وصرت اتغيب من الدوام والعصر مااطلع من البيت .
المهم رجعت لتليفونها مره لاخ حتى اشوف الصفحه الثانيه الي مافتحتها لگيتها حاذفه البحث وفارغ
زاد هنا الشك وفكرت افاتحها بالموضوع بس تريثت وفكرت گلت خلي الزم بيدي شي ملموس حتى تكون حجتي قويه ليش اسوي مشكله چبيره وبعدين تفتر عليه واطلع اني الغلطان .
قبلها بفتره شفت اعلان بالفيس بوك عن كاميرات مراقبه سريه عدة اشكال منهن وحده تنحط بسويج الكهرباء ومنهن اضاءه ومنهن مخفيه بگد الابره
دخلت للبيج مال الكاميرات واخذت العنوان ورقم التليفون واتصلت بيهم ورحت للمحل وبده صاحب المحل يشرحلي انو بأمكاني اربط الكاميرات على الواي فاي واشوف كل شي بالبيت من خلال تليفوني وين ماكنت .
واتفقنا انه يجي يربطلي تلث كاميرات وحده باب الگراج والثانيه بمدخل المطبخ والثالثه بغرفة النوم ،
وتواعدنا انه اني اتصل بيه لما اكون موجود بالبيت حتى يجي يربطهن وبقيت انتظر شوكت يجي يوم تطلع زوجتي وخالتها حتى اتصل بأبو الكاميرات .
……
يتبع
هنا آني كلش سآءت علاقتي بزوجتي وصرت مااشتهي أشوف وجهها اني انام بالاستقبال وهيه بالغرفه
سألتني أكثر من مره شبيك شنو السبب گتلها معقوله ماتعرفين ؟
حلفت الف يمين ماأعرف شبيك
گلي اذا صاير او طالع شي مني وماعاجبك !!
بس آنه ماأشتهي حتى احجي وياها وحتى البيت صار بالنسبه اليه مقبره ،
وخالتها الي عدنا أيضاً ثگلت وجهي عليها وسمعتها حجايتين ورجعت لبيت أهلها ،
بهاي الايام گالت وديني لبيت جدي ..
ليش شكو ؟
گالت الحنه مال خالتي باچر .
خالتچ منو ؟
خالتي ورده .
ماشايفها منو ورده هاي ؟
اي صح انته ماشايفها لأن أجتني مرتين وانته بالدوام ومالحگت تشوفها وطلعت نقالها وگالت هاك هاي صورتها
هاي نفسها الي شفت صورتها بالمحادثه مال الفيس بوك !!!
شلون حنتها ومنو هذا الي تحچي وياه چانت بالفيس ؟! والف سؤال يدور براسي .
المهم يوم ثاني دزيتها لبيت جدها گالت ابات يمهم وباجر تعال عليه
واني رجعت على دفاتري العتيگه بالتليفون اكو وحده أرمله اعرفها قبل اربع سنوات وانتهت علاقتي بيها قبل سنتين گلت اتصل بيها نسولف واخلص وقت وياها ،
وفعلا راسلتها واتساب وجاوبت وبقينا نسولف للفجر وتواعدنا تجيني الساعه عشره الصبح اذا امها وافقت تروح للخياطه .
لفيت راسي ونمت وفزيت على صوت التليفون صديقتي تتصل جاوبت هلو صباح الخير وين انته ؟
اني بالبيت ،
وين بيتك اني مااندل ؟
اصعدي تكسي وانطيني السايق اني اوصفله ،
وفعلاً عشر دقايق هيه يمي
گعدنا بالاستقبال
وسرعان ماتحول الكلام الى لمسات خفيفه وهنا بده تليفوني يرن يرن ومايبطل رحت اشوف منو طلعت زوجتي ،
سويته صامت وگلبته حتى لا الاناره مالته تشوشني لأن چانت طافيه الكهرباء والغرفه ظلمه .
… ..
يتبع
..فصار عندي خفقان بالقلب من وراك..يله كمل
...تكمل اليوم لو نروح أنام
