منشور منقول من أحد الأمهات

السلام عليكم ...كنت معاهدة نفسي من العام الفائت انه اكتب موضوع يخص مدارس المتميزين حتى افيد الاهالي والطلاب اللي كثرت اسئلتهم واستفساراتهم حول التقديم والضوابط والقبول بهذه المدارس باعتباري مريت مع ابني بهذه التجربه السنه الفاتت والحمد لله تكللت بالنجاح وحالياً ابني احد طلاب هذه المدارس ...وحالياً دااشوف كثرت المنشورات والتساؤلات حول هذا الموضوع فحبيت انشر هسه وافيدكم بكل اللي اعرفه واذا عدكم اي سؤال او استفسار فاسئلوني ...
اولاً:شروط التقديم والضوابط ...كل سنة وبعد انتهاء جميع التربيات وبكل المحافضات من اعلان النتائج تنزل وزارة التربية معدل القبول بمدارس المتميزين او بالاحرى مجموع القبول ويكون عادةً ٥٧٠ ومن ثم ينزل الى مجموع ٥٥٨ ولحد هذه اللحظة منزل اي معدل ...انشاءالله بالايام القليله القادمة حتنزل الضوابط
ثانياً: من تنزل الظوابط اللي مشمولين بالمعدل يتوجهون الى المدارس القريبه على مناطقهم او تكون ضمن الرقعة الجغرافية يستلمون الاستمارات اللي بيها اسم وتسلسل الطالب وهاي الاستمارة تضمن دخول ابنكم لاختبار الذكاء ولتخافون ماكو شي اسمه الاستمارات على العدد وراح تخلص لان اي طالب مشمول بالمعدل حياخذ هذه الاستماره حتى لو عددهم وصل للالف لان اكو اختبار وهو حيصيفهم
هسه نجي شنو هذا الاختبار .....الاختبار هو نوعين تحصيلي وذكاء التحصيلي هو بالكتب الاربعه اللي امتحن بيها بالسادس (انكليزي عربي رياضات وعلوم ) والذكاء هو امتحان يعتمد على الثقافه العامه للطالب وعلى سرعة البديهيه والجواب الدقيق كل امتحان من ١٠٠ لازم الطالب ياخذ على الاقل 50 بكل امتحان يله يعتبر ناجح ومقبول بالمدرسه ...الامتحانين نفس اليوم يفصل بينهم استراحة معينه تقريبا نصف ساعة
هسه نجي شلون الطالب يتهيأ للاختبار ...الامتحان التحصيلي هو قاري الكتب وحافظها يعني ميحتاج يوم بالزايد لكل كتاب مجرد مراجعه كولش كافي ميحتاج دراسه وتع وضغط من جديد
اختبار الذكاء لازم يدخل معهد او مدرس يعلمه فقط على طريقة الجواب وعلى السرعة وهاي تكون دورات خاصه متجاوز اسبوعين او ١٠ايام يعني لدكولون شوكت ندخل وخاف بعد ماكو مجال بالعكس كلما كانت الدوره قريب الامتحان كلما احسن....يعني ماكو داعي تتوترون وتستعجلون عدكم مجال هواي وجدا كافي
زين خل احجيلكم على دراستهم بعد مينقبلون طبعاً اكيد هواي منكم حايرين ومتخوفين ومترددين ...
طبعاً كمدارس تعتبر من احسن المدارس بالعراق كطلاب وككادر وكبنايات وتجهيزات وحلم لكل اب وام يدخلون ابناءهم بيها ولحد يكول كولها نفس الشي والشاطر وين ماكان شاطروالاطباء والمهندسين مو بس من عدها تخرجوا ومن هالكلام طبعاً اني مدخلت ابني حتى يكون مهندس او طبيب بس مجرد اوفرله بيئة صالحة للدراسة بفترة الثانوية وبعدين الله كريم شيريد يصير خلي يصير ...وتكدرون تشوفون وتقارنون معدلاتها مع معدلات السادس بباقي المدارس بكل سنه
من ناحية الدراسهي صعبة جدا جدا ومرهقة وبيها ضغط نفسي وشخصيا اجتنا ايام للصبح منمنا لان هي تعتبر تجربه جديدة كدراسة بالانكلش بس هذا كوله زال وانتهى بمرور الايام وصارات دراسة عادية متخلو من الصعوبه بس تتدبر بشوية جهد ووقت اكثر من الدراسه العادية ...ولو تنعاد التجربة هم ارجع اقدمله برغم من كل التعب الشفنا ...يعني اللي اريد اوصله لتتردون واذا شفتوا نفسكم واطفالكم الهم القدرة والقابليه عالتعب والجهد فقدمولهم ووانتوا الممنونين

الموضوع طويل واسفة على الاطاله بس اقروا كوله وانشاء الله اكون فدتكم بشي ....تمنايتي لاطفالكم بالنجاح والموفقية والله ميضيع تعبكم ....